ཨོ་རྒྱན་དོན་གྲུབ། 2011-10-31
སློབ་གྲྭའི་ཚལ་ནས་དུས་ཚོད་ཆུད་ཟོས་བཏང་།།
དར་མདོ་གྲོང་ནས་མི་ཚེ་དོན་མེད་བརླགས།།
བསམ་ཞིང་བསམ་ན་འདི་ཡིན་དེ་ཡོད་ཅེས།།
ལས་ཤིག་མི་འདུག་དུས་ཀྱི་མི་ངན་ང།།
དགོང་མོ་མ་ཉལ་ཇ་ཁང་ཆང་ཁང་འགྲིམ།།
ཞོགས་པར་མ་ལངས་གཏི་མུག་གཉིད་དུ་ལོག།
སྔོན་གྱི་ལས་ལ་ཕྱིར་མིག་ཅི་བལྟས་ཀྱང་།།
འགྱོད་པས་སེམས་པ་མནར་བ་ལན་གཅིག་མིན།།
གཡུ་མཁར་ཐང་ན་ལང་ཚོ་རླུང་ལ་སྤུར།།
རྟའུ་ཡུལ་དུ་སྒོར་མོ་གླེང་ནས་བསྡད།།
དཔལ་སྨད་ཁོག་ནས་རང་དོན་རྐྱང་རྐྱང་བསྒྲུབས།།
དོན་ལྡན་ལས་ཤིག་མི་འཇོན་མི་ཚེ་འདིར། །
མགོ་བོ་དགྱེ་ནས་ཨ་མེ་རི་ཁར་བལྟས།།
རྣ་བ་བླགས་ནས་ཧིན་དྷི་ཕྱོགས་སུ་ཉན།།
ཉན་ཉན་བལྟས་བལྟས་གཉིས་ཀྱི་ཕ་མཐའ་ནས།།
མགོན་དང་སྐྱབས་ཤིག་མི་འདུག་ཅི་ཞིག་རེད།།
སྒོ་ཁྱི་གླིང་བཞི་བརྒལ་ནས་རྒྱང་ལ་ཆས།།
རྒོད་པོས་མཁའ་ལམ་བསྙེགས་ནས་དགུང་ལ་འཕུར།།
ཅི་བྱེད་འདི་བྱེད་མེད་པའི་བུ་ངན་ང་།།
ཕ་ས་གྲུ་བཞི་པང་ནས་ཁེར་མ་ལྷག།
ཕ་ཁྱིམ་སྦྲ་ནག་དོར་བའིམཚེར་ཤུལ་ན།།
སྟོང་ཕག་རྒྱུ་ཡིས་གྲུབ་པའི་ཁང་བ་བསྐྲུན།།
རྩྭ་ཐང་ལྗང་མདོག་ཡལ་བའི་པང་གཞུང་ནས།།
འབྲོག་རྒན་ཤེས་མེད་གདོང་གི་འཛུམ་ལ་ལྟོས།།
རི་ལུང་གཏེར་གྱིས་བལྟམས་པའི་ཕ་ས་ན། །
ཆུ་གློག་ལམ་གྱི་མཐུན་རྐྱེན་མ་ཚད་པས།།
ཆ་འཕྲིན་དུས་རབས་གསར་བའི་ལག་རྩལ་དག།།
གང་ལ་གང་མཁོ་དེ་ལ་དེ་ལྟར་སྩོལ།།
དགེ་བཤེས་འཕགས་པའི་ཡུལ་ན་ཞབས་ཀྱིས་བཅགས།།
སྤྲུལ་སྐུ་གདུལ་བྱའི་དོན་དུ་རྒྱ་ནག་ཕེབས།།
གྲྲྭ་པ་སྡོམ་མེད་ཟིང་ཟིང་གྲོང་དུ་བྱོན། །
དགོན་སྡེ་རྙིང་བ་ཆ་མེད་མི་ཡིས་བཟུང་།།
འབྱོར་ལྡན་སྐུ་ལོས་གཟིམས་ཁང་བཞེངས་བ་ལས།།
ཉམ་ཐག་ཕ་ཡུལ་སློབ་གསོ་སུ་ཡིས་མཐོང།།
རང་རིགས་དར་རྒུད་ལས་ལ་འདང་ཕོག་མཁན།།
ས་ཆེན་འདི་ན་ཁ་རེ་ཁེར་རེ་ཙམ།།
གྲོང་ཁྱེར་ཕ་མས་བུ་ཕྲུག་གཉོར་བ་དེ།།
ཟ་འཐུང་ལུགས་དང་སྐད་རིགས་གཞན་ལ་བསྒྱུར།།
ཁ་ནས་མི་རིགས་སྐད་ཡིག་མཁོ་ཚུལ་གླེང་།།
སྐད་ཆ་འདི་དག་སྐྱག་རྫུན་ངོ་མ་རེད།
བླ་རུང་ཞིང་ནས་བོད་སྐད་བཤད་པ་དང།།
རྔ་བའི་ཁྱུང་མཆུའི་ཨ་མའི་མ་ལོ་ཚང་།།
སྐུ་ཞབས་སྨན་བླས་བུ་མོ་གཉོར་ལུགས་སོགས།།
ཁ་བ་ཅན་གྱིས་མིག་དཔེ་བལྟ་ས་རེད།།
དར་མདོ་ལྟག་སྒོ་གསུམ་གྱི་བར་ཁྱམས་ནས།།
གནའ་དགོན་ལྷ་མོ་རྩེ་ཡི་འདབས་རོལ་དུ།།
བུ་ཆུང་ཁེར་རྐྱང་ཞིག་གི་སེམས་གཏམ་འདི།།
འཚོ་བའི་གྲུ་ག་ཞིག་གི་ཟིན་ཐོ་ཡིན།།
རྩོམ་གསར། 10