ཁྭ་ཏ་ནག་པོའི་མགྲིན་པ་ནག་པས་བཙོག །
རི་སྤྱང་སྔོན་མོའི་མཆེ་སྡེར་རྣོ་བས་བཙོག །
ཕག་རྒན་གསོས་མའི་གཏི་མིག་ལྗི་བས་བཙོག །
འགྲོ་བ་མི་ཡི་གཤིས་ཀ་དེ་བས་བཙོག །
མཐོ་བ་སྟོད་ན་རྒྱང་བཞུད་སྤྲིན་པ་སྲབ། །
དམའ་བ་སྨད་ན་དལ་འབབ་ཆུ་མོ་སྲབ། །
བར་མ་བར་ན་སྦྲང་ཆར་བསིལ་མ་སྲབ། །
འགྲོ་བ་མི་ཡི་བརྩེ་དུང་དེ་བས་སྲབ། །
ཉི་མ་ཟླ་བའི་བ་དན་དགུང་ན་མཐོ། །
གསོམ་ཤིང་ཐང་ཤིང་གཡུ་ལོ་ས་ན་མཐོ། །
རྒོད་པོའི་གཤོག་རླབས་ནམ་མཁའི་དབྱིངས་ན་མཐོ། །
འགྲོ་བ་མི་ཡི་སྣང་བ་དེ་བས་མཐོ། །
ཆུ་མིག་ལྔ་ལྡན་ཆུ་སྣ་ཉུང་བས་ཆུང་། །
རུ་སྡེ་ཕྲ་མོར་ཚན་རིག་མེད་པས་ཆུང་། །
འདབ་ཆགས་བྱེའུར་ལྟོ་ཆས་དཀོན་པས་ཆུང་། །
འགྲོ་བ་མི་ཡི་ཁོག་རྒྱ་དེ་བས་ཆུང་། །
རྒྱ་སེ་མེ་ཏོག་མཛེས་ཀྱང་བཞད་ཡུན་ཐུང་། །
གཞའ་རིས་འཇའ་ཚོན་ཤར་ཡང་བཀྲ་ཡུན་ཐུང་། །
དབྱར་རྔ་འབྲུག་སྒྲ་ལྡིར་ཀྱང་གྲག་ཡུན་ཐུང་། །
འགྲོ་བ་མི་ཡི་ཕྱི་ཐག་དེ་བས་ཐུང་། །
སྤྱང་ཕྲུག་མ་ལས་མཆེད་ཀྱང་བརྩེ་བ་དབེན། །
ཞི་ལ་ཤ་ཡིས་གསོས་ཀྱང་དགའ་བ་དབེན། །
རྨ་བྱས་འབྲུག་སྒྲ་ཐོས་ཀྱང་དུང་བ་དབེན། །
འགྲོ་བ་མི་ལ་རྒྱུ་འབྲས་དེ་བས་དབེན། །
འགའ་ཤས་སྙིང་གི་འབེན་ལ་ཕོག་ཀྱང་ལགས། །
ལ་ལར་ཉེས་མེད་ལྭ་བ་བསྐོན་ཀྱང་ལགས། །
ཁ་མང་བུ་ལོས་དཔྱད་པའི་ངལ་བསྟེན་ལགས། །
ཕལ་ཆེར་མི་ཡི་འགོ་ལུགས་འདི་འདྲ་ལགས། །