རབ་དཀར་མཛེས་སྡུག་ཁ་བའི་སྤྲིན་འཛིན་རྒྱ་མཚོའི་མར་གད་འབུམ་གྱི་སྒྲ་ཡིས་ཉེར་འཁྱུད་ཅིང་།།
སྣ་ཚོགས་རྣམ་བཀྲ་དབང་པོའི་གཞུ་ཡིས་ཕྱོགས་གཅིག་མ་ཡིན་ཀུན་ནས་ཡོངས་སུ་སྤྲས་པ་བཞིན།།
གཟུང་སྤོབས་བློ་གྲོས་མི་ཟད་གཏེར་སྦྱིན་ཚེ་རབས་ཡོངས་ཀྱི་སྙིང་གི་མུན་སེལ་མཚོ་བྱུང་མ།།
ཉིན་བྱེད་བྱེ་བས་ལེགས་པར་གསོས་པའི་རབ་དྭངས་ཡིད་ཀྱི་དད་བརྒྱའི་པདྨོར་རྟག་རོལ་མཛོད།།
ཁྱེད་ཀྱི་ཞལ་བཟང་པདྨ་དཀར།།
རབ་དཀར་ཚེམས་ཀྱི་ཟེའུ་འབྲུ་བཞད།།
གཡོ་ལྡན་སྤྱན་ཟུང་བུང་བ་གནག།
བདག་ལ་རྗེས་སུ་ཆགས་པར་མཛོད།།
བདག་ཡིད་ཁྱེད་ལ་མོས་གུས་རླུང་གིས་བསྐྱོད།།
དད་གསུམ་ཡིད་ཀྱིས་བསྟོད་ཚིག་འདི་གསོལ་ན།།
གང་གི་ཐུགས་རྗེ་ཟླ་བའི་འཛུམ་ཟེར་གྱིས།།
བློ་གྲོས་ཀུནྡ་བྱང་ཆེན་བར་དུ་སྐྱོངས།།
དུང་དུང་གདུང་བས་ལན་གཅིག་མིན་པར་སྙན་པའི་དབྱངས་ཀྱིས་ཁྱོད་འབོད་ན།།
གསལ་གསལ་ཐུགས་ཀྱི་བྱམས་པའི་ཞགས་པས་ནམ་ཡང་འདོར་མེད་རྟག་བཟུང་སྟེ།།
འཛུམ་འཛུམ་ཞལ་གྱི་ཟླ་བའི་དཀྱིལ་འཁོར་མིག་གི་དཔལ་དུ་སྦྱིན་པ་དང་།།
ཟབ་ཟབ་བློ་གྲོས་ལྷ་ལམ་ལྟར་ཡངས་ཀུན་རྨོངས་བདག་ལ་སྩོལ་ཅིག་ཀྱེ།།
ཡུན་རིང་ཐོག་མ་མི་མངོན་སྲིད་པ་འདིར།།
གཅིག་ཏུ་མཛའ་བས་ཡིད་ལ་འགྲོགས་པའི་རྨོངས།།
རབ་འབྱམས་ཤེས་བྱའི་གཟུགས་ལ་ལྟ་བའི་གེགས།།
ཁྱེད་ཀྱི་ཐུགས་རྗེ་ཉི་མས་སྨག་མེད་མཛོད།།
ངོ་མཚར་ཉམས་བརྒྱས་སྒེག་པའི་དཔྱིད།།
མགྲིན་པར་སྙན་འགྱུར་དཔལ་སྦྱིན་ལ།།
ལེགས་བཤད་གཞུང་བརྒྱ་སྨྲ་བའི་ངག།
ཐོགས་མེད་འཇོ་བའི་དགའ་སྟོན་སྩོལ།།
རབ་གསལ་རླུང་གི་རྒྱལ་མཚན་རྗེས་འགྲོ་འཇམ་མཉེན་ལྷ་གོས་སྣ་ཚོགས་ཀྱིས་ཀླུབ་གང་གི་སྐུ།།
སྒྲ་དབྱངས་སྟོང་གིས་གཅིག་ཏུ་སྤ་བའི་ཁྱེད་གསུང་འགགས་མེད་ནཱ་དའི་རང་གདངས་ཚངས་པའི་དབྱངས།།
ཟབ་དང་ཞི་བ་སྤྲོས་པའི་ཆོས་ཀུན་རིང་དུ་སོང་བའི་ཁྱོད་ཐུགས་འོ་མའི་རྒྱ་མཚོ་འདྲ།།
བྱམས་བརྩེའི་བདག་ཉིད་སྒྲ་དབྱངས་ལྷ་མོའི་གསང་གསུམ་ཡོན་ཏན་མ་ལུས་གཅིག་བསྡུས་བདག་ལ་སྩོལ།།
རྒྱ་ཆེན་ཤེས་བྱའི་མཁའ་ལམ་དུ།།
ཐོགས་མེད་རྒྱུ་བའི་མཁྱེན་གཉིས་ཀྱི།།
སྒྲིབ་བྲལ་ཉི་ཟླ་ཤར་བ་དང་།།
ཆབས་གཅིག་འགྲོ་བློའི་མུན་སེལ་ཤོག།
དེ་མ་ཐོབ་ཀྱི་ཚེ་རབས་ཕྲེང་བ་ཀུན།།
དཔལ་མོ་ཁྱེད་ཀྱིས་བརྩེ་བས་རྗེས་བཟུང་སྟེ།།
རྒྱལ་བསྟན་སྐྱོང་བར་ནུས་པའི་གཟུངས་སྤོབས་ཀྱི།།
བློ་གྲོས་གསལ་བའི་དགའ་སྟོན་འབྱོར་གྱུར་ཅིག།
འདིར་འབད་ལེགས་བྱས་ཡན་ལག་བརྒྱད་ལྡན་ཆབ།།
དུས་གསུམ་སྲས་བཅས་རྒྱལ་བའི་ཡོངས་བསྔོས་མཚོར།།
རོ་གཅིག་འདྲེས་ཏེ་མཁའ་མཉམ་ཡིད་ཅན་ཀུན།།
སྲིད་པའི་སྐོམ་པ་མ་ལུས་ཞི་བྱེད་ཤོག།