ཀྭ་ཡེ་གསོན་དང་གངས་ཕྲུག་གཞོན་ནུ་ཚོ།།
ཁ་བ་བོད་པ་ཚང་གི་བུ་ཡིན་ན།།
ག་ས་གང་ནས་ཕ་སྐད་གཙང་མ་ཤོད།།
ང་ཡི་སེམས་ཀྱི་གཏམ་འདིར་ཉན་རྒྱུ་ཡོད།།
ཅ་ཅོ་འདུ་འཛི་ཆེ་བའི་དུས་རབས་འདིར།།
ཆ་ལུགས་དག་མོའི་བོད་མི་ཉུང་ཤས་ཡིན།།
ཇ་ཆང་ལོངས་སུ་སྤྱོད་ནས་མི་འདུག་པར།།
ཉ་ཉོག་མིན་པའི་རིག་གནས་སློབ་པར་བརྩོན།།
ཏ་ལེན་ཁུར་ནས་སྤྲང་པོ་མི་བྱེད་ན།།
ཐ་ཆད་རང་གཤིས་དོར་ནས་སློབ་གྲྭར་ཤོག།
ད་སྐབས་ཉེར་མཁོའི་རིག་གནས་མ་བསླབས་ན།།
ན་མཉམ་གྲོགས་པོའི་གྲས་ནས་ངོ་རེ་ཚ།།
པ་ཏྲའི་རི་མོ་བསྣོལ་འདྲའི་གངས་ལྗོངས་ནས།།
ཕ་མའི་སྙིང་གཏམ་དྲོན་མོ་སེམས་ལ་འཛིན།།
བ་རྒྱའི་དྲ་མིག་ནང་ལ་མི་འཛུལ་བར།།
མ་ཡུམ་སློབ་གྲྭ་ནང་ནས་རིག་གནས་སྦྱོངས།།
ཙ་རི་གངས་འདབས་བརྒྱུད་ནས་མཉམ་དུ་འགྲོ།།
ཚ་གྲང་བཀྲེས་སྐོམ་ཆེ་རུང་དཀའ་བ་སྤྱོད།།
ཛ་ཏི་མེ་ཏོག་ཇི་བཞིན་གཞོན་དུས་འདིར།།
ཝ་ལེར་མ་འདུག་ཤེས་བྱ་བསླབ་ཏུ་འགྲོ།།
ཞྭ་མོ་ཟུར་གོས་བྱས་ནས་འདུག་ཁོམ་མེད།།
ཟ་འཐུང་གླེང་ནས་དུས་ཚོད་བརླག་ཁོམ་མེད།།
འ་ཅག་སློབ་མ་ཞིག་གི་སྤྱོད་ཚུལ་འཛིན།།
ཡ་རབས་སྐྱེ་བོ་རྣམས་ལ་མིག་དཔེར་བལྟ།།
ར་རོ་ལྟ་བུའི་སྤྱོད་པ་རིང་དུ་སྤང་།།
ལ་ལུང་ཉུལ་བའི་སྲོལ་ངན་རྒྱང་ལ་འདོར།།
ཤ་ཞེན་ཆེན་ན་རང་རིགས་དར་བར་འབུངས།།
ས་ཕྱོགས་གང་ནས་བསྡད་རུང་ཤེས་བྱ་སྦྱོངས།།
ཧ་ཅང་མི་མཐུན་ཚིག་གི་ཕྲེང་བ་འདི།།
ཨ་མའི་ཨོ་ལོ་དག་གི་སྙན་དུ་སྤྲིངས།།