སྣ་བརྒྱའི་མེ་ཏོག་སྡུག་གུར་བཀྲ་བའི་ཐང་། །
རབ་དཀར་འོ་ཞོའི་ཞིམ་མངར་གཏམས་པའི་གུར། །
བཞི་ཟུང་བགྲང་བྱས་བདེ་མཚམས་ཞུས་པའི་མུར། །
གོམ་པ་ཟུང་གཅིག་སློབ་གྲྭའི་ཕྱོགས་སུ་བྲེལ། །
ཁོད་སྙོམས་རྣང་མའི་དྲ་བ་བྲེས་པའི་ཕང་། །
རི་སྐྱེས་མེ་ཏོག་གར་དུ་ལྡེམ་པའི་ཞིང་། །
ལྷུང་ལྷུང་གཙང་ཆབ་གཡས་སུ་འཁྱིལ་བའི་ཁམས། །
མཚར་སྡུག་མངོན་དགའི་རིག་པའི་དགའ་ཚལ་འཛུམ། །
གསུང་གི་ལེགས་བཤད་འགྱུར་ཁུགས་འབུམ་གྱིས་ཕྱུག །
རིགས་ལམ་འཕྲུལ་གྱི་མེ་ཏོག་གར་དུ་ལྡེམ། །
བརྩེ་བ་འབུམ་གྱི་མདངས་རིས་མོག་པོར་འཁྱིལ། །
རྣམ་དཔྱོད་དཔལ་གྱི་བཤེས་གཉེན་མང་དུ་ལྷམ། །
སྦྱོར་ཀློག་དབྱངས་འགྲོས་མཁའ་རུ་ལྷང་ལྷང་སྐྱོམ། །
དྲི་མེད་བྱིས་བློ་འཛུམ་པའི་ཉམས་ཀྱིས་འགྱུ། །
ཕ་སྐད་དག་མོ་དྲིལ་བུའི་དབྱངས་ལ་བསྡེབས། །
ན་ཆུང་འབུམ་ཚོགས་སྙིང་གི་དཔྱིད་དུ་སྡུག །
དཔེ་ཁུག་འཁུར་ལོང་ཕྲག་པའི་གོང་དུ་བཏེགས། །
སྐེ་རས་དམར་པོ་མདུན་གྱི་བྲང་ཁར་གཡོ། །
མ་འོངས་ཕུགས་བསམ་སྙིང་གི་ཁོང་ན་འཛུམ། །
དགའ་བའི་སྤྲོ་སྣང་ཡིད་ཀྱི་མཁའ་ལ་གཏིབས། །
གཞན་ཕན་འོད་དཀར་དགྱེས་འཛུམ་མདངས་ཀྱིས་གྲོལ། །
ཤེས་རིག་རྒྱུན་བཟང་དགོས་འདོད་ཆར་བཞིན་འཇོ། །
རིག་པའི་འདབ་མ་གུར་དུ་བཞད་པའི་ཚལ། །
སྣ་མང་ཤེས་བྱ་རྒྱལ་ཁམས་དཔལ་དུ་རྫོགས། །
རབ་དཀར་གངས་ཀྱི་མེ་ཏོག་འཛུམ་པའི་གཟིས། །
ཁོར་ཡུག་མཛེས་པ་སཱ་ལའི་སྨན་གྱི་ལྗོངས། །
འགྱུར་བཞི་བསུ་བའི་མ་འོངས་གཞོན་ནུ་འབུམ། །
སློབ་རའི་ཚལ་ནས་ལང་ཚོ་རབ་ཏུ་དར། །
གོ་ལ་ཟླུམ་པོའི་ཡངས་པའི་གཙུག་ཏོར་དུ། །
གངས་ལྗོངས་སྒེག་མོའི་བཞིན་དཔལ་གསར་པས་མཛེས། །
མ་ཡུམ་སློབ་གྲྭའི་དགའ་ཚལ་དམ་པ་རུ། །
དབྱངས་གསལ་གྱེར་བའི་ལས་འདིར་བདག་ཡིད་མོས། །