༡
　　སྦྲ་ནག    དུས་བཞིའི་རྡུང་རྡེག་བཟོད་སྒོམ་བསྐྱལ་བའི་ལྷག་བསམ་ཞིག
　　སྦྲ་ནག   ལོ་བརྒྱའི་འདོད་འདུན་རྫ་སུལ་ནས་འབུས་པའི་སྙིང་སྟོབས་ཤིག
   སྦྲ་ནག་ལགས།   ཁེར་རྐྱང་གི་གཏམ་རྒྱུད་སྨུག་པོ་ཡ།
   བསམ་གཞིགས་གིས་སྦར་བའི་ཐ་མག་གི་ཚེ་འབར་ཡོད་ཚད་ཁྱེད་ཀྱི་དོན་སྦར་ལ།
དྲན་གདུང་གིས་ཟོས་ཚར་བའི་སྙིང་ཆུང་གི་ཚེས་རིས་ཀྱང་ཁྱེད་ཀྱི་སླད་དུ་འཚེར།ང་རང་ཁྱེད་ཀྱི་ཐུ་འོག་ནས་མུ་མེད་བྱང་ཐང་ལ་འཁྱར་བས།ཡང་བསྐྱར་ས་མཐའི་འཁྱམ་མྱུལ་ལས་ཁྱེད་ཀྱི་ཐུ་འོག་ལ་ལོག་འོས།
                      ༢
      སྤྲེའུའི་སྙིང་རྗེ་དང་སྲིན་མོའི་གཏུམ་དྲག་ཡར་ཀླུང་ནས་འབྲོང་རྒོད་ཀྱི་རྭ་བར་ལ་བཏབ་ཅིང་འབུས་པས།པོ་ཏ་ལའི་རྒྱ་ཕིབས་གོ་ལའི་ཡང་རྩེ་ནས་ཉི་ཟླའི་འོད་ཁྱིམ་ལ་འཕགས་ཤིང་།ཁྱེད་རང་མཐོ་སྒང་གི་རྫ་སུལ་ནས་འཚར་ལོངས་བྱུང་།
      ཁྱེད་ཀྱི་ཆོན་ཐག་གི་ཕྱག་རྒྱས་སུམ་གཉིས་ས་ལ་མཐའ་མཚམས་དབྱེ་དུས།ཁ་ཚུབ་ཀྱི་མཐོངས་ལམ་མེ་ཏོག་གི་ཆར་བས་ནམ་རྒྱུན་བརླན་ལ།འཇིག་རྟེན་ཟླུམ་པོའི་ཧམ་རློམ་གྱི་རྨི་ལམ་ཇི་འདྲའི་མང་པོ་ཞིག་དཀྲོགས་ཡོད་ཨང་།
     ཁྱེད་ཀྱི་བྱུང་བ་ནི་བསྒྱུར་བཅོས་དང་གསར་གཏོད་ཀྱི་དཀྱོགས་མཚམས་ཤིག་གི་རྡོ་རིང་སྟེ།ཁྱེད་ཀྱི་རྟོགས་བརྗོད་ནི་ཉི་ཟླའི་མིག་ལམ་ན་ཆེས་མཚར་སྡུག་ལྡན་པའི་འཕར་བགྲོད་ཀྱི་ཟིན་ཐོ་ལགས།
                           ༣
     ལྷ་སྲས་ཀྱི་དབུ་ལ་གླང་རྭ་བཙུགས་ཤིང་སྐྱེས་པས།པོ་ཏ་ལའི་རྡོ་སྐས་ཀྱི་ཚ་དྲོད་འཇགས་ཤིང་།ཁྱེད་དང་ཁྱེད་ཀྱི་འཇིག་རྟེན་གྱི་འཁོར་སྐྱོད་ལ་རེ་ཞིག་རྫོགས་ཚིག་བྲིས།
 དེ་ནས་བཟུང་།ཕ་སྤུན་གྱི་ལྷས་ནས་འཕར་སྤྱང་གིས་རྒྱལ་ཕམ་འབྱེད་དུས།སྲབ་ལ་དོག་པའི་ཁྱེད་དང་།རྫ་སྒང་གི་གཉེར་རིས་སུལ་ནས་ལྷགས་རླུང་གིས་ཧྲལ་ཧྲུལ་ཟོས།
                     ༤
   ཁྱེད་རང་འོད་སྣང་ལ་དུངས་དྲགས་པས།འཇིག་རྟེན་གྱི་ཡང་རྩེར་སྐོམ་གདུང་གོ་གོམ་འགྲོས་འཁྱོར།
 ཁྱེད་རང་བདེ་དྲོད་ལ་ཞེན་དྲགས་པས།ཁ་ཆར་བུ་ཡུག་ཁྲོད་བཟོད་སྒོམ་དང་སྙིང་རྗེ་འཕྱོ།
 ཉི་ཟླ་དང་ཆེས་ཉེ་ས་ནི།ཡོད་ཚད་ཉིན་སྲིབ་མེད་པའི་འོད་སྣང་དང་བདེ་དྲོད་ཀྱི་ཤམ་བྷ་ལ་ཡིན་འོས་ལ།འབྲོང་གཡག་གི་སྤུ་ཉག་རེ་རེའང་གསེར་མདོག་གི་རྟོགས་བརྗོད་རེ་རེ་ཡིན་འོས་ཨང་།
                    ༥
 གཏམ་རྒྱུད་ལ་གསང་ཚིག་མང་ཞིང་ཐོབ་ཤོར་གྱི་འཕར་ཆག་སྐྱེན་པའི་ཁྱེད་རང་།མ་གཞི་ནས་དོ་མི་མཉམ་པའི་གཏམ་རྒྱུད་ཅིག་གི་སྔོན་འགྲོའམ་མཇུག་བྱང་གང་རུང་ཡིན་ནམ།
  དར་ཧྲུལ་བཞིན་ལ་ཁར་བཙུགས་པའི་རྫི་བོ་བྱིས་པ་གྲངས་མེད།
 ཡིག་དྲུག་གི་ཟློས་བརྗོད་བར་ན་སྐྲ་ལོ་ཁ་བས་བཀྲུས་པའི་ཨ་མ་རྣམས།
 འདམ་ལྕིའི་བཞོ་དབྱངས་ཁྲོད་ན་སྡུག་ཡུས་གཞས་ལ་འགུགས་པའི་སྨན་ཤར་ཚོ།
 རྟའི་གོང་ན་དཔའ་སྤོབས་ཀྱིས་འཕྱོ་ཞིང་ལྷུང་བའི་སྟག་ཤར་ཡོད་ཚད།
 ད་དུང་བྱང་ཐང་ནས་བྱང་ཐང་འགྲིམ་པའི་རི་སྤྱང་འཁྱམ་པོ་དག
 སྦྲ་ནག་ལགས།ཡོད་ཚད་ཁྱེད་ལས་མཆེད་པའི་གཏམ་རྒྱུད་ཀྱི་མེ་ལྕེའམ་རྒྱས་བཏབ་པའི་སྤྱི་འགྲོས་ཨེ་ཡིན།
                          ༦
 ཁང་རྩེག་གི་ནགས་ཀློངས་སྟུག་པོའི་ཕུན་ཚོགས་ལ་ཅེར་ནས།ཁྱེད་ཀྱི་སྐྱུར་ཞིང་དོག་པའི་གཏམ་རྒྱུད་ལ་ཉན་ཐེངས་རེ་དང་།གླེགས་བམ་གྱི་ཉིན་སྲིབ་བར་ནས་བསམ་གཞིག་གི་མེ་ལྕེ་སྐོམ་གདུང་གི་མིག་ལ་འཐུང་ཐེངས་རེར།ཁྱེད་ཀྱི་ཕྱིར་དུ་ཁྱེད་དང་གྱེས་ཤིང་ཁྱེད་ཀྱི་རྐྱེན་པས་དབུལ་ཞིང་ཕོངས་པའི་སེམས་པ་འཁྱམས་པོ་གང་མང་ཞིག་ཐལ་བར་བསྲེགས་ཡོད་ཨང་།སྦྲ་ནག་ལགས།
            ༧
 ཁྱེད་ཀྱིས།དུས་རབས་ཀྱི་སོར་རྩེར་སྦྲུམ་པའི་ཟླ་གཞོན་སྒོར་མོ་དེ་པང་ལ་ཤོག་དང་།ང་ཡིས།ཁྱེད་ཀྱི་ཆག་གྲུམ་ཤོར་བའི་གསེར་མདོག་གི་གཏམ་རྒྱུད་ཟླུམ་པོ་དེ་སྒུག་ལ་འོངས།
   དུས་དེར།རྒྱུ་སྐར་ཚོམ་བུར་བཀྲ་བའི་ནམ་མཁའ་འདི་ཇི་འདྲའི་ཞིང་གཡའ་དག      གཡུ་ལོ་ཐགས་སུ་བྲེས་པའི་རྩྭ་ཐང་འདི་ཇི་འདྲའི་ལྗང་ཞིང་རྒྱ་ཆེ།
　　ཁྱེད་དང་ཁྱེད་ཀྱི་གཏམ་རྒྱུད་ཀྱང་དེ་བཞིན…  …