སྡོང་ལོ་ཐར་ཐོར་ངང་ལྷུང་ཡོང་བ་འདིས། ཁྱོད་རང་སྒུལ་མ་ནུས།
བྱེའུ་ཆུང་ལྟ་བུའི་ཉི་མ་ཤར་ཡོང་ནའང་། ཁྱོད་རང་སད་མ་འདོད།
ཁྱོད་ཀྱི་རྨི་ལམ་ལ་གོ་ལ་གཞན་པ་ཞིག་འཁོར་གྱིན་ཡོད་པས་ཡིན་ནམ།
ཁྱོད་ཀྱི་མངའ་ཐང་ལ་འཛམ་གླིང་དཀྱིལ་འཁོར་འདུས་པས་ཡིན་ནམ།
 
ལོ་དེ་དག་ལ། རིན་ཆེན་བརྒྱབ་ནས་ཆུ་ཆེན་བརྒལ་བྱུང་ནའང་།
དུས་ཚོད་ཀྱི་བར་སྣང་ལ་ལག་ཆུང་འདེགས་མ་ནུས།
ནམ་མཁའི་ཁ་དོག་ད་དུང་འགྱུར་མེད་དུ་ཡོད་བསམས་ནས།
དྭངས་གཙང་གི་ནམ་མཁའ་དང་དེའི་གཡའ་དག་གླེང་མྱོང་།
རྒྱ་ཁྱོན་དང་མཐོ་ཚད་གླེང་ནས་རང་སེམས་གསོས་མྱོང་།
 
ཁྱོད་དང་མ་འཕྲད་པའི་ཡར་སྔོན་ཞིག་ནས་ངས་སྙན་ངག་བྲིས་ཏེ་ཡོང་།
སྙན་ངག་ལ་གཞན་གྱི་ཇུས་གཞི་དང་ལབ་གླེང་འདྲེས་མེད་ནའང་།
ཁོ་ཆོས་འཚོལ་གྱིན་པ་ཁྱོད་རང་ཡིན་པའི་དྲན་གདུང་གིས།
བདག་གི་སེམས་དང་བསམ་པར་བརྒྱུས་པའི་སྐད་ཆ་ཞིག
བདག་གིས་དུས་དང་རྣམ་པ་ཀུན་ཏུ་བཤད་ན་འདོད་པའི་སྐད་ཆ་དེ།
ཁྱོད་དང་བརྒྱུད་ནས་ཁོ་ཚོར་ཡང་བཤད་ན་འདོད་ཡོད།
 
དུས་ནམ་ཞིག་ལ། རླུང་དང་འཚུབ་མ་འཕྱུར་ཡོང་སྟེ།
ཁྱོད་རང་རྨེག་མེད་དུ་བཏང་སོང་ཚེ།
ངས་ཁྱོད་ཀྱི་འཚོ་སྟངས་ལ་ཡིད་ཆེས་སྤྲད་པའང་ནོར་འཁྲུལ་དུ་འགྱུར་སྲིད་དམ།
ཁྱོད་ཀྱི་ཁ་དོག་ལ་བརྫུས་པའི་ནམ་མཁའ་ཆུང་ཆུང་འདི།
ཁྱོད་ཀྱི་མྱོས་བུམ་ལ་འཁྲུལ་བའི་ཉི་ཟླ་ཆུང་ཆུང་འདི།
ཅི་འདྲའི་དམའ་ཞིང་ཡིད་དུ་འོང་བའི་སྣང་བས་རང་སྦྲིད་དུ་བཅུག་བྱུང་།
ལོ་དང་ཟླ་བ་འདས་པའི་ཕ་རོལ་གྱི་ཕ་རོལ་ཞིག་ལ།
ཆར་དང་གཙང་པོ་འདྲེས་པའི་དུས་ཚིགས་ཀྱི་མཐའ་མ་ཞིག་ལ།
ང་རང་ཁྱོད་ལ་དུངས་བརྩེ་ཆགས་སྲིད་ནའང་།
ངས་ནི་ཁྱོད་རང་བཙལ་ནས་རྙེད་སྲིད་ནའང་།
དུས་ཚོད་ཀྱིས་མགྲིན་པ་བསྒག་འགྲོ་བསམ་ན་ཐེ་ཚོམ་སྐྱེས་ཡོང་།
བྱིས་དུས་ཀྱི་ཕུགས་བསམ་གླེང་ཡོང་ན་ངས་ད་ལྟ་ཡིན་རུང་འཇའ་ཚོན་འཛིན་འདོད་ཀི
འཇའ་ཚོན་གྱི་ཕར་སྣེ་ན་ལུག་ཁྱུ་ཡོད་པས་ཡིན་ནམ།
ཡིད་དུ་འོང་བའི་ཁང་ཁྱིམ་དང་ཁྱོད་ཀྱི་རྨི་ལམ་འཁྱིལ་ཡོད་པས་ཡིན་ནམ།
 
སྲོད་ཁའི་ཉི་འོད་དེ་སྒེའུ་ཁུང་བརྒྱུད་ནས་ངའི་སྔས་འགྲམ་དུ་ཐོན་ཡོད།
བཙུམ་མ་ཕྱེས་པའི་མིག་ཟུང་གི་མཐོང་ལམ་ན་རི་རབ་དང་གཙང་པོ་ཡོད་པ་དྲན་ཡོང་།
དེ་དག་གི་ཕ་རོལ་ན་ད་དུང་ཁྱོད་ཀྱང་ཡོད་པ་འདྲ།
 
ལས་དབང་ནི་སྡེ་འདབས་ཀྱི་ལམ་ཕྲན་དག་དང་ཀུན་ནས་མཚུངས།
ཕྱོགས་གང་ཞིག་ལ་འཐེན་ཡོད་མེད་ཀྱི་སྣེ་མོ་མི་མཐོང་ན་ཡང་།
ངའི་རྐེད་པ་སྒུར་ཞིང་མིག་དབང་ཉམས་ཡོང་དུས།
ལམ་ཕྲན་དག་ལའང་ས་རྡུལ་ལང་ཞིང་རླུང་བུ་གཡུག་གིན་ཡོད།
ལམ་ཕྲན་གྱི་ཕར་སྣེ་ན། ངས་འཚོལ་གྱིན་པའི་ཁྱོད་རང་ཡོད་ཨེ་སྲིད།
ངས་སྙེག་གིན་པའི་དག་ཞིང་མངའ་ཨེ་སྲིད།
 
ངས་གཙང་པོ་མལ་དུ་བཏང་ཞིང་རི་བོ་སྔས་སུ་བཞག་སྟེ་ངལ་ཅིག་གསོ་འདོད།
དྭངས་གཙང་གི་ནམ་མཁའ་ཡུག་གཅིག་གྱོ ན་ནས་གཉིད་ན་བསམ་ཡོད།
ད་དུང་མཐའ་ཡས་པའི་རྒྱ་མཚོའི་ལྟེངས་ཀར་རླབས་ཕྲེང་འདུ་དགོས་ཀྱི་ཡོད་པ་འདིས།
ཁྱོད་ལ་འོ་བརྒྱལ་དང་སེམས་ཁྲལ་རྩེག་ཡོང་གིན་པ་དང་མཚུངས།
ཁྱོད་ལ་འདི་འདྲའི་ལན་ཆགས་དང་སེམས་ཁྲལ་དགོས་དོན་ངོ་མ་ཅི་ཞིག་ཡིན།
སྐྱེ་འཆི་ཡིན་ནམ་སྙིང་རྗེ་ཡིན།
 
ཁྱོད་ཀྱིས་ས་ཆེན་ལ་འདང་བརྩེ་ཆད་ཡོད་པ་བདེན་ནམ།
ཁྱོད་ཀྱིས་གཙང་ཆེན་ལ་རོལ་དབྱངས་བསྒྲིགས་ཡོད་པ་མིན་ནམ།
ང་ནི་ཧོལ་རྒྱུགས་ལ་དགའ་བ་ཞིག་ཡིན་པ་ཁྱོད་ཀྱིས་བཤད་མི་དགོས།
ང་ནི་ཅི་འདྲའི་གླེན་པ་ཞིག་ཡིན་པའང་ཁྱོད་ཀྱིས་གླེངམི་དགོས།
སྐྱེས་པ་ཞིག་གི་སེམས་པ་ནམ་མཁའ་ཡིན་ནམ།
སྐྱེས་པ་ཞིག་གི་ཐེག་ཚད་ཉི་ཟླ་ཡིན་ནམ།
ཁྱོད་ཀྱི་རལ་གྲིའི་དངོ་ཐོག་ན་སྐྱེས་པ་ཞིག་འགྲོ་བཞིན་ཡོད།
འགྱེལ་མ་ལང་གི་སྐྱེས་པ་ཞིག་གོག་མ་ནུར་གྱིས་འགྲོ་བཞིན་ཡོད།
 
དུས་ཚོད་ཀྱི་གོམ་འགྲོས་སྔུན་ལ་ནུར་གྱིན་འདུག
ང་ཚོའི་རུས་རྐང་ལ་སྡོད་གནས་དང་ལོག་མལ་བྲིས་ཚར་ཏེ་ནུར་གྱིན་འདུག་ནའང་།
ངས་རང་ཉིད་ལོག་ཆོག་པའི་མཐའ་མཇུག་གི་ཚང་མལ་ད་དུང་རྙེད་མེད།
རྒས་སོང་ན་འགྱོ ད་པ་ཅི་ཡང་མེད་ཆོག་པ་ནི་ཁྱོད་ཀྱིས་ང་ལ་བྱིན་པའི་ཁ་གཡང་ཨེ་ཡིན།
 
སྨུག་སྤྲིན་རབ་རིབ་འཐིབ་པའི་གནམ་འོག་འདི་ནས།
རླུང་བུ་བསིལ་བསིལ་ལྡང་བའི་གནམ་འོག་འདི་ནས།
ངའི་སྙན་ངག་འདི་དག་ཅི་འདྲའི་ཉམ་ཆུང་ཞིང་རང་ཚུགས་འཆོར་ལ་ཉེ་ཨང་།
རྡུལ་ཕྲན་གཅིག་གི་ལྕི་ཡང་མི་ཐེག་པའི་སྙན་ངག་གི་འཇིག་རྟེན་ལ་ཁ་བ་བབས་བྱུང་།
ཁ་བའི་ཁྲོད་དུ་རླུང་བུ་གཡུག་བྱུང་།
ངའི་སྙན་ངག    དབུལ་ཕོངས་ཀྱི་སྙན་ངག་འདི་དག་ལྡེ་མིག་ཅིག་ཡིན་ནམ།
མུ་མཐའ་མེད་པའི་ནམ་མཁའི་སྒོ་མོ་དེ་འབྱེད་ཐུབ་ན།
ངའི་སྙན་ངག   འཁོས་ཆུང་གི་སྙན་ངག་འདི་དག་རླུང་བུ་ཞིག་ཡིན་ནམ།
ཡིད་དུ་འོང་བའི་མཚོ་མོ་འདིའི་གཏིང་རུམ་དཀྲུག་ཐུབ་ན།
 
གཙང་པོ་རྒྱ་མཚོར་འབབ་ཀྱིན་འདུག་ནའང་།
ངས་ཁྱོད་རང་མ་བརྗེད་པར་ཡོད།
རླུང་བུ་ནུབ་ནས་ལྡང་གིན་ཡོང་ནའང་།
ངས་ཁྱོད་རང་གླེང་གིན་ཡོད།