ཞུ་འཕྲིན་བུང་བ་གཞོན་ནུའི་གླུ་དབྱངས།

                                                                             ཨ་སྨྱོན་བཀྲ་ཤིས་དོན་འགྲུབ། 

                                           ལྔ་རིག་ཤེས་བྱའི་མཁའ་ལམ་ཡངས་པོའི་ཁྱོན།།
                                           བློ་གྲོས་གོམ་པའི་འདེགས་འཇོག་གཅིག་གིས་ཀྱང་།། 
                                           སྐད་ཅིག་ཉིད་ལ་ཕ་མཐའ་གཞལ་བའི་དཔལ།།
                                           འདྲེན་མཆོག་སྨྲ་བའི་ཉི་མའི་ཞབས་པད་མོར།།
                                           མགོན་ཁྱོད་ཟབ་རྒྱས་ལེགས་བཤད་རྒྱ་མཚོའི་ཀློང་།།
                                           ཉིན་མཚན་ཕྲེང་བར་བསྟབས་པའི་རྩེ་དགའ་ལས།།
                                           བླང་དོར་བློ་མིག་ཅུང་ཟད་རྒྱས་པའི་བུས།།
                                           ཞུ་འཕྲིན་བུང་བ་གཞོན་ནུའི་གླུ་འདི་གསོལ།།
                                           དུས་ཀྱི་འཐོར་རླུང་དྲག་ཏུ་གཡོ་བའི་ལྕེས།།
                                           མཁས་པའི་སྡོང་བུ་ཕྱེ་མར་འཐག་པའི་ཤུལ།།
                                           མཆོག་སྐུ་པད་དཀར་སྡོང་བུ་སྙིང་སྡུག་པ།།
                                           ལྷམ་མེར་བཞད་འདི་བདག་ཅག་སྐལ་བ་སྦོམ།།
                                           ལྷག་བསམ་ཟླ་བ་དཀར་པོའི་དཀྱིལ་འཁོར་ལས།།
                                           བརྩེ་ཆེན་ག་བུར་ཟེགས་མའི་རྒྱུན་སྤྲོས་ཏེ།།
                                           སྐལ་བཟང་སྙིང་གི་ཀུ་མུད་བཞད་པའི་མུར།།
                                           ཉེར་འཚེའི་སྒྲ་གཅན་ཕྱོགས་ལས་རྒྱལ་ལགས་སམ།།
                                           འདི་ན་གཙུག་ལག་རྒྱ་མཚོའི་སྙིང་བོའི་སྨན།།
                                           གང་གཱའི་ཀླུང་ལྟར་འཁྱིལ་བའི་ངོ་མཚར་བཅུད།།
                                           བཏུང་བའི་ཁྱུ་མཆོག་དྲང་སྲོང་ཛ་ཧཱུ་བཞིན།།
                                           རིག་པའི་ཧུབ་ཀྱིས་རོལ་ལ་ཆེར་སྲེད་ཀྱང་།།
                                           རྣམ་གཡེང་སྒེག་འཆིང་གློག་གི་མིག་ཡངས་མས།།
                                           མཚར་དགུའི་ཟློས་གར་ཡིད་བཞིན་བསྒྱུར་པའི་མཐུས།།
                                           མིག་རྣའི་དབང་བོ་སྒྱུ་མའི་རྗེས་ཕྱོགས་པར།།
                                           འགྱོད་པའི་འཁུན་སྒྲ་དབྱར་རྔའི་ཚུལ་དུ་ལྡིར།།
                                           དེ་ཚུལ་སེམས་ན་གང་གི་ཡོན་ཏན་ནི།།
                                           སྨག་མུན་ཟ་ལ་དཔའ་བའི་ཉིན་བྱེད་དུ།།
                                           ཚད་མའི་སེམས་ཀྱིས་ངེས་པ་རྙེད་གྱུར་པས།།
                                           སྨོན་པའི་རི་མོ་པད་མའི་འཛུམ་ལ་ལྟ།།