བདེན་པའི་གཏམ་ལ་དོན་གྱི་ཡུ་བ་ཞིག་སྤྲས་ཏེ།།
     འཚོ་བའི་ཆུ་མོ་སྣོད་ལ་ལན་གསུམ་དུ་བཅུས་ཚེ།།
     འདུ་སྣང་ཆ་འཇོག་དཀོན་པའི་འཇིག་རྟེན་གྱི་བྱ་བར།།
     ད་ནི་ངེས་འབྱུང་ཡིད་ཀྱི་ཐུར་མ་ཡིས་དཀྲུག་འདོད།།
     ལས་ལ་རྒྱུ་འབྲས་ཡོད་པ་ཚད་མ་ཡིས་གྲུབ་ཅིང་།།
     དོན་ལ་འབྲས་བུ་དབེན་པའི་སྡུག་ཡུས་ཀྱི་གཏམ་བརྗོད།།
     རྒན་གཞོན་བར་མའི་ངག་ནས་ཆུ་ཁོལ་བཞིན་གདུས་པས།།
     གང་དྲན་སྣང་བའི་ས་གཞི་ཐོལ་ཐོལ་གྱིས་བངས་འགྲོ།།
     ཁ་སང་སྤང་ལས་འཁྲུངས་པའི་དྭངས་གཙང་གི་མེ་ཏོག།
     དེ་རིང་གཡོ་ཟོལ་འདམ་གྱིས་ཆལ་ཆིལ་དུ་སྦགས་པས།།
     རང་སེམས་གཙང་མའི་ཤོག་དཀར་ཐར་གཅིག་གི་ངོས་སུ།།
     སྨྱུག་རྩེ་དྭངས་མོ་གཏོད་སའི་ས་ཁོད་ཅིག་མི་འདུག།
     ཨ་ཕ་ཨ་མའི་གཅེས་ཕྲུག་མར་ལོ་ཡི་གོང་བུ།།
     སྤྱི་ཚོགས་སོལ་བའི་ངོས་སུ་ལན་བརྒྱ་རུ་བརྡར་བས།།
     ཐན་ལྟས་སྲིན་བྱ་འུག་པའི་རྣམ་ཐར་གྱི་བྱུང་བ།།
     སྐད་ཅིག་དུས་ལ་འཛད་མེད་གླེགས་བམ་དུ་གྲུབ་འདུག།
     མདོ་མེད་འཕྱོན་མས་དུས་ལ་འཛུམ་ཟེར་ཞིག་སྤྲས་ཀྱང་།།
     མཛངས་མའི་ཆོས་བརྒྱད་མཚན་མོའི་སྙིང་ཁམས་ལ་སིམ་འགྲོ།།
     སྟག་ཤར་སྐད་ཅིག་མྱོས་པའི་དགའ་སྣང་གི་དུངས་པས།།
     ཉེར་གཅིག་བག་མའི་ཞེ་འདོད་བློ་ཡིད་ལ་མི་ཡོང་།།
     མཁས་ཆེན་དམ་པའི་ཞལ་གསུང་གདམ་ངག་གི་བདུད་རྩི།།
     དེང་རབས་གཞོན་ནུའི་ངག་གི་ཚིགས་མལ་ནས་རལ་བས།།
     མདུན་སྐྱོད་གོམ་པའི་འདེགས་འཇོག་སྙན་འཇེབས་ཀྱི་གླུ་དབྱངས།།
     ཨ་མ་བགྲེས་མོའི་དཔྲལ་བའི་གཉེར་རིས་ལ་འཁྱིལ་འདུག།
     རྣམ་རྟོག་ཕོ་རོག་ནག་པོའི་སྟོང་སྐད་ཀྱི་སྲད་བུར།།
     ཕྲེང་དུ་བསྟར་བའི་སྲིད་འདིའི་ངོ་མཚར་གྱི་ལྟད་མོར།།
     འོད་དུ་འཚེར་བའི་དྲང་བདེན་གཟུར་གནས་ཀྱི་འདྲེན་བྱེད།།
     ཅིག་ཅར་ཅེར་ཡང་ངལ་བའི་འབྲས་བུ་ལས་མི་འདུག།
     འཇིག་རྟེན་ཆོས་བརྒྱད་ངག་གི་མགུར་དབྱངས་ལ་བཀུག་ཀྱང་།།
     སེམས་ཁྲལ་བསེ་རུའི་རྭ་གཅིག་སྙིང་ཁ་ནས་སྐྱེས་ཡོང་།།
     མི་ཚེ་རྟོགས་བརྗོད་རིང་མོའི་རྨ་ཀླུང་གི་འགྲོས་ལ།།
     རེ་བའི་རླབས་སྒྲ་སྒྲོག་པའི་སྐལ་བཟང་ཞིག་འདུག་གམ།།
     ལས་དབང་གནམ་ལ་བཅོལ་བའི་གདུང་རྒྱུད་ཀྱི་དམུ་ཐག།
     གོ་རྟོགས་རྣོ་དབལ་རལ་གྲིས་གཏུབ་བློ་ཞིག་མི་འདུག།
     མོ་རྩིས་ལུང་གིས་མི་ཚེ་བརྡར་གཅོད་ལ་རེམ་པའི།།
     གདོང་དམར་བོད་ལ་འོད་ཀྱི་འབྱུང་འགྱུར་ཞིག་འཁྲུངས་སམ།།
     སེམས་པ་ཨ་ཐང་ཆད་པའི་ཁལ་གཡག་གི་གོམ་འགྲོས།།
     ལྡ་མ་ལྡེམ་གྱིས་འཚོ་བའི་རི་སུལ་ལ་ཉུལ་ཏེ།།
     སྐྱོ་ངལ་ཐལ་སྐྱ་ཉིལ་ལེར་ས་གཞི་རུ་ཕོག་ནས།།
     ཞེ་བློ་གཏིང་ནས་འགྱོད་པའི་སེམས་གཞས་འདི་ཤོར་ཐལ།།