ཀྭ་ཡེ་ཚུར་ལ་ཉོན་དང་ང་ཡི་གྲོགས་པོ་ཚོ། །
ཁ་ཙམ་མ་ཡིན་སྙིང་གི་གཏམ་ཞིག་ང་ཡིས་བཤད། །
ག་ཤེད་བུ་རྒོད་ཅིག་གིས་ཅིག་དེ་བསད་དོ་ཞེས། །
ང་རྒྱལ་ཁོང་ཁྲོ་དང་བཅས་བསྟོད་དེ་སྒྲོག་པ་དང་། །
ཅ་ལག་ཁབ་སྐུད་ཙམ་ཡང་གསར་སྐྲུན་མི་ནུས་ཀྱང་། །
ཆ་མེད་ཕྱི་རྒྱལ་བ་ཡི་གཏམ་ལ་མགོ་འཁོར་ཏེ། །
ཇ་ཁང་ཆང་ཁང་དུ་ཡང་སྨྱོ་གཏམ་འབའ་ཞིག་བཤད། །
ཉ་ཉོག་ངོ་མའི་བྱ་སྤྱོད་འདི་ཚོ་ཀྱེ་མ་ཧོ། །
ཏ་ཐཱ་ག་ཏར་དད་ཅེས་ཡང་ཡང་སྒྲོག་ན་ཡང་། །
ཐ་ཤལ་བྱ་བ་ཁོ་ན་དོན་དུ་གཉེར་བ་ལས། །
ད་ལྟ་དམ་ཆོས་ངོ་མ་སྒྲུབ་མཁན་སུ་ཞིག་འདུག །
ན་ནིང་ད་ལོ་ང་ཚོ་ཚང་མ་རུལ་ཏེ་སོང་། །
པ་བ་གཉིས་ཀྱི་སྒྲ་གདངས་ཙམ་ཡང་མི་ཤེས་བཞིན། །
ཕ་བཟང་བུ་ནི་ང་ཚོ་ཡིན་ཞེས་ཀྲོག་གཏམ་བཤད། །
བ་ལུ་བེའུ་འཁྱོག་འདྲ་བའི་མི་ངན་ཁོ་ན་སྟེ། །
མ་རབས་འདི་ཚོ་མཐོང་ཚེ་ནམ་ཡང་སྙིང་རེ་འཁྱགས། །
ཙ་རིར་གནས་སྐོར་སོང་ན་ལ་རྒྱ་ཉིད་དུ་སྒྲོག །
ཚ་གྲང་མི་སྙོམས་རྐྱེན་ནི་ལྷ་ཀླུ་འཁྲུགས་སོ་ལོ། །
ཛ་རེ་ཛོ་རེ་ཅི་བསམ་གང་འདོད་བཤད་པ་སྟེ། །
ཝ་ཁ་དགྲ་འབོད་མི་ཡིས་འཕྱ་སྨོན་བྱེད་ལ་ལྟོས། །
ཞ་བོ་ཞ་རར་འཕྲད་ཀྱང་ཡེ་ནས་མི་གཟུར་ཞིང་། །
ཟ་རྔམ་ཆེན་པོས་གཉོམ་ཆུང་ཚང་མ་བཙན་གྱིས་ཟ། །
འ་ཅག་ད་ལྟའི་གནས་བབ་ངོ་མ་ཧ་ཅང་བཙོག །
ཡ་གིའི་ལྷ་ལ་མིག་ཅིག་ཡོད་ན་རན་ཏེ་འདུག །
ར་བ་རི་སྐོར་ཕན་ཚུན་མི་མཐུན་རྩོད་པ་སོགས། །
ལ་ལུང་ཀུན་དུ་དར་ཞིང་མཆེད་དེ་འགྲོ་བཞིན་པས། །
ཤ་ཚ་སྙིང་རྗེ་ཅན་གྱི་མི་རེ་མཆིས་གྱུར་ན། །
ས་གནས་བཅོས་སྐྱོང་ཆེན་པོ་བྱས་ན་དགའ་ངེས་སོ། །
ཧ་ཅང་དྲང་པོར་བརྗོད་པའི་ང་ཡི་གཏམ་འདི་ལ། །
ཨ་མཚར་བསམ་ནས་ལྟོས་དང་ཕན་ཐོགས་ཡོད་ནི་སྲིད། །