༡
རང་ཡུལ་ནས་རྙེད་པའི་མི་ལོང་ཆག་རོ་དེའི་ངོས་སུ
ཁྱེད་ཀྱིས་འཛུམ་ཙམ་བྱས་ནས་ཡུན་རིང་བལྟས་ནའང
གཉེར་མས་ཁེངས་པའི་ང་རྒྱལ་གྱི་མགོ་བོ་དེ
ཆུ་ཐིགས་བཞིན་ས་སྟེང་དུ་ཟགས་ནས་རིམ་བཞིན་མི་སྣང་བའི་ཚོར་བ་ཞིག་སྐྱེས་བྱུང
ཨོ།  ལོ་ན་བགྲེས་པའི་ཕུན་ཚོགས་དབང་རྒྱལ
　　　　　༢
ལོ་ངོ་འདི་དག་ལ།ཁྱེད་ཀྱིས་རང་གི་ཁང་བའི་ཕྱི་རོལ་ཏུ
འབུ་སྲིན་བཞིན་འགུལ་བའི་རྣམ་ཤེས་ཀྱི་ཚོགས་ལ་ཅེར་ནས
“མི་རྟག་པ།མི་རྟག་པ།”ཟེར་བའི་དོན་སྙིང་ཅི་ལ་མེད།
　　　　༣
མངར་ཇ་ཧུབ་རེ་དང་མཉམ་དུ་ང་ཚོས་བརྗོད་བྱ་མང་པོ་ཞིག་ལབ་ནས
བོད་ཅེས་པའི་རིགས་རྒྱུད་འདིའི་རྒྱུ་མཚན་སྨྲ་རུ་མེད་པ་དེ་དག་ཡིད་ལ་དྲན་ཐེངས་རེར
ཁྱེད་ཀྱི་ཤ་ཁྲག་གི་རི་རབ་དེ་ལ་ས་འགུལ་ཆེན་པོ་ཞིག་རྒྱུགས
(རི་བོང་གི་རྣ་ཅོག་དང་འདྲ་བའི་སྲང་ལམ་གྱི་གློག་ཞུ་དེ་དག་བཀར་རྗེས
བོད་སྤོས་ཀྱི་དྲི་མས་ཁེངས་པའི་ཁང་མིག་དེའང
ཁྱེད་ཀྱི་སྐྲ་ལོ་ནང་བཞིན་ཡོངས་སུ་དཀར་བོར་གྱུར་སོང)
　　　　༤
ང་འགྲོ་རན་པའི་དུས་ཚོད་དེ་ལ།  དབུལ་ཕོངས་ཀྱིས་ཡོངས་སུ་མནར་བའི་སྡེ་བ་ཞིག་ལྟར
པེ་ཅིང་གི་མཚན་མོ་འདི།སྐོམ་པས་གཟིརབའི་སེང་གེ་ཞིག་དང་ཡེ་ནས་མི་འདྲ་བར
མིག་ཆུའི་རྡོག་པ་བར་མེད་དུ་གཏོང་གྱིན་པའི་ཡུགས་ས་མ་ཞིག་གི
རྒྱབ་ལྗོངས་ལས་ཡིད་ལ་གཞན་ཞིག་དྲན་གྱི་མི་འདུག
       ༥
བོད་ལ་དབང་བའི་ཕུན་ཚོགས་དབང་རྒྱལ།
ད་དུང་མང་པོ་ཞིག་བརྗོད་འདོད་སྐྱེས་རུང་མགྲིན་པ་འགག་ནས་སྐད་ངག་མེད་ཀི
མངོན་སུམ་མམ་རྨི་ལམ་གང་ཡིན་མི་ཤེས་པའི་དགུན་དུས་འདིའི
ཁེར་རྐྱང་དུ་འགྲོ་བའི་ལམ་ཁར
ཕྱི་རོལ་གྱི་ཁ་བ་ཞུས་ནས་ཆུ་ཕྲན་གྱ་གྱུ་ཞིག་ཏུ་གྱུར་འདུག
ངས་ཉིན་མོ་འདི་བརྗེད་མི་ཐུབ་པ་ཤེས་བྱུང་།