ཨ་ཕ་ཡིས་བསང་མཆོད་དུ་ལན་བརྒྱར་བསྒྲོན་པས།
     མི་ཡུལ་དུ་འགྲོ་བའི་བུ་ཆུང་གིས་ཕྱིར་ལྟ་བྱེད་བཞིན།
     གསེར་མདོག་འབར་བའི་ཉི་གཞོན་ལ་སྒུག
     ཨཱ། མཁའ་དབྱིངས་མཐོན་པོར་ཟུག་པའི་འབོ་གངས་དཀར།
     ཁྱེད་ཀྱི་གཟི་བརྗིད་དང་འཛུམ་མདངས་མཐོང་བའི་ཉིན་ནས་འཇིག་རྟེན་གྱི་བདེ་སྡུག་ འཁོར་བར་སྐྲག་མ་མྱོང་།
     ཨ་མ་ཡིས་ཞལ་འདོན་དུ་ལན་བརྒྱར་སྨོན་པས།
     རང་ཡུལ་ལ་ལོག་པའི་སྨན་ཆུང་གིས་མིག་ཆུ་འབྱིད་བཞིན།
     དངུལ་མདོག་འཚེར་བའི་ཟླ་གཞོན་དེ་བསུས།
     ཨཱ། ཉི་ཟླ་ཕྲག་པས་འདེགས་པའི་འབོ་གངས་དཀར།
     ཁྱེད་ལ་གཡུ་རལ་གྱི་རླུང་རྟ་དར་བའི་ཉིན་ནས་རི་བོ་སུ་ལ་ཡང་ཡིད་སྨོན་ཤོར་མ་མྱོང་།
     ཕུ་ནུ་ཡིས་རྨི་ལམ་དུ་ལན་བརྒྱར་རྨིས་པས།
     ཕྱི་རོལ་དུ་བགྲོད་པའི་ན་གཞོན་ཚོས་ལག་གདང་སྦྲེལ་ཏེ།
     མཁའ་ལམ་འཚོལ་བའི་སྐར་ཁྱུ་ལ་བསྐོར།
     ཨཱ། ཐབས་ཤེས་ཆེན་པོས་འགྱིང་བའི་འབོ་གངས་དཀར།
     ང་ཡི་ལུས་སེམས་ལ་ངལ་དུབ་ཆེ་བའི་དུས་སུ་ཁྱེད་རང་ནི་ཐབས་བརྒྱའི་མན་ངག་ལྟར་སྒོམ་ཡོད།