བརྗིད་ཆགས་གཟི་དཔལ་ཕྱུག་པའི་ཇོ་མོ་ཡི་གླང་མ། །
སྤྲིན་གྱི་བང་རིམ་གཏོར་ནས་མཁའ་དབྱིངས་ལ་ཟུག་འདི། །
ཉེར་གཅིག་དུས་རབས་གསར་པའི་གངས་ཅན་གྱི་བོད་ཕྲུག །
སྔར་མེད་གསར་གཏོད་བྱེད་པའི་སྙིང་སྟོབས་ནི་ཡིན་ནོ། །
 
ཟབ་ཡངས་གཏིང་མཐའ་བྲལ་བའི་མ་ཕམ་གྱི་གཡུ་མཚོ། །
གཡའ་དག་མེ་ལོང་ཕྱི་འདྲའི་དྭངས་གཙང་གི་མདངས་འདི། །
ཉེར་གཅིག་དུས་རབས་གསར་པའི་གངས་ཅན་གྱི་གཞོན་ནུས། །
ཁ་བའི་ལྗོངས་ལ་འཆང་བའི་དུང་སེམས་ནི་ཡིན་ནོ། །
 
གཡུ་འབྲུག་སྔོན་མོ་འཁྱུག་འདྲའི་ཁྲི་ཤོར་གྱི་རྒྱལ་མོ། །
ལྷང་ལྷང་མཁའ་དང་མཉམ་པའི་རྦ་རླབས་དེ་འཕྱོ་འདི། །
ཉེར་གཅིག་དུས་རབས་གསར་པའི་གངས་ལྗོངས་ཀྱི་གཞུན་ནུས། །
མཐུན་སྒྲིལ་རྡོག་རྩ་གཅིག་པའི་ཀི་སྒྲ་ནི་ཡིན་ནོ། །
 
བང་རྩལ་ཉམས་འགྱུར་རྫོགས་པའི་ཅང་ཤེས་ཀྱི་རྟ་ཕོས། །
རྨིག་སྒྲས་གནམ་ས་དཀྲོགས་པའི་འཁྱུག་རྩལ་འདི་ངོམ་པ། །
ཉེར་གཅིག་དུས་རབས་གསར་པའི་གངས་ལྗོངས་ཀྱི་གཞོན་ནུས། །
ལྔ་རིག་ཐང་ཆེན་སྐྱོད་པའི་གོམ་སྒྲ་ནི་ཡིན་ནོ། །