དེ་རིང་ངས་ཨ་སྔོན་དང་སྤྲིན་དཀར་མཐོང་བྱུང་།
     ཡུན་རིང་ལ་བོར་བའི་དྭངས་གཙང་གི་ཁ་དོག་མཐོང་བྱུང་།
     མཁའ་དབྱིངས་ཀྱི་སྤྲིན་དཀར་མཐོང་བས།
     ཕ་ཡུལ་གྱི་ལུག་ཁྱུ་དྲན་བྱུང་།
    
     དེ་རིང་བག་ལྷོད་པོར་རྒྱུ་བའི་སྤྲིན་དཀར་ལེབ་མོ་འདི་དག
     ཕ་ཡུལ་གྱི་ནམ་མཁའ་ནས་འཕྱུར་མྱོང་བའི་ཆུ་འཛིན་མིན་ནམ།
     བྱ་ཆེན་གྱི་གཤོག་ཟུང་བརྐྱངས་འདྲའི་ཤར་གྱི་སྤྲིན་དཀར།
     གླང་ཆེན་གྱི་སྣ་ཞགས་གུག་འདྲའི་ནུབ་ཀྱི་སྤྲིན་དཀར།
     ཨ་ཕས་ལུག་བལ་བྲེགས་ཏེ་སྤུངས་འདྲའི་ལྷོ་ཡི་སྤྲིན་དཀར།
     ཨ་མས་ཞོ་གསར་བསྙལ་ཏེ་ཆགས་འདྲའི་བྱང་གི་སྤྲིན་དཀར།
    
     སྤྲིན་དཀར་གྱི་ཚོམ་བུ་སྦྲ་ནག་གི་ཁ་ཚུབ་ལས་བཞད་དེ།
     སེམས་ཀྱི་མཁའ་དབྱིངས་ལ་སིལ་སིལ་བབས་འོངས།
     ཉི་འོད་ཀྱི་ངོགས་སུ་གཡོ་སྐྱོམ་བྱེད་པའི།
     རི་ལུང་ཐང་གི་གཡང་དཀར་ལུག་ཁྱུར་འདྲེས་ཏེ།
     བདེ་སྐྱིད་ཀྱི་སྤང་ཁུགས་ལ་ལྷུང་ལྷུང་བཞུར་འོངས།
    
     དུང་མདོག་གི་སྤྲིན་དཀར།
     མཐིང་མདོག་གི་ནམ་མཁའ།
     གསེར་མདོག་གི་ཉི་མ།
     གཡུ་མདོག་གི་ས་གཞི།
     ལག་རྩལ་ཉོ་མི་དགོས་པའི་རང་བྱུང་ལྷུན་གྲུབ་ཀྱི་ཚོན་རྩི་སྣ་ཚོགས།
     བདག་གི་བྱིས་བློར་ངང་གིས་བྱུགས་པའི་ཐ་སྙད་ཀྱི་ལོངས་སྤྱོད།
     ལོ་ན་དར་མའི་འཇིག་རྟེན་ནས་བོར་ཏེ་ཡུན་རིང་འགོར་སོང་།
    
     ལག་ནག་ཅིག་གིས་ཨ་སྔོན་བསུབས་ཤིང་སྤྲིན་དཀར་བསྣོགས་ཏེ།
     ནར་མ་སོན་པའི་བྱིས་པ་ཚོའི་སེམས་པ་ལོང་བར་བསྒྱུར་བས།
     ཁོ་ཚོས་ལོང་ཞར་གནམ་སྟོན་གྱི་བརྟུལ་ཞུགས་འཛིན་པ་ལས།
     ཨ་སྔོན་དང་སྤྲིན་དཀར་གྱི་ཁ་དོག་མཐོང་མ་མྱོང་ལ་བརྗོད་ཀྱང་མི་ཤེས།
     བྱིས་པ་ཚོ་ལག་ཆགས་པའི་གོ་རིམ་ཁྲོད་ཡུན་གྱིས་ལྐུགས་པར་འགྱུར།
     འདི་ནི་ཕ་ཡུལ་གཏན་ནས་དྲན་མི་སྲིད་པའི་བརྗེད་ཆུ་རེད།
    
     དེ་རིང་ཨ་སྔོན་དང་སྤྲིན་དཀར་གྱི་ཁ་དོག་མཐོང་བྱུང་།
     དྭངས་གཙང་ཕ་ཡུལ་གྱི་བརྩེ་བ་དང་དྲོད་ཁོལ་རེག་བྱུང་།
     ངའི་སེམས་པས་གཤོག་ཟུང་བརྐྱངས་ཏེ་བསིལ་ལྡན་ཡུལ་ལ་འཕུར།
     དྲི་བཞོན་རླུང་གིས་བསྐྱོད་ཀྱིན་དལ་གྱིས་ཕེབས་འོང་བའི།
     གདུགས་ལྟར་མཛེས་པའི་དབྱར་གཞུང་གི་ཆུ་འཛིན་ཕོན་པོ་ཞིག
     ང་དང་ངའི་ཆུང་འདྲིས་རྩེད་རོགས་ཚོའི་སྟེང་ན་རྣམ་པར་བཞད་འདུག
     ང་ཚོས་མཉམ་དུ“ཨ་ཁུ་ཉི་མ་དྲོ་དྲོ”ཞེས་ཤེད་ཀྱིས་བོས།
    
     《ཕ་ཡུལ》ལ་ཉན་ཐེངས་རེར་ཕ་ཡུལ་གྱི་ཡོད་ཚད་དྲན་ཡོང་།
     གཟུགས་མེད་ཀྱི་བང་མཛོད་ཆེན་པོ་དེའི་ཉམས་རྒུད་དྲན་ཡོང་།
     གཉེན་ཉེ་སྤུན་ཟླ་ཚོའི་ཐབས་ཟད་འུ་ཐུག་གི་ངོ་གདོང་དྲན་ཡོང་།
     སྐྱེས་དཔུང་རྫོགས་མ་ནུས་པའི་རྩྭ་ཕྲན་དག་གི་ལས་དབང་དྲན་ཡོང་།
    
     ཕ་ཡུལ་གྱི་རི་ཆུ་སྤང་ཐང་བཞིན་འགྱུར་ཉེན་ཆེ་བའི་སྤྲིན་དཀར།
     དུས་ནམ་ཞིག་མ་འོངས་ལོ་རྒྱུད་ཀྱི་གླེགས་བམ་དུ་འཁོད་ཚེ།
     བུ་རྒྱུད་ཚོས་ཕ་ཡུལ་དང་ཕ་ཡུལ་གྱི་ཁ་དོག་ངོས་ཟིན་ནམ།
     རེ་སྨོན་དང་སེམས་ཚེགས་ལ་འདྲེས་པའི་ཕ་ཡུལ་གྱི་སྤྲིན་དཀར།
     ཚེ་སྲོག་གི་རྒྱལ་སྲིད་མ་ཉམས་བར་དུ་བརྗེད་མི་ཐུབ་པའི་ཁྱོད་རང་།