༡
འཛམ་གླིང་ས་ཡི་ཡང་རྩེར། །
བསིལ་ལྗོངས་མཚོ་བོད་མཐོ་སྒང་། །
མཛེས་སྡུག་དཔལ་གྱིས་ཕྱུག་པ། །
སུམ་རྩེན་ཡུལ་ལས་འཕགས་པ། །
གངས་ཅན་བོད་མིའི་རིགས་རྒྱུད། །
ཡབ་སྤྲེལ་བྱང་ཆུབ་སེམས་དཔའ། །
ཡུམ་རྒྱུད་བྲག་དཀར་སྲིན་མོ། །
འདུས་པས་བྱུང་བར་གྲགས་པས། །
བྱམས་དང་སྙིང་རྗེ་ཆེ་ཞིང་། །
རྒན་བཀུར་ཆུང་བྱམས་ལ་སོགས། །
ཡ་རབས་སྤྱོད་ཡོན་འཛོམས་ལ། །
དཔའ་རྟུལ་ལས་ལ་བརྩོན་ཞིང་། །
བློ་རིག་གནམ་ལས་ཡངས་པའི། །
རིགས་བཟང་རྒྱུད་གཙང་ཡིན་ནོ། །
དེ་ལྟར་བསམ་ཞིང་བསམ་བཞིན། །
གངས་ཕྲུག་ང་ཡི་སེམས་སུ། །
མེས་པོའི་རྒྱུན་བཟང་མཐུད་པའི། །
ང་རྒྱལ་སྙིང་སྟོབས་བསྐྱེད་འདུག །
༢
གདོད་མ་མོངས་པའི་དུས་སུ། །
མུན་སེལ་ཐོན་མིའི་བུ་དེས། །
དཀའ་ཚེགས་དང་བླངས་མཛད་ནས། །
རྒྱ་གར་འཕགས་པའི་ཡུལ་ནས། །
རིག་པའི་ཉི་གཞོན་འདྲེན་པའི། །
སྐྱ་རེངས་དབྱངས་གསལ་སྒྲ་གཞུང་། །
བོད་དུ་ཐོག་མར་དྲངས་ཕྱིན། །
དཔག་བསམ་འཁྲི་ཤིང་ལྟ་བུའི། །
བྷོ་ཊའི་སྐད་ཡིག་རྒྱས་པའི། །
སམ་བྷོ་ཊ་ཞེས་འབོད་པའི། །
མཚན་སྙན་འཛམ་གླིང་ཁྱབ་སོང་། །
དེ་བས་འདྲེན་བྱེད་ལམ་དུ། །
དབྱངས་གསལ་སོ་བཞི་ཤར་དུས། །
ཐོན་མིའི་བཀའ་དྲིན་དྲན་ཞིང་། །
མཁས་ཆེན་ལོ་ཙཱ་རིམ་བྱོན། །
དབང་མེད་ཡིད་ལ་དྲན་བྱུང་། །
༣
སྲོང་བཙན་ཉིན་བྱེད་གཞོན་ནུས། །
མུན་བཅོམ་མཐའ་བཞི་བཏུལ་ནས། །
འཛམ་གླིང་སུམ་གཉིས་ཟིན་པའི། །
བྷོ་ཊའི་རྒྱལ་བློན་རིམ་བྱོན། །
སེམས་ཀྱི་མེ་ལོང་འཆར་བཞིན། །
ལྷང་ངེར་ཡིད་ལ་བྱོན་པས། །
ཞུ་འདོད་གཏམ་བརྗོད་དག་ཀྱང་། །
དེབ་ཐེར་སྐྱ་བོར་ཐིམ་སོང་། །
ཡར་ཀླུང་གཙང་པོའི་བཞུར་རྒྱུན། །
སྔར་བཞིན་འགྲིབ་པ་མེད་འདྲ། །
ཇོ་མོ་གླང་མའི་གཟི་དཔལ། །
སྔར་བཞིན་ཉམས་པ་མེད་འདྲ། །
པོ་ཏ་ལ་ཡི་བརྩམས་སྒྲུང་། །
སྔར་བཞིན་རྫོགས་པ་མེད་འདྲ། །
བུ་ཆུང་སེམས་ཀྱི་སྐྱོ་གདུང་། །
སྔར་བཞིན་སོས་པ་མེད་འདྲ། །
༤
ཉོན་མོངས་དུག་གསུམ་འཕེལ་བའི། །
དུས་སྙིགས་འགྲོ་བའི་སེམས་སུ། །
དམ་ཆོས་བསིལ་ཟེར་ཅན་དེར། །
ལོག་སྤྱོད་ལོག་ལྟའི་སྤྲིན་ཕུང་། །
བསྒྲིབས་པས་ཆོས་འདོད་སྐར་ཚོགས། །
མུན་ལྷུང་ཆོས་སྐལ་དབེན་པས། །
འགྲོ་བའི་སྐྱོ་གདུང་སེལ་མཁན། །
མཁས་བཙུན་བཟང་གསུམ་ཅན་གྱི། །
གངས་ཅན་ལྗོངས་ཀྱི་གཙུག་རྒྱན། །
བློ་བཟང་གྲགས་པ་ཞེས་པའི། །
མུན་སེལ་གནམ་ལྕགས་རྒོད་པས། །
ཆོས་མིན་སྤྲིན་ཕུང་གཏོར་བས། །
དམ་ཆོས་སྐར་ཚོགས་རྒྱལ་པོ། །
གངས་ལྗོངས་ཡོངས་སུ་ཁྱབ་སོང་། །
རྗེ་ཡི་བཀའ་དྲིན་དྲན་ཏེ། །
དད་འདུན་དབང་མེད་སྐྱེས་བྱུང་། །
དུ་ཁས་མནར་བའི་འགྲོ་ལ། །
སྨན་པའི་སྐྱེས་ཆེན་དམ་པ། །
སེམས་ངོགས་ཆུ་ཤེལ་ལམ་དུ། །
སྐུ་གསུང་ཐུགས་བརྙན་ཤར་བས། །
དགའ་སྐྱོ་ཉིས་ཆར་སྐྱེས་བྱུང་། །