རྫོགས་ཆེན་གྱི་ཞོགས་པ།
རྡོ་ར་དཀར་མོའི་ལུང་ཁོག་རིང་མོ་བརྒྱུད་ནས་ཕེབས་འོང
ཁ་དོག་སྣ་མང་གིས་ཟིན་པའི་སློབ་ཁང་དང་སྡོད་ཤག
ནར་སོན་སྟོང་ཕྲག་གི་ལང་ཚོ་བརྟན་བརླིང་གིས་རུམ་སྟེ
བྱིས་པ་ཚོའི་ཧབ་ཆ་ཡི་ཀློང་ན      སྟོབས་ཀྱིས་བརྗིད
དབྱངས་གསལ་སོ་བཞིའི་འདོན་སྟངས་ཀྱི་སྒྲ་དབྱངས་མཐོན་པོ
རྡོ་ར་དཀར་མོའི་ལུང་མདོ་རུ་མཆེད་པ་དང
ཚུར་སློབ་རར་འཁོར་བ་ནས
དགེ་རྒན་ལགས    སྐྱོ་ངལ་གྱི་བྱིང་རྨུགས་ཡོངས་སུ་སངས་ཏེ
གཞུང་སྒྲུབ་ཀྱི་ཅོག་ངོས་ལ་འཕྲོས་པའི་འོད་ངོགས་སུ
འཛུམ་དམུལ་ལེར    ཟིན་དེབ་ཀྱི་ངོས་སུ་ཡང་ཡང་བལྟ
དཔེ་ཆའི་ཀློག་ཤུགས་མ་འཇགས་པའི་རྫོགས་ཆེན་སློབ་ར
ཞོགས་པ་འདིའི་མཁའ་དབུགས་གསར་བ་ཁྲོད་ན་དྭངས་ཤིང་གཙང
ད་དུང  སློབ་ཕྲུག་ཚོའི
མར་དང་རྩམ་དྲིས་གཡོགས་པའི་ལུས་དང་སེམས་པ་དམར་པོ་དེ་ཡང
ཞོགས་པ་འདིའི་ཉི་གཞོན་འོག་ན་འཇམ་ཞིང་དུལ་རེད  ཀ་ཁའི་ནང་སྙིང་རུམ་པའི་གསེར་མདོག་གི་ཞོགས་པ་རེ་རེ
སྐྱབས་མགོན་རྡོར་བཀྲ་ཚང་གིས
བྱམས་བརྩེ་ཡི་མེ་ལྕེ་མི་ཉག་ཚང་ལ་སྦར་བས་ཡིན་ལ
དགེན་བླ་མེད་དག་གི་རིས་མེད་ཀྱི་རྒྱུན་ཁྲིད་ཐོག་མའང
རྫོགས་ཆེན་ཚང་ལ་བགྱིད་པ་ནས
གནས་འདི་རུ   བོད་པ་ཚོགས་ཀྱི་བརྩེ་སེམས་བཤམས་མྱོང་ཡོད
འོ  འདི་ནི་ང་ཚོའི་རྫོགས་ཆེན་ཡིན
མི་ཉག་ཚང་གི་རྫོགས་ཆེན་ཡིན
རྫོགས་ཆེན་གྱི་གཟི་མདངས་ཁྲོད་ནས
ངས་སྲིད་པ་གཞན་ཞིག་གི་ཆགས་ལུགས་རྙེད་ཡོད།
རྫོགས་ཆེན་གྱི་བརྟན་བརླིང་ཁྲོད་ནས
ངས་བོད་པ་ཚང་གི་ལོ་རྒྱུས་གཞན་ཞིག་ཀྱང་ཤེས་ཡོད