རབ་གཙང་གདོང་དམར་བོད་པའི་རིགས་རུས་ཤིག །
     རབ་མཛེས་ཁོར་ཡུག་པང་དུ་མཉམ་འཛོམས་ནས། །
     རབ་བཀར་ལྷག་བསམ་དྭངས་མོའི་རྒྱུན་བསྐྱངས་ཏེ། །
     རབ་བརྗིད་ལྷུན་པོའི་ཚལ་ན་བདེ་བར་འཚོ། །
    
     རབ་སྟུག་ཚང་ཚིང་ནགས་ཀྱི་དགའ་ཚལ་ན། །
     གཞན་གསོས་ཁུ་བྱུག་བུ་མོའི་མགྲིན་སྙན་ཚོགས། །
     རབ་སྙན་གྲེ་འགྱུར་སྒྲོག་པའི་ངང་ཚུལ་འདི། །
     དབྱངས་ཅན་ལྷ་ཚོགས་མི་ཡུལ་འགྲིམ་མམ་སྙམ། །
    
     མཐའ་མེད་མཛེས་པའི་སྤང་ལྗོངས་རྩྭ་ཐང་དུ། །
     སྐར་ཚོགས་ཐང་ལ་བརྡལ་འདྲའི་ཕྱུགས་ཟོག་ལས། །
     མར་ཕྱུར་ལྷུན་པོ་བརྩིགས་འདྲའི་བརྗིད་ཉམས་དེ། །
     འབྲོག་པའི་འཚོ་བ་ཉིན་རེར་རྒྱས་པའི་རྟགས། །
    
     འབྲས་ལྡན་ས་གཞི་བུ་མོ་སྒེག་དུ་ཚེས། །
     ཞིང་ས་གྲུ་བཞི་འབྲུ་དྲུག་སྙེ་མས་ཁེངས། །
     གྲོ་ནས་སྲན་གསུམ་དབྱར་མཚོ་བཞིན་དུ་རྒྱས། །
     རོང་པའི་འཚོ་བ་ཉམས་མེད་འཕེལ་བའི་རྟགས། །
    
     ཡུལ་ལུང་དབེན་གནས་བརྟེན་པའི་བྱ་བྲལ་བས། །
     ཡང་དག་བོད་ཆོས་ཟབ་མོས་ཆར་འབེབས་ཤིང་། །
     སྐུ་གསུང་ཐུགས་རྟེན་རབ་བཀྲམ་ཀུན་ཏུ་ཁྱབ། །
     བོད་ཆོས་ཟབ་མོ་ཉམས་མེད་བརྟན་པའི་རྟགས། །
    
     ཤེས་རིག་ནོར་བུ་ཕྱུག་པའི་སློབ་གླིང་ན། །
     ཤེས་བྱ་བདུད་རྩི་རྔུབ་པའི་སློབ་གྲོགས་དག །
     རྣམ་གཡེང་ལེ་ལོའི་ཀུན་སྤྱོད་རྒྱང་དོར་ནས། །
     མ་འོངས་གངས་ལྗོངས་འཛུགས་སྐྲུན་བྱེད་པར་བརྩོན། །
    
     དྭངས་གཙང་ཤག་ཤག་བཞུར་བའི་དལ་འགྲོ་མ། །
     རྫ་ཀླུང་རིང་མོར་འཁྱིལ་བའི་དྲི་ཞིམ་ཅན། །
     འགྲོ་ཀུན་སྐོམ་གདུང་སེལ་བའི་རྒྱུན་བཟང་མ། །
     རང་ཡུལ་སྐྱིད་པོ་མཛེས་པའི་རྒྱན་དུ་འདོད། །
    
     ལོ་པཎ་མཁས་ཆེན་དམ་པ་འདི་ནས་འཁྲུངས། །
     སྟོབས་འབྱོར་མངའ་ཐང་ཅན་རྣམས་འདི་ནས་སྐྱེས། །
     མི་བུ་ལ་རྒྱ་ཅན་རྣམས་འདི་ནས་བྱུང་། །
     མདོར་ན་བདག་གི་ཕ་ཡུལ་འགྲན་ཟླ་བྲལ། །