ཉིན་གཅིག་དཀའ་ལས་རྒྱག་པའི་དོན་སྒོ་ནི། །
ཉིན་གཅིག་ཕོ་བ་རྒྱགས་པ་ཆོག་ཤེས་ཀྱང་། །
ལྟོ་ཐུན་གསུམ་གྱི་སེམས་ཁྲལ་མེད་པའི་ཚེ། །
ལྟོ་བ་མིན་པའི་རྒྱབ་ཀྱི་གྱོ ན་གོས་དྲན། །
མགོ་ལུས་དར་དང་གོས་ཆེན་གཡོགས་ཟིན་ཡང་། །
མགོ་བོ་བཀྱགས་ཚེ་སྡོད་ཁང་དམའ་བར་མཐོང་། །
ཡིད་འོང་བཀོད་ལེགས་ཁང་བཟང་མཛེས་ན་ཡང་། །
ཡིད་འོང་ཆུང་མ་མ་རྙེད་ཡིད་རེ་ཕམ། །
ཕྱི་ནང་འཇམ་པའི་ཆུང་མས་བསྐོར་ན་ཡང་། །
ཕྱི་རུ་འགྲོ་པའི་རྟ་ཕོ་མེད་དོགས་སྡུག །
ཁ་སྲབ་ཅན་གྱི་རྟ་ཕོར་གོང་བུད་ཚེ། །
ཁ་བཀོད་བྱེད་སའི་འཁོར་གཡོག་མེད་པས་སྡུག །
དབང་པོ་གསལ་བའི་གཡོག་འཁོར་འཛོམས་ན་ཡང་། །
དབང་ཆ་མེད་པས་གཞན་གྱིས་བརྙས་དོགས་སྡུག །
དཔོན་ཆུང་བསྡད་ནས་ལོ་ཕྱེད་མ་སོང་བར། །
དཔོན་གནས་དམའ་བས་སྟོབས་ཤུགས་ཉམས་དོགས་སྡུག །
རྒྱལ་དོན་གཉེར་བའི་བློན་ཆེན་གྲལ་ཚུད་ཀྱང་། །
རྒྱལ་པོའི་ཁྲི་ལ་འགྲམ་ཆུ་ལྷག་པར་ལྡང་། །
ནམ་ཞིག་གསེར་ཁྲི་སེར་པོའི་གོང་ནོན་ཀྱང་། །
ནམ་ཡང་འཆི་མེད་ལྷ་ཡི་འཚོ་བ་དྲན། །
ནམ་མཁའི་དབྱིངས་ནས་གནམ་སྐས་རྐྱོང་བའི་ཚེ། །
ནམ་དུས་ལྟ་བའི་གཤིན་རྗེ་ཆོས་རྒྱལ་ཁྲོ། །
མི་འདིའི་ཚེ་ཚད་ཏག་ཏག་མ་རྫོགས་ན། །
མི་ངན་འདི་འདྲ་གནམ་དུ་བསླེབས་ཟིན་ཡང་། །
ད་དུང་དམའ་བོ་ཡིན་སྣང་འཆར་ངེས་པས། །
ད་ནི་མ་འགྱངས་མྱུར་བར་ཁྲིད་ཤོག་གསུངས། །
འདོད་ཆགས་རང་བཞིན་འཇིག་རྟེན་འདི་ལ་འདོད། །
འདོད་པ་མ་ལུས་གང་བའི་དུས་མེད་འདོད། །
འདོད་ཆུང་ཆོག་ཤེས་བདེ་བ་ཀུན་གྱིས་འདོད། །
འདོད་དགུ་འཛོམས་པའི་མི་ཚེ་བསྐྲུན་བར་འདོད། །
མི་ཡི་མི་ཚེ་ཚེ་ཡི་ཁྲལ་ཡིན་ཞིང་། །
མི་ཚེ་ཧྲིལ་པོར་འདོད་པའི་ཁྲལ་དུ་སྐྱེལ། །
མི་ལུས་རིན་ཆེན་སྡུག་བསྔལ་གླིང་དུ་ཟད། །
མི་ཡི་གཟུགས་ཙམ་འཛིན་ལ་སྙིང་པོ་ཅི། །