དུས་ཚོད་སྐར་མ་ཅུང་བརྡ་འགྲོགས་ནས་འགྲོ། །
གངས་ལྗོངས་ཤེས་རིག་སློབ་གྲྭའི་ཚལ་དུ་འགྲོ། །
གནའ་བོ་སྲོལ་རྒྱུན་རང་མདངས་མ་ཡལ་བའི། །
བོད་རིགས་རང་གི་ཤེས་བྱ་སློབ་ཏུ་འགྲོ། །
 
བརྩེ་མཐུན་ལག་ཟུང་དམ་པོར་བཟུང་ནས་འགྲོ། །
མ་འོངས་ཕུགས་མདུན་གཅིག་ཏུ་འཛིན་ནས་འགྲོ། །
མི་རབས་གསར་པའི་སྙིང་སྟོབས་ཆེར་བསྐྱེད་ནས། །
མ་འོངས་གངས་ལྗོངས་མདུན་ལམ་འཚོལ་དུ་འགྲོ། །
 
འཛད་མེད་ཆུ་བོའི་རླབས་སྒྲར་འགྲོགས་ནས་འགྲོ། །
དུང་སེམས་འོ་ཆུ་གཅིག་ཏུ་འདྲེས་ནས་འགྲོ། །
བྱང་ཆུབ་སེམས་པའི་རིགས་རྒྱུད་མ་ཉམས་པའི། །
གདོད་མའི་ཕ་ཁྱིམ་གཉིད་ལས་དཀྲོགས་སུ་འགྲོ། །
 
དཀའ་སྡུག་སྣ་ཚོགས་གདོང་གིས་བསུས་ནས་འགྲོ། །
མེས་པོའི་ཁ་ཆེམས་དང་དུ་བླངས་ནས་འགྲོ། །
མཐོང་རྒྱ་ཆུང་ཞིང་གུ་དོག་མོད་པ་ཡི། །
མུན་ནག་ལྗོངས་སུ་སྒྲོན་མེ་སྦར་དུ་འགྲོ། །
 
དྲི་མེད་སྤྱི་སེམས་སྙིང་ལ་བཅངས་ནས་འགྲོ། །
སྣ་ཚོགས་ཤེས་བྱའི་རིག་གནས་སློབ་ཏུ་འགྲོ། །
བོད་པ་རང་གི་ཁྱད་ཆོས་མ་ཤོར་བའི། །
བཅུ་ཕྲག་རིག་པ་སྙིང་ནས་འཛིན་དུ་འགྲོ། །