རོལ་དབྱངས་ལྷོད་ཀྱིས་བཞུར་བའི་ཁང་ཆུང་འདིར།།
     འཁོགས་པའི་ལུས་ཉིད་ཐོ་ཡོར་སྐམ་པོ་ཞིག། །
     དྲན་རྟོག་འཕྲུལ་གྱིས་བསླུས་པའི་མིག་མདུན་དུ།
     དབྱངས་ཅན་སྒྲོལ་མའི་ཞལ་འཛུམ་ལྷག་ལྷག་གྲོལ།།
     གྲང་རླུང་གོས་སུ་གྱོན་པའི་སྦྲ་འདབས་དང་། །
     མེ་ཏོག་རྒྱན་དུ་སྤྲས་པའི་ནོར་འཛིན་གཞི།།
     འབའ་སྒྲ་རླུང་ལ་བསྲེས་པའི་ལུག་ཁྱུའི་མཐར། །
     འུ་གཉིས་ཞེ་སེམས་འོ་ཆུ་གཅིག་ཏུ་འདྲེས། །
     དཀར་ནག་རྡེའུ་བསྒྲིགས་པའི་རྩེད་ར་ན།།
     སྨན་ཤར་མཛངས་མའི་ཡོན་ཏན་ཁྱོད་ལ་ལྡན། །
     རྩྭ་སྔོན་གདན་དུ་བཏིངས་པའི་ཡ་སྒྱེད་དུ། །
     སྟག་ཤར་གཞོན་ནུའི་སྒམ་ཚུགས་བདག་གིས་བཟུང་། །
     བྱིས་བློ་མེ་ཏོག་འཐུ་བའི་འཇིག་རྟེན་ནས།།
     ལང་ཚོ་ལྗོན་པའི་ཁོ་ལག་ཕྱོགས་སུ་རྫོགས།།
     བཀའ་བསྟན་གླེགས་བམ་བརྩེགས་པའི་ལྷ་ཁང་དུ།།
     མི་འབྲས་རྡོ་རྗེའི་མནའ་ཚིག་སྙིང་ལ་བྲིས།།
     གནམ་སྔོན་ས་ལ་བཏིངས་འདྲའི་སྤང་ཁུག་ནས། །
     དག་གཙང་དྲན་པ་དམར་པོ་མཚོན་སླད་དུ།།
     མཛའ་འབྲེལ་སེམས་ཀྱིས་བཏོགས་པའི་མེ་ཏོག་ཅིག །
     གང་གི་སྐྲ་ལོའི་གསེབ་ཏུ་བདག་གིས་བཙུགས། །
     ལས་རླུང་བཙན་པོའི་ཁ་ཤུ་སྟོབས་དར་བས། །
     བག་ཡངས་རྩེ་དགར་གཡེང་བའི་ཕྱེ་ལེབ་ཟུང་། །
     བརྩེ་མེད་སོ་སོར་བསྐྲད་པའི་གདུང་སེམས་ལ། །
     ཨ་རག་ཆང་གི་བཟི་ཁས་ཅི་བྱར་ཡོད།།
     ཐུན་གསུམ་རྨི་ལམ་སྒྱུ་མའི་འཇིག་རྟེན་དུ། །
     ཇག་པའི་ཆུང་མ་འཕྲོག་པའི་ཚུལ་མཐོང་ནས། །
     མ་བཟོད་སྙིང་གི་ན་ཟུག་ལྕི་མོ་འདིས། །
     ལུས་ཀྱི་དར་ལྕེ་རླུང་གིས་ཡོམ་ཡོམ་སྒུལ།།
     ཟངས་མའི་སོར་གདུབ་སྙིང་ཀར་སྦྱར་བའི་ཚེ། །
     ཁྱོད་ཀྱི་སྙིང་ཆུང་རྩེན་པའི་རྡོག་སྒྲ་ཐོས།།
     མུན་ནག་གོས་སུ་གྱོན་པའི་མཚན་མོ་རེར། །
     ནམ་མཁའི་སྐར་ཆུང་གྲངས་མེད་ཁྱོད་ཀྱང་བཏུས། །
     བཟའ་ཤིང་ལོ་འབྲས་འཕུར་བའི་དུས་ཚིགས་སུ། །
     འབྲས་བུ་ཡོངས་རྫོགས་སྨིན་པར་ཁས་འཆེ་ན། །
     ཁྱོད་དང་ང་ཡི་རེ་བའི་ལྗོན་བཟང་ལ། །
     སྔོ་ལྗང་འདབ་ལོ་ཙམ་ཡང་མེད་འདི་ཅི།།
     རྐང་འཐུང་གཡུ་ལོ་ལྡེམ་པའི་ལྗོན་འོག་ཏུ། །
     ཕན་ཚུན་བསྔས་ནས་སྙིང་གཏམ་བརྗོད་པའི་ཚུལ། །
     མི་ལོ་བཅུ་ཕྲག་སྔོན་ནས་འདས་ཟིན་ཀྱང་། །
     ཕྱི་མིག་ཀློང་དུ་བརྗེད་མེད་དྲན་ཤིང་ཉིད། །
     འོད་དཀར་མདངས་ཀྱིས་འཁྱུད་པའི་འཇིག་རྟེན་ན། །
     ལྷིང་འཇགས་མཚན་ཐུན་རིང་མོའི་མཁའ་དབྱིབས་སུ། །
     སྲོག་མེད་བེམ་པོར་ཐུབ་པའི་ཐོ་ཡོང་ཞིག །
     ཁེར་རྐྱང་ཟླ་བ་ལྷ་མོའི་སྐྱོ་གྲོགས་ཡིན།།
     འུ་གཉིས་ཕན་ཚུན་བྲལ་བའི་ཉིན་མོ་ནས། །
     ཟླ་གསུམ་ལོ་ལས་རིང་བའི་འཁྲུལ་སྣང་གི།
     བྲལ་གདུང་སྙིང་ལ་ཉར་བའི་ན་ཟུག་འདི། །
     ཁྱོད་མིན་གཞན་ལ་བརྗོད་འདོད་ཡེ་ནས་མེད། །
     ཕྱིར་དྲན་སྙིང་ལ་བརྣག་པ་མ་བཟོད་ནས།།
     ཡིད་འགྱུར་ས་ལ་ཟེགས་པའི་ཁྲག་དྲོན་འདིས། །
     རྒྱང་རིས་ཡུལ་གྱིས་བསྐལ་བའི་མཛའ་ན་མོ། །
     མ་འགྱངས་ལ་མོར་མཇལ་བའི་གསོལ་འདེབས་ཞུ། །