ལྷ་ཚོགས་ཀྱི་ཞལ་ཁ་ཕྱེ་མ་ཐག་པའི་བར་སྐོར་གྱི་ཞོགས་པར།
མཚན་སྨག་གི་སྨྱོ་ཧམ་རང་སར་ཡིབས་སོང་།
ཐྲིག་ཐྲིག་གི་གོམ་སྒྲས།རྡོ་གཅལ་གྱི་ཁུ་སིམ་དལ་གྱིས་དཀྲོགས།
མ་བསྒྲིགས་རང་འགྲིག་གི་གོམ་པའི་བསྟར་ཕྲེང་རིང་མོ།
བསྐྱར་ཟློས་ཀྱི་བགྲོད་ལམ་དོག་པོར་ཤུགས་ཀྱིས་འཚང་།
ནམ་ལངས་ཀྱི་འགོ་མ།ཉི་ཤར་གྱི་རྩེ་མོར།
བསང་དུད་ཀྱི་སྨུག་སྤྲིན་ཀློང་དུ་སྨོན་འདུན་རླུང་ལ་བཅིབས་ཏེ།
བཀྲ་ཤིས་པའི་ཁ་གཡང་བདེ་བ་ཅན་དུ་གཏོར།
མར་མེ་ཡི་གཟི་བྱིན་ཁྲོད་དུ་ཡིག་དྲུག་མེ་ལ་ལྕེབས་ཏེ།
འོད་སྣང་གི་ཚན་ཁ་དག་པའི་ཞིང་དུ་སྦར།
ང་ཡི་བར་སྐོར།ཆར་རླུང་གི་གཙེ་བ་ན་ཟུག་གིས་མྱངས་པའི་མཐོ་རིས་ལམ།
འདི་ནས་སེམས་ཁོང་དུ་འཁྱིལ་བའི་སྨྲེང་བ་སེམས་ཁོང་ནས་རུལ་དུ་འཇུག་དགོས།
འདི་ནས་སྣུམ་ཞག་གིས་བཀྲུས་པའི་ལོ་མང་གི་རྩིགས་པའི་ངོས་སུ།
འདས་པོ་ཁྲི་ཕྲག་གི་སྨོན་སེམས་དང་ཡིད་ཆེས་རིས་སུ་བབས།
འདི་ནས་དར་ལྕོག་གི་གཡབ་མོས་མཁའ་ལམ་བཤགས་ནའང་།
ཆུ་འཛིན་གྱི་གདུང་བ་རླུང་གིས་འཁུར་མ་ཐུབ།
འདི་ནས་དགའ་བ་དང་སྐྱོ་བ་མཉམ་དུ་རུབ་འོངས།
འདི་ནས་རྨི་ལམ་དང་མངོན་སུམ་མཉམ་དུ་ཤར་འོངས།
ཀྱེ་ཀྱེ།བར་སྐོར།
ངོ་གདོང་མང་པོའི་ཁྲོད་དུ།ང་ཡི་བློས་ཐུབ་མི་འདུག
མིག་ཟུང་མང་པོའི་ཁྲོད་དུ།ང་ཡི་སྨྲ་བ་དང་འགུལ་སྐྱོད་བག་ལ་འཁུམ།
ང་རང་གྲིབ་གཟུགས་མང་པོས་མནན་ཡོང་།
ང་རང་ལག་པ་མང་པོས་བཟུང་ཡོང་།
བར་སྐོར་ཡ།ན་བུན་སྟུག་པོའི་འོག་ཏུ། 
དག་ཞིང་གི་ལམ་སྣེ་གང་ནས་གང་དུ་བསྲིངས།
རེ་བའི་གཤོག་ཟུང་ཡུལ་ཕྱོགས་གང་དུ་བརྐྱངས།