འཇིག་རྟེན་མི་ཡི་ཚེ་འདི་གློག་ལས་མྱུར།།
     རྒས་གཉེར་ཐོད་ལ་བསྡུས་པའི་དེ་རིང་ཡང་།།
     སེམས་ཀྱི་བུ་ཆུང་བསམ་མེད་བྱིས་པའི་གཟུགས།།
     རྟག་འཛིན་མེ་ཏོག་འཐུ་བའི་གར་ལ་ཆགས།།
    
     ཁ་སར་རང་རློམ་མཁས་པའི་གྲལ་ན་བརྗིད།།
     དེ་རིང་རྨོངས་མུན་སྟུག་པོའི་ཀློང་ན་འཁྱམས།།
     བསགས་འཛད་མཐོ་ལྷུང་སྲིད་པའི་གྲོང་ཁྱེར་ན།།
     རང་རློམ་ཁེ་གྲགས་གཉེར་བ་ང་ཡི་ལུགས།།
    
     ཐམས་ཅད་རང་ལ་ཡོད་པའི་དགའ་སྣང་མེད།།
     ཡོད་ཚད་གཞན་ལ་ཤོར་ཡང་སྡུག་སྣང་བྲལ།།
     མགོ་ནག་མི་ཡི་ཤ་ཚུགས་འདི་བཟུང་ནས།།
     ལེགས་ཉེས་བཟང་ངན་གདམ་ག་ངས་མ་ཤེས།།
    
     བླ་མས་རྒྱུན་དུ་རང་གི་སེམས་འཚོལ་གསུང་།།
     ཕ་མས་འཇིག་རྟེན་སྙིང་བོ་མེད་ཅེས་སྨྲ།།
     གྲོགས་པོས་རང་ཉིད་རང་གི་མགོན་ཡིན་ཟེར།།
     དོན་དམ་སུ་ཡི་ངག་ཚིག་ཚད་མར་འཛིན།།
    
     ཕ་རོལ་གན་ན་བྱེ་མའི་ངལ་སྟེགས་ཤིག།
     རང་ལུས་དེ་ལ་བཞག་ན་བརྟན་པོ་མེད།།
     གོམ་གང་མདུན་དུ་སྤོས་ཀྱང་ན་ཟུག་ལྕི།།
     མ་སོང་ཧེད་ཀྱིས་བསྡད་ན་བཀྲེས་ལྟོགས་ཚ།།
    
     ཁ་བས་འཇིག་རྟེན་བསྒྲིབས་པ་འབྱུང་བཞིའི་ལས།།
     ཆར་རྡུལ་རླུང་དམར་འཚུབ་པའང་དེ་ཙམ་སྟེ།།
     འོན་ཀྱང་ནང་ལ་རྒྱུ་བའི་འཁྱག་རླུང་འདི།།
     རང་བྱུང་འབྱུང་བ་འཁྲུག་པའི་གཡུལ་ཐབས་མིན།།
    
     ས་འདི་སེམས་དཔའ་ཁོ་ནའི་སྤྱོད་ཡུལ་མིན།།
     མ་དག་སྐྱེ་དགུ་ཡོངས་ཀྱི་འཇུག་གནས་ཏེ།།
     དགའ་ནས་གནམ་དུ་འཕུར་བའི་འཐུ་མེད་ཅིང་།།
     སྡུག་ནས་ས་ལ་འཛུལ་བའི་ཐབས་ཀྱང་མེད།།
    
     བོས་ན་ཨ་ལན་མེད་པ་ཤེས་བཞིན་དུ།།
     གཟར་མོའི་བྲལ་ནས་འབོད་པ་ལན་གསུམ་བཏང་།།
     ལས་ངན་སེམས་ཀྱི་བག་ཆགས་བཙན་པོ་འདིས།།
     རང་ལ་མགོ་སྐོར་བཏང་བ་ཚོད་ཅིག་མེད།།
    
     དེ་རིང་ཞེ་སེམས་གཅིག་ཏུ་འདྲེས་པའི་གྲོགས།།
     སང་ཉིན་ཕན་ཚུན་སྡང་བའི་དགྲ་རུ་ལངས།།
     དགྲ་ཡང་གྲོགས་སུ་འགྱུར་བའི་དུས་ཡོད་ན།།
     སེམས་ཀྱི་ཆགས་སྡང་ཙམ་ལ་སྙིང་བོ་ཅི་།།
    
     དྭངས་གཙང་ལྷུང་ལྷུང་འབབ་པའི་རླན་གཤེར་ཆུ།།
     འཆི་མེད་ལྷ་ཡི་བློ་ལ་བདུད་རྩི་དང་།།
     ལས་ངན་ཡི་དྭགས་ཚོགས་ལ་རྣག་ཁྲག་སྣང་།།
     ཐུན་མོང་སྣང་ཚུལ་འདི་ལ་ཡིད་རྟོན་ཅི།།
    
     ལ་ལས་ཚ་གྲང་སྲོག་གི་གཤེད་དུ་འཛིན།།
     ལ་ལས་དུག་ཀྱང་འཚོ་བའི་ཟས་སུ་བསྟེན།།
     རིགས་དྲུག་ཀུན་གྱི་མྱོང་སྣང་མི་མཐུན་པས།།
     མ་བརྟག་ལྷན་སྐྱེས་བློ་ལ་ཡིད་མ་ཆེས།།
    
     ང་ལ་ང་ཡི་བསམ་ཚུལ་རྨ་མེད་ཅིག།
     ཁྱོད་ལ་ཁྱོད་ཀྱི་འདོད་དོན་འཁྲུལ་མེད་ཅིག།
     ཁོང་ལ་ཁོང་གི་རང་ལུགས་ཐག་ཆོད་ཅིག།
     ཐམས་ཅད་གཅིག་ཏུ་མཐུན་པའི་ལས་མི་འགྲུབ།།
    
     ཁ་བའི་མེ་ཏོག་བཞད་པའི་སྨན་ལྗོངས་སུ།།
     ཚེ་སྲོག་གསེར་གྱི་སྐུད་པ་མ་ཆད་བར།།
     རླབས་ཆེན་མཛད་རྗེས་འཇོག་པའི་མཐུ་མེད་ཀྱང་།།
     ཞབས་འདྲེན་ཐག་པའི་སྣེ་མོ་བཙན་གྱིས་གཅོད།།
    
     མ་བཅོས་ལྷུན་གྱིས་གྲུབ་པའི་སྙན་ཚིག་འདི།།
     ཡུན་རིང་སེམས་ཀྱིས་བསགས་པའི་བག་ཆགས་ཀྱི།།
     སྒྱུ་མའི་སྤྲིས་པ་འདི་ཉིད་དག་སླད་དུ།།
     གྲུབ་ཆེན་ཞོ་ར་ཚང་གི་ངག་ལས་ཐལ།།