རྨ་ཆུའི་སྟོད་རྒྱུད་དང་།
རྨ་ཆེན་གངས་རིའི་ཉེ་ཕྱོགས་སུ།
རྨི་ལམ་གྱི་ཐེམ་པ་རྟག་ཏུ།
གོ་མཚོན་དང་རུ་དར་གྱིས་ཁེངས།
དྲང་ཞིང་ལྡེམ་པའི་སྙུག་རྒོད་ལ།
ལྟོང་ཁ་བཏོད་པ་ཙམ་གྱིས།
མི་སྐད་ལྷང་ལྷང་འཆད།
 
རྟ་ཕོ་རྐྱང་ངུ་དག་གིས་གཞན་དང་མི་འདྲ་བའི།
འཚེར་སྐད་སྐྱོ་ལྷང་ངེ་བ་ཞིག་སྐབས་སྐབས་སུ་སྒྲོག
ལོ་རྒྱུས་ལ་བམ་ཀློག་ཐེངས་རེ་བྱས་པ་ན།
ཨ་ཅེ་འབྲུག་མོའི་མགུལ་རྒྱན་ལས་འཐོར་བའི།
གཟི་ཆུང་འགའ་རེ་སུས་ཀྱང་རྙེད།
 
དྲག་ཆར་གྱི་རྗེས་སུ།
སྦྲ་ནག་ཆུང་ཆུང་དག་གི་མཐོངས་ཀ་ནས།
དུ་བ་སྔོ་རྒྱང་ངེར་ཐོན་ཚེ།
གྲོ་མ་རྟ་མགོ་ཙམ་ཞིག་བཙོས་ཏེ།
ཨ་མ་འགག་མོས་ཞལ་དྲོ་ཆིལ་ལེར།
སྒུག་ཡོད་སྙམ།
 
དུས་ཀྱི་ཕྱི་མིག་དང་འཕྲད་པ་ཙམ་གྱིས།
སེང་འབྲུག་སྟག་རྩེའི་རྒྱ་ཕིབས་དེ།
སྒྲིབ་བྲལ་གྱི་ཐུགས་ལས་ཧར་གྱིས་བཞེངས།
རྒྱུན་གཅིག་པའི་ཟུངས་ཁྲག་དེས་འཕར་རྩ་དེད་ནས།
མི་རབས་ནས་མི་རབས་སུ་གྱེས་པས།
ས་ཡི་གོ་ལ་གླིང་སྒྲུང་གི་དྲ་བར་ཚུད།