རྨད་བྱུང་གངས་ཅན་ཆོས་རིག་ཉིན་བྱེད་དབང་། །
འཆད་ཉན་རླུང་གི་ཤིང་རྟས་ལེགས་དྲངས་ནས། །
ལྔ་རིག་གཙུག་ལག་འདབ་བརྒྱའི་ཚལ་འབྱེད་པའི། །
བཤེས་གཉེན་དམ་པ་རྣམས་ལ་གུས་པས་འདུད། །
གངས་ཅན་འཕེལ་འགྱུར་ཕྱོགས་པའི་དགོས་གལ་ལ། །
བཅུ་ཕྲག་རིག་གནས་འཛིན་སྐྱོང་སྤེལ་གསུམ་ཆེད། །
སི་བོད་སློབ་གྲྭ་བཙུགས་པའི་ཕྱག་རྗེས་ལ། །
མཁས་གྲུབ་དབུ་འཛིན་རྣམས་ཀྱི་བཀའ་དྲིན་དྲན། །
དུས་མཐའ་གངས་ཅན་རིག་གནས་དོན་ཆེན་དུ། །
བསམ་བཞིན་བྱོན་པའི་ངེས་པ་དོན་ལྡན་གྱི། །
རྒྱལ་སྲས་སྤྱོད་པའི་མཁས་དབང་དམ་པ་མཆོག །
བཤེས་གཉེན་ཐུབ་བསྟན་ཉི་མ་བཀའ་དྲིན་དྲན། །
སློབ་དཔོན་ཐོན་མིའི་དགོངས་པའི་ཡང་སྙིང་དང་། །
སི་ཏུ་པཎ་ཆེན་གསུང་གི་ལེགས་བཤད་ཀྱི། །
སྙིང་པོ་གཅིག་ཏུ་འཆད་པའི་དབང་ཕྱུག་ཆེ། །
བཤེས་གཉེན་བུ་ཕྲུག་བཀའ་དྲིན་གསལ་བར་དྲན། །
རིགས་པའི་དབང་ཕྱུག་རྣམ་གཉིས་གཙོར་གྱུར་པའི། །
འཕགས་བོད་མཁས་པའི་ཚད་མའི་བསྟན་བཅོས་དང་། །
བསྡུས་བློ་རྟགས་གསུམ་འཆད་ལ་དབང་འབྱོར་པའི། །
བཤེས་གཉེན་ཡེ་ཤེས་དར་རྒྱས་བཀའ་དྲིན་དྲན། །
དཔལ་ལྡན་དུས་འཁོར་རྩ་བསྡུས་རྒྱུད་གཉིས་ཀྱི། །
བྱེད་གྲུབ་རྩིས་ཀྱི་རྣམ་གཞག་ཕྲ་རགས་ཀུན། །
ཕྱག་རྩེར་འགོད་མཁས་རྩིས་ཀྱི་མཁན་པོ་མཆོག །
བཤེས་གཉེན་དོན་ཚེའི་བཀའ་དྲིན་གསལ་བར་དྲན། །
འཇམ་མགོན་མི་ཕམ་གསུང་གི་ལེགས་བཤད་ལས། །
བསྟན་བཅོས་མཁས་འཇུག་གཞུང་ལ་ཐུགས་མཉེས་པ། །
བསླབ་གསུམ་བརྗོད་བྱ་གཅིག་ཏུ་འཆད་མཛད་པའི། །
བཤེས་གཉེན་སྨན་ལྷའི་བཀའ་དྲིན་གསལ་བར་དྲན། །
ཡི་གེའི་སྦྱོར་ཚུལ་སྤྱི་དང་བྱེད་བྲག་གང་། །
བརྡ་དག་གཞུང་གི་རྒྱན་གྱུར་ངག་སྒྲོན་སོགས། །
འཆད་ལ་དབང་འབྱོར་དག་ཡིག་སྨྲ་བའི་དབང་། །
བཤེས་གཉེན་པད་མ་རྒྱལ་མཚན་བཀའ་དྲིན་དྲན། །
སྙན་ངག་གཞུང་གི་རྩ་འགྲེལ་གང་ཡིན་ཡང་། །
འཕགས་བོད་མཁས་པའི་གསུང་གི་ལེགས་བཤད་ཀྱིས། །
ཡང་དག་འཆད་པའི་སྙན་ངག་མཁན་པོ་མཆོག །
བཤེས་གཉེན་པད་རྡོའི་བཀའ་དྲིན་གསལ་བར་དྲན། །
སྒྲ་ཚད་སྙན་ངག་བསྟན་བཅོས་གང་གི་དོན། །
སྔོན་བྱོན་མཁས་པའི་ལེགས་བཤད་དང་འབྲེལ་ནས། །
ཁ་གསལ་གོ་བདེས་འཆད་ལ་དབང་ཐོབ་པའི། །
བཤེས་གཉེན་རྡོར་ལོའི་བཀའ་དྲིན་གསལ་བར་དྲན། །
གངས་ཅན་མེས་པོའི་སྣོད་བཅུད་བྱུང་ཚུལ་དང་། །
སྒྲུབ་བརྒྱུད་ཤིང་རྟ་བརྒྱད་ཀྱི་ལོ་རྒྱུས་སོགས། །
གསལ་ཞིང་རྒྱས་པར་འཆད་ལ་དབང་འབྱོར་བའི། །
བཤེས་གཉེན་ས་འགོའི་བཀའ་དྲིན་གསལ་བར་དྲན། །
སྙན་ངག་རྩ་བའི་དགོངས་དོན་གསལ་བྱེད་དུ། །
བོད་མཁས་ཆེན་པོའི་དཎྜིའི་དགོངས་རྒྱན་གང་། །
རྒྱས་བསྡུས་ཚུལ་བཞིན་འཆད་ལ་དབང་འབྱོར་བའི། །
བཤེས་གཉེན་སྐལ་བཟང་དར་རྒྱས་བཀའ་དྲིན་དྲན། །
དབུ་ཕར་འདུལ་མཛོད་སོགས་ཀྱི་གཞུང་ལུགས་དང་། །
ཕྱི་ནང་གྲུབ་མཐའ་རྒྱ་མཚོའི་དགོངས་དོན་སོགས། །
ཐུགས་ཐོག་གཅིག་ནས་འཆད་པའི་གཏེར་ཆེན་པོ། །
བཤེས་གཉེན་རྩ་ར་ཆོས་གྲགས་བཀའ་དྲིན་དྲན། །
ནད་རིགས་བཞི་བརྒྱ་རྩ་བཞི་འཇོམས་ཐབས་ཀྱི། །
སྟོན་བྱེད་གསོ་རིག་རྒྱུད་བཞིའི་རྣམ་གཞག་དང་། །
ལག་ལེན་མན་ངག་འཆད་ལ་དབང་འབྱོར་བའི། །
བཤེས་གཉེན་འགྲོ་འདུལ་རྣམ་རྒྱལ་བཀའ་དྲིན་དྲན། །
སྙན་ངག་རྩིས་སོགས་འཆད་ལ་རབ་མཁས་ཤིང་། །
རྫོགས་ཆེན་རྣལ་འབྱོར་སྤྱོད་པའི་ཚུལ་འཛིན་པའི། །
གསང་སྔགས་རྡོ་རྗེ་བསྟན་པའི་སྔགས་འཆང་བ། །
བཤེས་གཉེན་ཨ་འཇམ་བཀའ་དྲིན་གསལ་བར་དྲན། །
འགྲོ་བའི་རིམས་ནད་དྲུངས་ནས་སེལ་བྱེད་པར། །
བཅོས་ཐབས་མན་ངག་སྟོང་གིས་རྒྱུད་ཕྱུག་ཅིང་། །
གངས་ཅན་གསོ་རིག་འཆད་ལ་དབང་འབྱོར་བའི། །
བཤེས་གཉེན་འཇམ་རྡོར་བཀའ་དྲིན་གསལ་བར་དྲན། །
སྐལ་ལྡན་རྗེས་སུ་འཛིན་པའི་བཟོ་རིག་གི །
གཞུང་ལུགས་མན་ངག་དང་བཅས་འཆད་པ་དང་། །
ཕྱག་སོར་སྒྱུ་རྩལ་འགོད་ལ་དབང་འབྱོར་བའི། །
བཤེས་གཉེན་དཔལ་ལྡན་བཀའ་དྲིན་གསལ་བར་དྲན། །
གངས་ཅན་ཡི་གེའི་གཟུགས་ཀྱི་སྒྱུ་རྩལ་རྣམས། །
ཡིག་མཁན་གོང་མའི་ཕྱག་རྒྱུན་སྤེལ་བ་ལ། །
དུས་མཐའི་སྨྱུག་འཛིན་ཆེན་པོའི་རྣམ་ཐར་ཅན། །
བཤེས་གཉེན་ཚེ་རིང་ཉི་མའི་བཀའ་དྲིན་དྲན། །
སྒྲ་སྙན་རྩིས་སོགས་རིག་པའི་གནས་བཅུ་དང་། །
ཁྱད་པར་སུམ་རྟགས་དག་གསུམ་གྱིས་མཚོན་པའི། །
བརྡ་དག་གཞུང་ལུགས་འཆད་ལ་དབང་འབྱོར་བའི། །
བཤེས་གཉེན་བསམ་གཏན་བཀའ་དྲིན་གསལ་བར་དྲན། །
བརྡ་སྤྲོད་རིག་པའི་གཞུང་དོན་སྤྱི་དང་ནི། །
ཁྱད་པར་རྟགས་ཀྱི་འཇུག་པའི་དཀའ་གནད་དག །
འཆད་དང་གསེད་བཀྲོལ་མཛད་ལ་དབང་འབྱོར་བའི། །
བཤེས་གཉེན་མཁྱེན་རབ་འོད་གསལ་བཀའ་དྲིན་དྲན། །
སྐད་གཉིས་སློབ་གསོས་འཆད་དང་བསྒྱུར་བ་དང་། །
རྩོམ་དང་བྲིས་ལ་ལེགས་པའི་རྩེར་སོན་པའི། །
སྒྲ་སྒྱུར་ལོ་ཙྭ་ཆེན་པོའི་མཚན་འཛིན་པའི། །
བཤེས་གཉེན་སྐལ་བཟང་ཆོས་འཕེལ་བཀའ་དྲིན་དྲན། །
རྒྱ་བོད་སྐད་གཉིས་སྨྲ་ལ་ཐོགས་མེད་ཅིང་། །
ལོ་ཙཱའི་གཞུང་ལུགས་འཆད་དང་བསྒྱུར་བ་དང་། །
འགྱུར་ཐབས་སྣ་ཚོགས་དཔྱད་ལ་དབང་འབྱོར་བའི། །
བཤེས་གཉེན་གཡང་སྐྱིད་བཀའ་དྲིན་གསལ་བར་དྲན། །
བཤེས་གཉེན་རྣམས་ཀྱི་མཚན་ཙམ་དྲན་པ་ཡིས། །
རྨོངས་པའི་མུན་པ་སྐད་ཅིག་འཇོམས་མཛད་ནས། །
ཚེ་རབས་ཀུན་ཏུ་བདག་སོགས་སློབ་ཚོགས་ཀྱི། །
བློ་གྲོས་གསལ་བའི་སྣང་བ་རྒྱས་གྱུར་ཅིག །
ཁ་བ་ཅན་དུ་ཆོས་དང་རིག་གནས་ཀྱི། །
ཕན་བདེའི་དཔལ་ཡོན་ཇི་སྲིད་གནས་པའི་བར། །
གཞན་ཕན་སྤྱོད་པའི་བཤེས་གཉེན་དམ་པ་རྣམས། །
བདག་སོགས་སློབ་ཚོགས་སྙིང་དབུས་གཏན་བཞུགས་གསོལ། །
སི་ཁྲོན་བོད་སློབ་བཙུགས་ནས་ད་ལྟའི་བར། །
སློབ་གྲྭའི་འཛིན་སྐྱོང་ཁུར་ཆེན་ཡོངས་བཞེས་པའི། །
དབུ་འཛིན་རྣམས་དང་ལས་བྱེད་ཡོད་ཚད་ཀྱི། །
འབད་པ་ལྷུར་ལེན་མཛད་པའི་བཀའ་དྲིན་དྲན། །
བཤེས་གཉེན་རྣམས་ཀྱི་བཀའ་དྲིན་རྗེས་དྲན་གྱི། །
ཚག་གི་ཕྲེང་བ་སྤེལ་བའི་དགེ་བ་འདིས། །
དུས་གསུམ་ཀུན་ཏུ་བདག་རྣམས་རྗེས་བཟུང་ནས། །
ལུགས་གཉིས་བླང་དོར་འབྱེད་ལ་མཐུ་ཐོབ་ཅིག །
སི་ཁྲོན་ཞིང་ཆེན་བོད་ཡིག་སློབ་གྲྭ་བཙུགས་ནས་ལོ་འཁོར་སུམ་ཅུ་ལོན་པའི་རྟེན་འབྲེལ་ཞུ་བར་དགེ་བའི་བཤེས་གཉེན་རྣམས་ཀྱི་བཀའ་དྲིན་རྗེས་སུ་དྲན་པར་བྲིས་པའོ། །ཀྲུང་དབྱང་མི་རིགས་སློབ་ཆེན།