གཅིག
རླུང་དམར་མ་ལྡང་སྔོན་ལ་ཕ་གིའི་ཉག་ག་གན་ནི་འབྲོང་ཞོགས་ས་ཞིག་རེད
དེ་རིང་བདག་གི་ཨ་མྱེས་ཉག་ག་གན་ལ་ཅེར་ནས་འབྲོང་ཟེར་བའི་རི་དྭགས་ཤིག་དྲན་གྱིན་འདུག
འབྲོང་གིས་རྨིག་བརྫིས་བྱས་མྱོང་བའི་གཡའ་རྡོ་དང་སྤང་རྒོད་དེ་དག
དེ་དག་དེ་རིང་སུ་ཞིག་གིས་ས་སྙོམ་རྡོ་སྙོམ་བྱས་ནས་ཕྱི་སྲོག་ནང་སྲོག་བཅད་ཚར་ན
ལོ་མང་པོ་མང་པོའི་སྔོན་གྱི་འབྲོང་ཟེར་བའི་རི་དྭགས་དེ
དེ་རིང་ཁྱོད་ཀྱི་རྐང་འོག་གི་ས་གཞི་འདིའི་འོག་ཁུ་སིམ་མེར་ལུས་སོང་ངམ
རླུང་དམར་མ་ལྡང་སྔོན་ལ་ཕ་གིའི་ཉག་ག་གན་ནི་འབྲོང་ཞོགས་ས་ཞིག་རེད
དེ་རིང་བདག་གི་ཨ་མྱེས་ཉག་ག་གན་ལ་ཅེར་ནས་འབྲོང་ཟེར་བའི་རི་དྭགས་ཤིག་དྲན་གྱིན་འདུག
དེ་རིང་ཉག་ག་གན་ནས་མཐོང་ཐུབ་པ་ནི་གཞུང་ལམ་དང་ཨར་འདམ་གྱི་གློག་སྡོང་དེ་ཚོ་ལས
ཉི་ཟླ་རྭ་བར་དུ་འཁུར་མྱོང་བའི་འབྲོང་རྒོད་ཀྱི་ཁྱུ་དག་དེ་རིང་མཐོང་རྒྱུ་མི་འདུག
                                  གཉིས།
འབྲོང་ནི་སུས་ཀྱང་སྒོ་ཟོག་བྱས་མ་མྱོང
འབྲོང་ནི་སུས་ཀྱང་བྲན་གཡོག་ལྟ་བུའི་སྒོ་ཟོག་བྱེད་མ་ཐུབ
འབྲོང་ལ་སྣ་ལོ་མེད་པས་འབྲོང་ལ་བྲན་གཡོག་གི་འདུ་ཤེས་མེད
འབྲོང་ནི་རང་གཤིས་ཧ་ཅང་མཁྲེགས་པོ་ཅན་ཞིག་ཡིན
འབྲོང་ནི་གཉའ་གནོན་དང་བཙན་འཛུལ་ལ་སྡང
འབྲོང་ནི་ལག་དམར་གྱི་ལུས་སྟེང་དུ་བྲོ་འཁྲབ་མཁན་ཞིག་རེད
འབྲོང་ནི་ལག་དམར་ལྕེ་ལྡག་བྱས་ནས་གསོད་མཁན་ཞིག་རེད
འབྲོང་ནི་ལྐོག་རྒྱུག་བྱེད་མཁན་ཞིག་མིན
འབྲོང་ནི་རྔོན་པའི་བོའུ་མཆུར་གདོང་གཏད་ནས་རྒྱུག་མཁན་ཞིག་རེད
འབྲོང་ནི་རང་གཤིས་སྐྱོབ་ཆེད་སྲོག་བསྡོས་ཀྱིས་གཡང་ལ་ལྕེབས་པའི་སྟ་གོན་ཡོད་
མཁན་ཞིག་རེད
སྒོ་ཟོག་ལྟར་སྐེ་བསྡམས་ནས་སྡུག་ཤི་རྒྱག་པའི་ལས་དེ་འབྲོང་གིས་མྱངས་མ་མྱོང
འབྲོང་ནི་ནང་ཁུལ་ལ་མཐུན་སྒྲིལ་དམ་པོ་ཡོད་པས
འབྲོང་ནི་རང་གི་སྤུན་ཟླ་རྨས་ན་དེར་དགྲ་ཤ་ཨེ་ལོན་བལྟ་མཁན་ཞིག་རེད
འབྲོང་ནི་རང་གི་སྤུན་ཟླའི་རྨ་ཁྲག་ལ་གདུང་འབོད་བྱེད་མཁན་ཞིག་རེད
འབྲོང་ནི་སོང་ས་བསྡད་ས་གང་རུང་དུའང་རང་བཙན་གྱི་རི་དྭགས་ཤིག་རེད
                                     གསུམ།
འབྲོང་ལ་དམར་རྗེན་རྗེན་གྱི་རང་ཉིད་ལས
འབྲོང་ལ“ལགས་སོ”ཞུ་ས་མེད
འབྲོང་ལ་བདག་པོ་མེད
འབྲོང་ལ་གྲལ་རིམ་མེད
འབྲོང་ནི་རང་ཉིད་ལ་བསླུ་བ་མེད་པའི་ཡིད་ཆེས་བྱེད་མཁན་ཞིག་རེད
འབྲོང་གིས་རང་ཉིད་ནི་ས་གཞི་འདིའི་ཁ་ཕོ་དང་ལང་ཚོ་ལོས་ཡིན་སྙམ་ནས
སུ་ལའང་མགོ་སྒུར་མ་མྱོང
འབྲོང་ལ་མགོ་སྒུར་བའི་གོམས་སྲོལ་ཡེ་ནས་མེད
འབྲོང་ལ་དམར་རྗེན་རྗེན་གྱི་རང་ཉིད་ལས
འབྲོང་ལ་མགོན་སྐྱབས་མེད
འབྲོང་ལ་རྩ་ཁྲིམས་མེད
འབྲོང་ལ་འུར་ལྕག་བཟུང་བའི་རྫི་བོ་མེད
                      བཞི།
གཅེས་སྲོག་གི་ཆེད་དུ   འཚོ་གནས་ཀྱི་ཆེད་དུ
རང་དབང་གི་ཆེད་དུ   སྤུན་ཟླའི་ཆེད་དུ   འབྲོང་གིས་ནམ་ཡང་གྱེན་ལོག་བྱ་རྩིས་ཀྱི་སྟ་གོན་བཅངས་ནས་ཡོད
འབྲོང་ནི་ཁྱོད་ལ་དེ་ལྟ་བུའི་གྱེན་ལོག་བྱ་རྒྱུར་སེམས་ཐག་ཆོད་པོ་ཡོད་ལ
འབྲོང་ནི་ཁྱོད་ཀྱི་དྲག་པོའི་མེ་མདའ་རྣ་རྒྱབ་ཏུ་གཡུགས་མཁན་ཞིག་རེད
བཙན་འཛུལ་དང་གཉའ་གནོན
བཪྙས་བཅོས་དང་བྲན་བཀོལ
འབྲོང་ནི་འགྲོ་བ་མིའི་མདུན་དུ་དེ་དག་ལ་རྒོལ་བ་གཏོང་མཁན་ཞིག་རེད
འབྲོང་ནི་ནམ་ཡང་ཁྱོད་ལ་མགོ་འདོགས་མཁན་གྱི་གྲས་སུ་མི་ཐེ་ཞིང
འབྲོང་ལ་གཉའ་སྒ་བསྟད་མ་མྱོང་བའི་སྒལ་ཚིགས་སྲ་མོ་ཞིག་ཡོད
                                 ལྔ།
ཡུལ་ཁམས་འདི་ན་རང་གཤིས་མཁྲེགས་པོ་ཅན་ཧ་ཅང་དཀོན
འབྲོང་ནི་རང་གཤིས་མཁྲེགས་པོ་ཅན་ཞིག་རེད
འབྲོང་གི་ཤི་རྐྱེན་ནི་འབྲོང་གི་རང་གཤིས་དང་འབྲེལ་བ་ཟབ་མོ་ཡོད
སྤང་ལྗོངས་དང་འབྲོག་སྡེ་འདི་དག་ནུབ་ལ་ཉེ་བའི་སྔ་ལྟས་སུ
རང་གཤིས་མཁྲེགས་པོ་ཅན་གྱི་འབྲོང་ཇེ་ཉུང་ནས་ཇེ་ཉུང་དུ་ཕྱིན
ད་ལྟ་བདག་གིས་འབྲོང་རྭའི་སྒྲ་སྙན་ཟེར་བ་ཞིག་ལས་ཅི་ཡང་ཐོས་ཀྱིན་མེད
དེ་རིང་ཡུལ་ཁམས་འདི་ཁུ་སིམ་མེར་ལུས་འདུག
དེ་རིང་ཡུལ་ཁམས་འདི་ལ་འབྲོང་གི་དྲི་ཙམ་ཡང་མི་བྲོ
དེ་རིང་ཡུལ་ཁམས་འདི་ན་རང་གཤིས་མཁྲེགས་པོ་ཅན་ཧ་ཅང་དཀོན
                        དྲུག
འབྲོང་ནི་ང་རྒྱལ་ལ་དགའ་པོ་ཡོད
དེ་ནི་འབྲོང་གི་ཁ་དོག་གཞན་ཞིག་རེད
འབྲོང་ལ་ང་རྒྱལ་ཡོད་པས་འབྲོང་ལ་བཪྙས་བཅོས་གཏོང་མཁན་ཤིན་ཏུ་ཉུང
འབྲོང་གི་ང་རྒྱལ་རུམ་དུ་བསྡུས་བསྡུས་ལ་ཡོད་ནའང
གང་བསམ་དུ་ཁྱོད་ཀྱི་སྟེང་ལ་རྒྱུག་སྲོལ་མེད
གནད་འགག་ལ་འཕྲད་དུས་འབྲོང་ནི་ངའོ་སྙམ་ནས་སྡོད་ཅིང
ཁྱོད་ལ་འདང་སྤུ་ཙམ་ཡང་མི་རྒྱག་པར
བསམ་ཡུལ་ལས་འདས་པའི་ཨ་ལན་སྟེར་ངེས
གནད་འགག་ལ་འཕྲད་དུས་འབྲོང་གིས་ད་གཟོད་བྲོ་འཁྲབ་ངེས་ཡིན
འབྲོང་གིས་བྲོ་འཁྲབ་པ་ནི་ཁྱོད་ཀྱི་ཐོག་ཏུ་རྒྱུག་རྩིས་ཡིན
སྐུ་ཞབས་ལགས་ལ་ངོ་སྐལ་ཨེན་ཙམ་ཡང་སྦྱིན་མི་སྲིད
འབྲོང་ལ་རང་ཉིད་ལས་ལྷག་པའི་དད་པ་བྱེད་ས་མེད
                        བདུན།
ཁེར་རྐྱང་ནི་དམིགས་བསལ་གྱི་འཚོ་བ་ཞིག་རེད
ཁེར་རྐྱང་དུ་འདུག་མཁན་མང་པོ་མེད
འབྲོང་ལ་མཚོན་ན་ཁེར་རྐྱང་ནི་རྒྱུན་ལྡན་གྱི་འཚོ་བ་ཞིག་རེད
ཁེར་རྐྱང་ནི་གཏུབ་གཅོད་མ་ཐུབ་པའི་རང་གཤིས་ཤིག་ཡིན
ཏག་ཏག་རང་གཤིས་དེའི་དབང་གིས་ཁྱོད་ཉིད་ཁེར་རྐྱང་གི་སྡུག་ལ་གཏད་ནའང
ཁྱོད་ཀྱི་འཚོ་བཞུགས་ནི་ཇི་འདྲའི་གསོན་ཉམས་ཀྱིས་ཁེངས་པ་ལ་ཨང
ཁེར་རྐྱང་ནི་རུས་པ་སྲ་མཁྲེགས་ཅན་དག་ལ་དབང
ཁེར་རྐྱང་ལ་དགའ་བའི་རྐྱེན་གྱིས་ཁྱོད་ལ་དམིགས་བསལ་གྱི་འཚོ་བ་ཡོད་མྱོང
ཁེར་རྐྱང་དུ་འདུག་ཐུབ་མཁན་ག་ཙམ་ཡོད་དམ
རང་གཤིས་ཀྱི་དབང་རྩ་གཏུབ་གཅོད་བྱས་པས
ཁེར་རྐྱང་གི་རྒྱལ་སྲས་ཀྱི་མིང་གིས་འབོད་ས་ཧ་ཅང་དཀོན
འབྲོང་ལ་མཚོན་ན་ཁེར་རྐྱང་ནི་རྒྱུན་ལྡན་གྱི་འཚོ་བ་ཞིག་རེད
                     བརྒྱད།
ས་སྒང་གི་བུ་ཕྲུག་ཏུ་གྱུར་མྱོང་བའི་རྣམ་ཤེས
སུ་ཞིག་གིས་ཁྱོད་ཀྱི་རང་དབང་འཕྲོག
སུ་ཞིག་གིས་ཁྱོད་ཀྱི་བྲང་གཞུང་ཐང་ལ་བསྒོར
འབྲོང འབྲོང འབྲོང
བདག་གིས་མེ་ལོང་གི་ནང་ནས་ཁྱོད་ལ་བལྟས་ཀྱང
བདག་གིས་རྒྱ་གླིང་གི་ནང་ནས་ཁྱོད་བོས་ནའང
ཁྱོད་ཉིད་ཐག་རིང་ཐག་རིང་དུ་ཕྱིན་ཚར
ཁྱོད་ལ་མྱ་ངན་ཞུ་བའི
ཁྱོད་ལ་མིག་ཆུ་གཏོང་བའི
ཁྱོད་ལ་ཕངས་སེམས་ཚད་མེད་སྐྱེ་མཁན་ནི
ཁྱོད་ཀྱིས་རྭ་བར་དུ་ཁུར་མྱོང་བའི་ཉི་ཟླ་ལགས
ཉི་ཟླ་ཁོ་ན་ཧ་ཅང་གཟབ་ནན་གྱི་རྩོམ་སྒྲིག་པ་མ་ཡིན་ནམ
ཉི་ཟླ་ཁོ་ནས་ཁྱོད་ལ་བདེན་དཔང་བྱས་ཆོག
                           དགུ།
ཁྱོད་རང་སྒང་པ་བོད་དང་གྱེས་ནས་ངུར་ཆུང་ལྷང་ལྷང་གིས་བུད་སོང
ད་ལྟ་ཁྱོད་ལ་ཕ་ཡུལ་ཟེར་བ་ཞིག་ཁྱོན་ནས་མི་འདུག
ཕ་ཡུལ་དང་མཇལ་འཛོམས་ཀྱི་ལས་སྐལ་ཡོངས་སུ་ཟད
འདི་ནི་དུས་རབས་ཤིག་མཇུག་བསྡུས་པ་དང་ཁྱད་པར་མེད
དེ་རིང་ཁྱོད་ཀྱི་མགོ་རུས་ས་འོག་ཏུ་ནུབ་འདུག་ནའང
ཁྱོད་ཀྱི་ཕ་ཡུལ་ལ་ན་ཟུག་མེད་པས
ཁྱོད་ཀྱི་མགོ་རུས་ནི་ཡིད་སྐྱོ་བའི་བརྩམས་ཆོས་ཤིག་གོ
ཁྱོད་རང་སྒང་པ་བོད་དང་གྱེས་ནས་བུད་སོང
ཁྱོད་རང་རང་བྱུང་ཁམས་དང་གྱེས་ནས་བུད་སོང
ཁྱོད་རང་རྩྭ་རྩེའི་ཟིལ་བ་དང་གྱེས་ནས་བུད་སོང
ཁྱོད་རང་བདག་གི་སེམས་ཁོང་དང་འབྲལ་མ་ཐུབ
                            བཅུ།
རླུང་དམར་མ་ལྡང་སྔོན་ལ་ཕ་གིའི་ཉག་ག་གན་ནི་འབྲོང་ཞོགས་ས་ཞིག་རེད
དེ་རིང་བདག་གི་ཨ་མྱེས་ཀྱིས་ཉག་ག་གན་ལ་ཅེར་ནས་ཡིད་སེམས་སྐྱོ་སྐྱོ་མཛད་ནའང
འབྲོང་གི་རྗེས་སུ་ཨ་མྱེས་དང་ཨ་མྱེས་ཀྱི་མི་རབས་དེའི་གཏམ་གླེང་གི་རྒྱུན་འཆད་ལ་ཉེ
འགྲོ་བ་མིའི་ཚབ་ཏུ་ཨ་མྱེས་ཀྱིས་འབྲོང་ལ་མྱ་ངན་ཞུ་གིན་འདུག
འབྲོང་ལ་རྗེས་དྲན་བྱེད་མཁན་ཨ་མྱེས་གཅིག་པུ་ཡིན་ནམ
དཔུང་བ་དམར་རྗེན་རྗེན་གྱི་ཨ་མྱེས་ཁོ་ན་ཡིན་ནམ
སྐྱ་ཟད་སྔོ་སྡུག་གི་ཡུལ་ཁམས་འདི་ལ་ད་ལྟ་འབྲོང་གི་དྲི་ཙམ་ཡང་མི་བྲོ
འདི་ན་འབྲོང་གི་དར་ཆ་འཕར་མཁན་མེད
ཁུ་སིམ་སིམ་གྱི་བྲང་ཁོག་རེ་རེ་སུ་ཞིག་ལ་རྒྱང་བཀྱེད་དེ
ཁ་སང་གི་མུན་ནག་དང་ཁྲག་དྲི་ཡོངས་སུ་བརྗེད་སོང
                                   -- 《གངས་རྒྱན་མེ་ཏོག》ལས་བཏུས།