ཡབ་ཡུམ་གྱིས་བསྐྲུན་པའི་སྒྱུ་མའི་ཕུང་པོ་ལ།
     མེས་པོའི་རྒྱུད་འཛིན་གྱི་ཟུངས་ཁྲག་བཞུར་ཏེ།
     མཐོ་སྒང་གི་ཉི་མའི་དྲོད་འོད་འཁྱིལ་ཞིང་།
     དབེན་གནས་ཀྱི་གྲོང་གསེབ་དེ་རྒྱབ་ཏུ་བསྐྱུར་ཏེ།
     རྒྱང་གྲགས་དུ་མལ་བསྐལ་བའི་འདུ་འཛིའི་གྲོང་ཁྱེར་དུ།
     མི་ཚེ་འདིའི་མདུན་ཕྱོགས་སུ།
     རེ་འདོད་ཀྱི་ས་བོན་ཞིག་བཏབ་ནས།
     འཚོལ་ཉུལ་གྱི་ཡུར་བ་ལ།
     བརྩོན་འགྲུས་ཀྱི་ཆུ་རྒྱུན་དྲངས།
     མཁས་ཆེན་རིག་པའི་བདག་པོའི་དྲུང་དུ།
     ཐེ་ཚོམ་གྱི་འཁྱམ་རོམ་སྦུབས་སུ་ཚུད་པའི་ཆུ་ཕྲན་གྱིས།
     ལེགས་བཤད་ཀྱི་ཕོ་ཉ་གཞན་སོས་བུ་མོ་འཚོལ་བ་དང་།
     སྐྱོ་གདུང་གིས་མནར་བའི་གཙུག་ཕུད་ཅན་གྱིས།
     སེམས་གསོའི་འབྲུག་སྒྲ་དབྱར་སྐྱེས་རྔ་གསང་རེ་སྒུག་བྱེད།
     མཐའ་ཀླས་གཙུག་ལག་གི་སྨན་ལྗོངས་སུ།
     མེས་པོའི་ལྕི་ཡང་གི་ཞབས་རྗེས་དང་།
     བདེན་དོན་རིག་པའི་མེ་ཏོག་འཚོལ་ཞིང་།
     སྤུན་ཟླས་འཁྲབ་པའི་དུས་ཀྱི་ཟློས་གར་དང་།
     མདུན་སྐྱོད་གོམ་སྒྲ་ལ་རྣ་དབང་གཏད།
     རིགས་མཐུན་གྱི་གྲོགས་མཆོག་དང་མཉམ་དུ།
     རིག་གཞུང་བུ་མོར་རྩེན་ཏེ།
     དུས་རབས་ཀྱི་རྗེས་སུ་བསྙེག་ཅི་ཐུབ་བྱས་ཤིང་།
     ལྷད་མེད་ཀྱི་མཛའ་བཤེས་དང་བཅས་ཏེ།
     མ་ཡུམ་གྱི་ལང་ཚོ་ལ།
     བདེན་དོན་གྱི་མེ་ཏོག་འཚོལ་ཉུལ་མཛད།
     རྔུལ་ཆུའི་ཐིགས་པ་སྨྲ་སྒོ་རུ་སིམ་དུས།
     འཚོ་བའི་དོན་སྙིང་ཞིག་ཚོར་ལ།
     རྐང་རྗེས་ལ་ཕྱི་དྲན་རེ་བྱེད་དུས།
     མི་ཚེའི་སྐྱིད་སྡུག་ཞིག་ཀྱང་མྱོང་།
     གང་ལྟར། རྐང་འོག་ཏུ་བསྲིངས་པའི་སྐྱ་ལམ་དུ།
    
     ཕུགས་མདུན་གྱི་པད་དཀར་སྡོང་པོ།
     འཚོལ་ཉུལ་གྱི་བུང་བ་ལ་དལ་ཁོམ་དབེན།
     དུས་ནམ་ཞིག་གི་ཚེ།
     ཁེར་རྐྱང་གི་འཚོལ་ཉུལ་ལས་ཁེར་རྐྱང་གི་བདེ་སྐྱིད་ཅིག་འཐོབ་པར་ངེས།
     སེམས་ཁོང་གི་གདུང་འབོར་རེ་ལས་མཐོ་སྒང་དུ་རྒྱུ་སྐར་རེ་འཆར་ངེས།