མ་བཅོས་སེམས་ཀྱི་མགུར་མ།

ཀན་ལྷོ།(རྟ་མགྲིན་རྒྱལ་པོས།)        2011-08-25

མྱི་ཁའི་སེན་ཐག་གང་ལ་འདེབས་ན་འདེབས་སུ་ཆུག །
ཕྲག་དོག་རྡོག་ཐོ་སུ་ལ་བརྫུས་ན་བརྫུས་སུ་ཆུག །
སྨན་ཆུང་ཁྱོད་དང་ལྷན་འཛོམས་སྐལ་བ་ལྡན་སོང་ན། །
གཅར་རྡུང་སྐོར་གསུམ་མྱོང་ཀྱང་འགྱོ ད་པའི་ཀུན་སློང་མེད། །
 
རྒྱུ་དང་ནོམ་པའི་རིན་ཆེན་མེད་ན་མེད་དུ་ཆུག །
ཐོབ་དང་གོ་སའི་ཁྲི་དང་བྲལ་ན་བྲལ་ཏུ་ཆུག །
འགྱུར་མེད་བརྩེ་དུང་མདུད་པ་དགུ་སྒྲིལ་སྦྲེལ་ཐུབ་ན། །
ཚེ་གཅིག་སྤྲང་པོར་ལུས་ཀྱང་འགྱོ ད་པའི་བློ་ནི་མེད། །
 
སྒྲོལ་མས་སྒོར་མོའི་སྲབ་མཐུག་གླེང་ན་གླེང་དུ་ཆུག །
ལྷ་མོས་སྒོ་ཕྱུགས་མང་རབ་བཤད་ན་བཤད་དུ་ཆུག །
སེམས་ཀྱི་སྨན་ཆུང་བུ་མོས་ཟུར་མིག་འཕངས་བྱུང་ན། །
རིན་ཆེན་གསེར་ནག་ཡིན་ཡང་འདོད་པའི་སྙིང་བོ་ཅི། །
 
མཛེས་པའི་དྲུག་འགྱུར་ལང་ཚོ་རྒུད་ན་རྒུད་དུ་ཆུག །
སྙན་པའི་ཁུ་བྱུག་གྲེ་འགྱུར་ཉམས་ན་ཉམས་སུ་ཆུག །
དྭངས་གཙང་དུང་བའི་སེམས་པ་ནམ་ཡང་འགྱུར་མེད་ན། །
སྐྱེས་ནས་རྒ་བ་འཇིག་རྟེན་མི་ཡི་ཆོས་ཉིད་ཙམ། །
 
ཉིན་མཚན་ངལ་དུབ་བར་ནས་གདུང་ན་གདུང་དུ་ཆུག །
དུས་བཞིར་ལུས་པོ་རྡུལ་གྱིས་བཟུང་ན་བཟུང་དུ་ཆུག །
བུ་མོའི་བརྩེ་བ་མི་འགྱུར་རྡོ་རྗེའི་བྲག་ཡིན་ན། །
སྐྲ་ལོ་ཁ་བའི་ཟེགས་མ་བབས་ཀྱང་འགྱོ ད་པ་ཅི། །
 
འཇིག་རྟེན་མི་ཆེན་དཔོན་ཆེན་དགོད་ན་དགོད་དུ་ཆུག །
ན་མཉམ་ཁ་ཡ་ན་ཟླས་འཕྱ་ན་འཕྱ་རུ་ཆུག །
དུང་བའི་མིག་ཞགས་ང་མིན་གཞན་ལ་འཕངས་མེད་ན། །
ཆུང་འདྲིས་རོགས་ལོའི་བརྩེ་བའི་མེ་ཏོག་རྙིད་མི་སྲིད། །
 
དགེ་རྒན་དམ་པའི་ཐུགས་དང་འགལ་ན་འགལ་ཏུ་ཆུག །
དྲིན་ཆེན་ཕ་མའི་བཀའ་དང་རྒོལ་ན་རྒོལ་ཏུ་ཆུག །
ཉི་མ་ཟླ་བའི་འཕེལ་འགྲིབ་ནུབ་རིར་ཉམས་མིན་ན། །
ཆུང་འདྲིས་ཁྱོད་དང་འགྲོགས་འདོད་འབྱུང་བཞིའི་མེ་ལས་ཚ། །
 
ཚིག་དང་ཚིག་ལས་དགའ་བ་བཤད་ན་བཤད་དུ་ཆུག །
སེམས་དང་སེམས་ནས་བརྩེ་བ་གླེང་ན་གླེང་དུ་ཆུག །
ལོ་དང་ཟླ་བའི་ཁྲོད་ཀྱི་ངང་སྒུག་མང་ན་ཡང་། །
ཁྱོད་དང་ང་ཡི་འདོད་པ་གོར་མོ་རྡོ་ཡི་གཤིས། །
 
མི་འདོད་ནད་ཀྱིས་དྲག་ཏུ་གཙེས་ན་གཙེས་སུ་ཆུག །
མི་རྟག་གཤིན་རྗེས་ལག་བརྡ་གཏོང་ན་གཏོང་དུ་ཆུག །
ཕྱི་མའི་དག་ཞིང་སྦྲ་ནག་གྲུ་བཞིའི་ཁ་ཚུབ་འོག །
མཉམ་དུ་བདེ་སྐྱིད་འཚོ་བའི་དཔལ་ལ་རོལ་ལགས་ཉིད། །
  • ལེ་ཚན་སྔོན་མ།:དུས་རབས་གསར་པའི་གངས་ཕྲུག
  • ལེ་ཚན་རྗེས་མ།:མཆོད་མེ།