གྲོགས་སྐལ་བཟང་ཚེ་བརྟན་ལ་སྤྲིངས་པའི་བརྩེ་འཕྲིན་དང་པོ།
　　　　སྦྲང་དཀར་རྩམ་པའི་བཅུད་ཀྱིས་གསོས་པས་བོད་པའི་བུ་ལོའི་གཤིས་ཀ་འཇམ།།
　　　　སྟག་ཆུ་སྔོན་མོའི་ཆབ་ཀྱིས་བསྐྱངས་པས་ཨ་མཆོག་བུ་ལོའི་གསུང་སྐད་སྙན།།
　　　　བདེ་མོའི་ཐང་དུ་ཆུང་ནས་འགྲོགས་པས་གྲོགས་བཟང་བུ་ལོའི་ཕྱི་ཐག་རིང་།།
　　　　ཨེ་མ་བདག་ཡིད་པདྨའི་དཀྱིལ་འཁོར་ལ་ནི་ཁྱོད་ཉིད་ཟེའུ་འབྲུ་ལགས།།
　　　　མི་སྙན་གཏམ་གྱི་དུག་ཞགས་འཕངས་ཀྱང་སྟག་ཤར་གཞོན་ནུའི་ཁོག་རྒྱ་ཡངས།།
　　　　མི་འདོད་སྡུག་བསྔལ་བཙོན་དུ་ཚུད་ཀྱང་སྟག་ཤར་གཞོན་པའི་སྤོབས་པ་མཐོ།།
　　　　ལས་ཀྱི་ལྷ་མོའི་ཕྱི་མིག་བར་ནས་སྟག་ཤར་རྒྱ་ལོའི་བརྩེ་དུང་ཟབ།།
　　　　གྲོགས་ཀྱི་དྭངས་མ་ཁྱོད་ཉིད་མེ་ཏོག་སྣ་ལྔའི་གངས་རྒྱན་པདྨ་ལགས།།
　　　　དགུན་གསུམ་ཁ་བ་དཀར་པོས་རི་ཀླུང་གཡོགས་དུས་གྲོགས་ཁྱེད་སློག་པ་བཞིན།།
　　　　དབྱར་གསུམ་སེར་ཆེན་མེ་ཏོག་སྡུག་གུར་བཀྲ་ཚེ་གྲོགས་ཁྱོད་ཨ་རེ་དགའ།།
　　　　དཀའ་སྡུག་འདྲེས་མའི་ལོ་ཟླའི་འཕྲེང་ཞགས་སྐེ་ལ་བསྐོན་པས་ཆུང་ནས་འགྲོགས།།
　　　　ཆུང་ཆུང་བྱིས་པའི་རྩེད་ར་ཟླུམ་པོའི་ལང་ཚོའི་འགྱུར་ཁུགས་དྲན་ལགས་སམ།།
　　　　ཐང་དཀར་རྒོད་པོའི་གཤོག་རླབས་བར་ནས་བྲག་དམར་ཐེམ་གྱི་མགོན་པོ་ཁྱོད།།
　　　　འབྲོང་རྒོད་དར་མའི་རྭ་རྩེ་འོག་ནས་ཕ་ས་སྨུག་པོའི་རྒྱུད་བདག་ཁྱོད།།
　　　　སྐྱ་རེངས་བུ་མོའི་འཛུམ་མདངས་གསེབ་ནས་ཞོགས་པའི་ཉི་བསུ་སྐྱ་མདའ་ཁྱོད།།
　　　　དུས་རབས་གསར་པའི་གར་སྟེགས་སྟེང་ནས་བླ་མེད་དར་ཆ་མཐོར་སྒྲེངས་ཤོག།
　　　　གཡོ་དང་སྒྱུ་མའི་མཐུ་མེད་ངང་རྒྱུད་གཤིས་ཀ་པདྨའི་མདའ་ལས་དྲང་།།
　　　　རྫུན་དང་ཁ་མཆུའི་ལྕེ་མེད་ཡ་རབས་གཞུང་རྒྱུད་སྨྱུག་མའི་མདའ་ལས་དྲང་།།
　　　　མ་ཤི་གསོན་བྲལ་སྟག་ཆུ་སྔོན་མོའི་ཕ་རོལ་ཚུར་རོལ་སྙིང་གི་གྲོགས།།
　　　　བརྩོན་པའི་ཅང་ཤེས་རྟ་ཕོར་བཅིབས་ཤིང་ཤེས་རིག་ངར་སྐད་སྒྲོག་བཞིན་ཤོག།