ན་ནིང་དོ་ཚིགས་ཀྱི་ལྟད་མོ།
ཨོ་རྒྱན་དོན་གྲུབ། 2011-12-29
འཆོར་སྒེག་བུ་མོ་མཛེས་མ་གང་ས་ནས་མཐོང་ན།།
རང་སེམས་རླུང་གི་རྒྱུ་བ་དེ་ཕྱོགས་སུ་ཆས་སོང་།།
དེ་རིང་འདི་ཡིས་ཆོག་ཀྱང་སང་ཉིན་ལ་མི་ཚིམས།།
སེམས་ལ་ཆོག་ཤེས་ཅན་གྱི་སྐྱེས་པ་ཞིག་མི་འདུག།།
བལྟས་ན་མི་འགྲོ་ལྟ་བུའི་མཛེས་སྡུག་གི་བུ་མོ།།
བརྩེ་དུང་ཡུལ་ན་དེ་ལས་ཐུ་བ་ཞིག་མི་འདུག།
འདོད་པ་ཆག་སྒོས་དེད་པའི་མྱི་ཁ་ཡི་ལམ་ནས།།
རང་ལུས་གང་ལ་བྱིན་ཡང་སྣང་དག་རེ་མི་འདུག།
ན་ནིང་དཔེ་ཁུག་ཁུར་ནས་སློབ་གྲྭ་ལ་ཕྱིན་སོང་།།
ད་ལོ་ཕྲུ་གུ་པང་ནས་རང་ཁྱིམ་ལ་ཐོན་བྱུང་།།
མཐར་ཕྱིན་ལག་ཁྱེར་བཟང་པོ་རང་ལག་ན་མེད་ཀྱང་།།
གཉེན་སྒྲིག་ལས་ཀྱི་དཔང་ཡིག་ཡ་ཐོད་ལ་བབས་བྱུང་།།
ཕ་མའི་རྔུལ་ཁྲག་སྒོར་མོ་ཨམ་ཕྲག་ཏུ་བཅུག་ཅིང་།།
ཁྱིམ་པའི་རེ་བཞག་ཁུར་ཏེ་སློབ་གྲྭ་ལ་བུད་སོང་།།
དགོས་པའི་ཡོན་ཏན་མ་སྦྱངས་དུ་ཆང་ལ་རོལ་ཏེ།།
བུད་མེད་འཛུམ་ལ་ཆགས་པའི་བུ་ཆུང་འདི་ཨ་ཙ།།
མཚན་མོ་གླུ་ཁང་ཆང་ཁང་གང་འདོད་དུ་འགྲིམ་ལ།།
ཉིན་མོ་གཏི་མུག་གཉིད་ཀྱིས་སློབ་ཐུན་དེ་བརྒལ་སོང་།།
དུས་ཚོད་ཆུ་བོ་བཞུར་བཞིན་མཐར་ཕྱིན་ལ་ཉེ་འདུག།
འགྱོད་པས་ཁ་ཤ་འཐེན་ཡང་ཐབས་བཀོད་ཅིག་མ་བྱུང་།།
དགེ་རྒན་རང་གི་འོས་འགན་ཁྲིད་སྟེགས་ནས་གསུང་བྱུང་།།
སློབ་མས་རང་གི་ཚོད་ཀྱིས་དོན་མེད་ལ་གཡེང་འདུག།
འགན་ཁུར་བརྩི་འཇོག་དབེན་པའི་དགེ་སློབ་ཀྱི་བར་ནས།།
ཕམ་ཁའི་གྱོང་གུན་སྡུག་པོ་སློབ་མ་ལ་ཐོབ་བྱུང་།།
སྔོན་ཐོན་ཕྱི་གླིང་བུ་མོའི་སྐྲ་ལོ་དེ་དམར་བ།།
ལྷན་གཅིག་རང་བྱུང་ཁམས་ཀྱི་ཆོས་ཉིད་ལས་གྲུབ་སོང་།།
མ་ཧ་ཙི་ནའི་བུ་མོས་སྐྲ་མདོག་དེ་བསྒྱུར་བས།།
དབུ་ནག་གངས་ཅན་བུ་མོས་རང་ཚུགས་དེ་མ་ཐུབ།།