ལྔ་མཆོད་ཆེན་མོར་བྲིས་པ།
     དམག་རྟའི་རྫིག་རྔམ་གྱིས་དེད་པའི་དུས་རབས་ཀྱི་ཕྲེང་ལྡོག་རེ་རེ
     གྲུབ་ཐོབ་པ་སུ་ཞིག་གི་ལུང་བསྟན་གྱི་དམིགས་དཔེར་གྱར་དུས
     དཔེ་ཆའི་ངོས་ལ་ཧད་པའི་བྱིས་པ་དག་གི་ཀླད་པ་ནི
     ཚིག་གུ་ཆེ་བའི་སྟར་གའི་ནང་སྙིང་བཞིན
     ཕྱི་གསལ་ནང་གསལ་གྱིསསྐམ་གྱོང་གྱོང་གིས
     མ་འོངས་པའི་འཆར་གཞི་རེ་རེའི་སྣེ་ལ་འཐམ་འདུག
    
     རེའུ་མིག་མང་བོའི་ཁ་སྐོང་གི་དགོས་དབང་ལྟར
     ལག་པ་ཆུང་ཆུང་དེ
     མེས་པོའི་དུར་ཁུངས་འདྲུ་བའི་བསླབ་ཚན་དེ་ལ་འཐམ་དུས
     སེམས་ཀྱི་རལ་བ་རང་གིས་བཅད་པའི་འཐོབ་ཤོར་ལ
     རྟ་ལ་ཞོན་དེ་ར་མདར་རྒྱུགས་མཁན་མི་འདུག
    
     གསེར་བུམ་གྱི་མདངས་འོད་ལས་མཆེད་པའི་འོད་ཀྱི་ཁ་དོག་དེ
     རིགས་མི་འདྲ་བའི་སེམས་ཅན་གྱི་རྒྱུད་ལ་འཕྲོས་དུས
     རྒྱུངས་པ་ལའང་ལྷན་སྐྱེས་ཀྱི་འགྲེངས་ཚུལ་ཞིག་ཡོད་ལ
     གྲངས་མེད་པའི་ལུས་ཀྱི་རྩ་རྒྱུས་དག་ལ
     རང་དབང་གི་རྒྱལ་ཁབ་ཅིག་བཙུགས་ནས་ཡོད་སྐད
    
     མི་ཚེ་གཅིག་ལ་བརྒལ་དཀའ་བའི་ལམ་བུ་དེའི་བཞི་མདོར་འགྲེང་སྟེ
     མཚན་ནས་འབོད་དཀའ་བ་ཁྱེད་ཀྱི་མཚན་ནས་བོས་ན
     སྲོག་ཆགས་གྲོག་མ་ལའང་རང་རང་གི་མིང་རེ་ཡོད་པ་ཤེས་འོང་ལ
     སྲིད་པའི་འཇིག་རྟེན་དེ་ཉིད
     སྐད་ཅིག་ཏུ་སྣང་བའི་འཇིག་རྟེན་ཞིག་ཏུ་མདོག་ལོག་འགྲོ
    
     རྟེན་འབྱུང་གི་སྲབ་མཐུག་ཁོ་ནར་ཞེ་མ་ཤོར་བར
     ནམ་མཁའ་དེའི་རྒྱ་ཁྱོན་ལ་འདང་རེ་བརྒྱབ་ན
     རྒྱུ་སྐར་འགའ་ཞིག་བསྐྱངས་པའི་སེམས་ཁུར་ཙམ་དུ
     གསེར་འོད་ཀྱི་རླབས་རིས་སུ་བསྙེལ་བའི
     སྙིང་རྗེ་ཡི་རྩ་བ་དེ་རིག་ཐབས་མི་འདུག
    
     སེམས་ཀྱི་བདག་པོཤེས་རབ་ཀྱི་བདག་པོ
     རྟོག་བཟོའི་ལག་པ་དེ་བྲང་ལ་བསྲིང་ས་ཞིག་དང
     རྨི་ལམ་གྱི་རྐང་བ་དེ་ཁྱོད་སར་འཛུགས་སྐལ་རེ་ཡོད་ན
     ངས་དེ་རིང་གི་འདོད་བློ་ཡོད་ཚད་ཆུ་ལ་བཏབ་ནས
     དུས་རབས་བཅོ་ལྔ་བའི་ཀློང་རིམ་དེ་ལ
     རང་གི་ལུས་ངག་ཡིད་གསུམ་གསར་དུ་གཟུག་ངེས་ཤིང
    
     བསྟན་བཤིག་ཚ་བའི་བྱ་སྤྱོད་དེས
     ཁྱོད་ཀྱི་དཔེ་ཀློག་གི་ངལ་ཐུན་ཐེངས་ཤིག་བསུས་ཏེ
     ཁྱོད་ལ་དགོད་ཁ་ཞིག་སློང་འདོད་ཅིང
     མགོ་རིལ་རིལ་གྱི་བདག་གི་སྣང་བརྙན་དེས
     ང་ལའང་དགོད་ཁ་ཐེངས་ཤིག་སློང་འདོད