ཡུལ་ཁམས་འདིར་ག་འདྲའི་དབྱར་ཁ་ཞིག་སླེབས་མྱོང
                   སེམས་ཅན་གྱི་མེ་ཏོག་རྣམ་པར་བཞད་བྱུང
                   ངའི་མེ་ཏོག་གི་ཚོམ་བུ་སད་ཀྱིས་བཅོམ་སོང
                   དགའ་ལྷང་ལྷང་འཕྱུར་འོང་བའི་མེ་ཏོག་ཆུན་པོ་དེ
                   དུང་ཞེན་ཟབ་པའི་སེམས་ནང་གི་མི་ལ་འབུལ་དུས
                   གློག་ཞག་འཁྱུག་ཐེངས་གཅིག་གིས་རྨང་ནས་བཅོམ་སོང

 

                   ཁོ་ལག་རྒྱས་པའི་དུག་སྡོང་ཆེན་པོའི་གྲིབ་མས
                   སེམས་ཞིབ་མོས་བཏབ་པའི་མེ་ཏོག་ཚོའི་ཉི་འོད་བསྒྲིབས་ཤིང
                   གཙང་བའི་ཁ་དབུགས་དང་ཚིམ་པའི་དྲོད་ཁོལ་ཤོར་ན
                   མེ་ཏོག་རྣམས་བཙན་གྱིས་སྐྱེས་ཏེ་ཤེད་ཀྱིས་བསྐམས

                   ངའི་མེ་ཏོག་ལྡུམ་ར
                   ཁྱེད་ཀྱི་མེ་ཏོག་ལྡུམ་ར
                   ཐུན་མོམང་གི་མེ་ཏོག་ལྡུམ་ར
                   རེ་ལྟོས་ཀྱི་མེ་ཏོག་ལྡུམ་ར

                   རྣམ་རིག་བཀྲ་བའི་མེ་ཏོག་སེར་ཆེན་ཉི་མས་ཚིག་ཐལ
                   ལང་ཚོས་ཁེངས་བའི་མེ་ཏོག་ཧ་ལོ་ཆུ་ལ་བྱིངས་ཐལ
                   རང་ཚུགས་ཐུབ་པའི་མེ་ཏོག་གངས་ལྷ་ཁ་བས་མནན་ཐལ
                   བློ་སེམས་དཀར་བའི་སྤང་རྒྱན་སྔོན་མོ་སེར་བས་བཅོམ་ཐལ

                   ཡིད་རྟོན་བྲལ་བའི་དཔྱིད་ཀའི་འཚུབ་ནག་མགོ་འཁོར
                   ཕྱོགས་རིས་བྲལ་བའི་དབྱར་ཁའི་ཐོག་མདའ་སྨྱོན་པ
                   ཁྲེལ་གཞུང་བྲལ་བའི་སྟོན་ཁའི་རྟ་བདུན་བརླ་ཆག
                   ཅིའི་ཕྱིར་ངའི་ལྡུམ་རའི་ནང་གི་མེ་ཏོག་བཅོམ་དགོས
                   ངའི་མེ་ཏོག་ལྡུམ་ར་ཤྭ་འོད་ཆེན་པོས་ཁྱེར་ཐལ
                   ངའི་སེམས་ཀྱི་གཤིན་ས་མྱ་ངམ་ཐང་དུ་གྱུར་ཐལ