ལོ་ངོ་གཉིས་ཕར་འདས་སོང་།
     ཞོགས་པ་དེ་སུ་ཞིག་གིས་བརྗེད་སྲིད་དམ།
     བདག་པོས་ལུག་ཁྱུ་ལ་ཚང་རྩིས་ཅི་ཙམ་བྱས་ཀྱང་།
     སྡོམ་རྩིས་ཀྱི་གྲངས་འབོར་ལ་སུ་ཡང་ཡིད་མ་ཆེས།
    
     ཁྱིམ་ཚེས་རྣམས་མྱུར་དུ་མ་ཎི་ཁང་ལ་འཛོམས།
     ཐམས་ཅད་ཀྱི་བློ་སྙིང་གས་ལ་ཉེ།
     བདག་པོ་ལ་གདུང་སེམས་དང་བཅས་དྲིས།
     རྐྱེན་ངན་བློ་བུར་བ་དེས།
     ཁྱོད་ཀྱི་ལུག་ཁྱུ་གང་ལ་གཏོར་སོང་།
     གང་ལ་གཏོར་སོང་།
     ལུ་གུ་སྡོམ་པོ་ཚོ་ཡུལ་གྲུ་གཞན་དུ་འཁྱར་ཐལ།
     ཞེས་ངུ་ངག་དང་སྡུག་བསྔལ་མང་དུ་བྱས།
     བདག་མོས་ཧབ་ཆ་ཆེན་པོ་བརྒྱབ་བྱུང་།
     རླུང་འཚུབ་དེ་ཙམ་གྱིས་ལུག་ཁྱུ་གཏོར་སྲིད་དམ།
     མ་མོ་ཉ་ཉོག་འགའ་ས་འོག་ཏུ་མནན་པ་ཙམ་རེད།
     ངེད་ཀྱིས་ད་ལོ་ལྷས་རྭ་གསར་དུ་བརྒྱག་བཞིན་ཡོད།
     ལུག་ཁྱུ་རྩྭ་ས་གསར་པར་སྤར་ན།
     ད་གཟོད་བདེ་སྐྱིད་མིག་ལ་མཐོང་རྒྱུ་ཡོད་ཟེར།
    
     སྡེ་དཔོན་གྱིས་བཤད་པ་ནང་བཞིན།
     དམངས་སེམས་གཅིག་ཏུ་མཐུན་ན།
     མི་འགྲུབ་པའི་བྱ་བ་ཅི་ཡང་མེད།
     འཇོར་དང་ལྕག་ཁེམ་ཐོགས་པའི་ཡུལ་མི་ཚོས།
     གད་སྙིགས་གི་གསེབ་ནས་ཚེ་སྲོག་རྟ་རྔ་ཙམ་ཞིག་རྙེད་པ་དེ།
     མཆོད་རྟེན་བང་རིམ་དགུ་ཅན་ཞིག་བཞེངས་བའི་
     རིན་ཐང་ཅི་ལ་མེད།
    
     ལོ་ངོ་གཉིས་འདས་པའི་དེ་རིང་།
     ས་རྡུལ་ཡོངས་སུ་དྭངས་ཡོད་དམ།
     མ་མོ་རྒས་འཁོགས་ཚོའི་ཁྲ་ཆུང་གི་མཆི་མ་སྐམ་ཡོད་དམ།
     ལུ་གུ་ཆུང་ཆུང་ཚོའི་ཡ་ཆུང་གི་དངན་པ་དྭངས་ཡོད་དམ།
    
     བོད་ཆོས་ལྡན་སྐྱ་སེར་ཀུན་གྱི་སྨོན་ལམ་དང་དམ་ཚིག་མ་ཉམས་ན།
     རྣམ་ཤེས་གྲངས་མེད་པ་ཞིག
     ད་ལྟ་བདེ་བའི་ཞིང་ན་འཁྲུངས་ལོས་ཡོད།
    
     ངས་བློ་བུར་དུ་ལུ་གུ་ཞིག་གི་གླུ་སྐད་ཐོས་སོང་།
     ང་མ་མེད་ལུག་ཆུང་ལུག་ཁྱུའི་མཐའ་ན་ཡོད།
     དྲིན་ཨ་མ་དྲན་ཞིང་འོ་མ་དྲན།
     ངའི་སེམས་ཀྱི་སྡུག་འདི་སུ་ལ་བཤད།