བརྡ་འཕྲིན་དུས་རབས་སོ་མའི་རླུང་ཤུགས་ལ་བརྟེན་ཅིང་།།
     བསམ་བློ་སྙིང་སྟོབས་རིག་པའི་རྒོད་པོ་ལ་ཞོན་ཏེ།།
     བག་ཡངས་སོས་དལ་སྡོད་པའི་བོད་གྲོང་ལ་སེམས་པ།།
     རྨ་ཆུའི་བུ་མོ་ཁྱོད་ཉིད་ཐག་རིང་ན་མི་འདུག།
    
     ཁོ་ཡིས་ལེགས་སྐྱེས་དྭངས་མ་མཛུབ་དཀྲིས་སུ་རློམ་ཞིང་།།
     ང་ཡིས་དྲན་རྟེན་གསོན་པོ་སེམས་གཏམ་ལ་བཟུང་ཡོད།།
     བསླུ་བྲིད་འདུ་འཛིས་གང་བའི་དེ་རིང་གི་ཉིན་མོར།།
     སེམས་པ་སེམས་ཀྱིས་ཤེས་མཁན་ཁྱོད་རང་ལས་མི་འདུག།
    
     གནའ་དེང་ཟུང་འབྲེལ་རིག་པའི་བསམ་བློ་ལ་ཁེན་ཅིང་།།
     རང་སྡེའི་སྐད་ཡིག་གཙང་མ་ལག་ཟུང་གིས་གཉོར་དེ།།
     གདོང་དམར་བོད་པ་ཚང་གི་སང་ཉིན་གྱི་རེ་བ།།
     ཁྱོད་དང་ཁྱོད་འདྲའི་བོད་མི་ཁ་ཁེར་ལས་མི་འདུག།
    
     རི་དང་ལུང་པ་མང་པོས་བར་ཐག་དེ་བཅད་ཅིང་།།
     མི་ཁ་ཚིག་རྩུབ་ངན་པས་རྣ་བ་ལ་གཟན་རུང་།།
     ཁྱོད་དང་འུ་གཉིས་སེམས་པ་རྨ་ཆུ་དང་འགྲོགས་ནས།།
     མཐའ་ཡས་རྒྱ་འཚོའི་ཀློང་དུ་ཉིན་ཞིག་ལ་ཐོན་སྲིད།།