གངས་རི་དང་རྫ་རིའི་འདབས་ན།
     ནགས་རི་དང་སྤང་རིའི་བར་ན།
     ཚེ་སྲོག་མཁྲེགས་པོའི་མེ་ལྕེ་མཆེད་དུས།
     རྨོངས་རྟུལ་ཤེ་མུན་ཡོལ་བའི་མཐའ་ཁད་གྱིས་བཀྱགས།
     དཀའ་ཐུབ་ཕོ་རྒོད་ཀྱིས་རི་ལུང་སྟོང་གི་ས་འཁེང་སྦར་ནང་དུ་བཀད།
     ཕ་བཟང་བུ་ཡིས་གངས་རིའི་རྩེ་ནས་དཔའ་རྒོད་དཔུང་པ་ངོམ།
     དམུ་རྒོད་མི་བུའི་གདོང་རྩ་ཁྲག་གིས་རྒྱགས་ནས་གཅན་གཟན་ངར་མ་ལག་བཟུང་བྱས།
     བྲག་ཕུག་སྐམ་པོའི་ལྷུམས་སུ་ཞུགས་པའི་རྨི་ལྟས་ལྗང་གུ་རླུང་རྟར་ཞོན།
     བྲག་མདུང་རྩེ་རུ་འབྲོང་ཀོ་རློན་པ་ཕུབ་བའི་གཞིས་ཁྱིམ་དྲོན་པོའི་ནང་དུ་ཁོ་ལག་རྒྱས།
     རུས་མཁར་དཀར་པོའི་གསེང་ནས་བསྲིངས་པའི་བརྩེ་དུངས་སྦྲེལ་ཐག་རིང་པོ་ཞིག་གིས།
     ཤ་རུས་གཅིག་པའི་གདུང་རྒྱུད་ཚོགས་ཀྱི་མནོ་བསམ་ལྷན་དུ་བཅིངས།
     ཕ་རྒྱུད་གཅིག་པའི་རུ་སྡེ་ཡིས་ཤོག་ཁག་བསྒྲིགས།
     དཔའ་རྒོད་ཀྱི་ཁུ་ཚུར་གྱིས་འཇིག་རྟེན་གསར་པའི་སྒོ་འཕར་ཕྱེས།
     ང་ཡི་འཇིག་རྟེན།ང་ཡི་བཙན་པོ།
     འབྲོང་སྙིང་དྲོན་པོ་ཁྱུར་མིད་བྱས་ཏེ་དབེན་པའི་བཙན་ས་བདག་ཏུ་བཟུང་།
     ཡབ་མེས་ངོ་གདོང་གི་ཁྲག་ཐིགས་རེ་རེ།
     འུ་ཅིག་གི་འཁྲབ་གཞུང་རིང་མོའི་དབུ་ཁྱུད་རེད།
     ཁ་བའི་ལྗོངས་ཀྱི་ཞིང་ས་འདི་ནི།
     འུ་ཅག་གིས་སྟོབས་དང་ཤེས་རིག་འཁྲབ་སའི་གར་སྟེགས་རེད།
     ང་ཡི་འཇིག་རྟེན།ང་ཡི་བཙན་པོ།
     རྫ་འགྲིམ་འབྲོང་གཡག་གི་རུ་ཐུར་ལ་དཔའ་རྩལ་འགྲན་དུས།
     རྩལ་ཆེན་གྱི་འཆང་བས་རུ་ཐུར་འཇུས།
     སྟོབས་ཆེན་གྱི་སྦར་མོས་སྒྱིད་པ་བཟུང་།
     འུར་འགྲོས་འབྲོང་མོ་རྡང་ལ་སྟར་ནས་གཡུང་དུ་ཕབས།
     རིགས་རྒྱུད་ཁྱུ་ཚོགས་དེས་བཙན་ངག་སྦོམ་པོས་ཉི་ཟླར་ཀ་བ་བཀྱགས།
     ཡིད་རྟོན་བཀན་མོས་གངས་ལ་གནམ་ལྕགས་བཙུགས།
     སྤྲིན་དཀར་གྱིས་མཁའ་མཐའ་ན་དགའ་འཁྱིལ་བསྐོར་པའི་དུས།
     གྲང་ངར་གྱིས་བྱང་ཐང་དུ་ཨམ་གཙིགས་སྡོམ་པའི་དུས།
     ལྕགས་ཁྲག་དམར་པོ་ཧུབ་ཀྱིས་འདྲེན་པའི་གནའ་གཏམ་རྙིང་རུལ་ཞིག
     སྦྲ་ནག་གྲུབ་བཞིའི་འཁྲུངས་སྐར་དེ་དུས་རབས་ཀྱི་སྣེ་ནས་དེད་ཚེ།
     འདི་ནི་གངས་རིའི་ལྗོངས་སུ་འཐོར་པའི་དྲན་པ་ལྗིད་པོའི་རྨ་ཤུལ་རེད།
     ན་ཆུང་ལུག་རྫི་བུ་མོས་ལ་གཞས་ངག་རིང་འགུགས་པས་ན།
     སྦྲ་ནག་ཐུ་འོག་ཏུ་གབ་པའི་བརྩེ་སེམས་དེ་སྤྲིན་དཀར་ཁྲོད་དུ་སིམ།
     སྦྲ་ནག་ལགས།
     ལྷུན་ཆགས་གངས་རིའི་འདབས་ཀྱི་རྒྱན།
     ཡངས་པའི་རྩྭ་ཐང་ཁྲོད་ཀྱི་རྟེན།
     དཀར་ནག་ཕྱུགས་ཁྱུའི་དཀྱིལ་གྱི་བཅུད།
     མེ་ཏོག་དྲི་ངད་ཀྱིས་བཀླུབས་པའི་སྦྲ་ནག་གྲུ་བཞི།
     ཁ་བའི་འདབ་མ་ཡིས་བཏུམས་པའི་སྨུག་ཆུང་ནག་ཚང་།
     ཁྱེད་ཀློག་འདོན་བྱེད་ཐེངས་རེ་རེར།
     ངའི་དྲན་པའི་རྩ་བ་ཟབ་མོ་དེ་གཏིང་ནས་འཐེན།
     བསམ་གཞིགས་འཁྱར་པོ་དེ་སླར་ཕ་ཁྱིམ་དུ་ལོག་ཅིང་ཀན་རྐྱལ་ནས་བསྙལ།
     སྦྲ་ནང་གི་ཆར་སྒྲ་ཡིས་གཉིད་དུ་ཡུར་བའི་དྲན་པའི་ཞལ་ངོ་མཐོང་།
     སྒྱེད་ནང་གི་ཤིང་རློན་དུད་དྲིས་རྩྭ་ཐང་དུ་མཐོར་པའི་བྱིས་དུས་རྐང་རྗེས་འཚོལ།
     ཡབ་མེས་འཇའ་ཚོན་རྨི་ལམ་གྱིས་བཏགས་པའི་སྦྲ་ཁྱིམ་གཙང་མ།
     འདི་ནི་བཙའ་ཡིས་ཟོས་པའི་བྱུང་བརྗོད་གླེགས་བམ་ཞིག
     འདི་ནི་གནའ་རབས་རྙིང་པའི་ཚེ་སྲོག་གསོན་པོ་ཞིག
     སྦྲ་ནགཕྱུགས་སྐྱོང་གི་འཇིག་རྟེན་གྲུ་གཞི་མ།
     བགྲང་མི་ནུས་པའི་སྦྲ་མིག་རེ་རེ།
     འཛད་མེད་ཀྱི་གཏམ་རྒྱུད་རེ་རེ།
     བྱིས་པའི་རྐང་མཛུབ་བར་དུ་མེ་ཏོག་སེར་ཆེན་ཐོགས་དུས།
     ཁྱེད་ཀྱི་དྲོད་ཁོལ་པང་པ་བརྙོགས།
     ཨ་མའི་པགས་སླག་རུམ་དུ་ཁ་བ་དང་ཆབ་རོམ་གྱིས་བཏུམས་པའི་རེ་འདུན་ཚ་མོ་བརྒྱུད་ནས་འཐག་སྐུད་དྲངས།
     ཨ་ཕའི་ཕྱིང་ཞྭའི་འོག་ནས་མ་འོངས་ཡིད་སྨོན་ལྗིད་པོ་གཡག་རྒྱབ་ནས་ཕབ་ཏེ་ཁྱིམ་ཕུག་བརྩིགས།
     ལོ་རྒྱུས་སྙན་ངག་རིང་མོ་ཞིག་སྦྲ་ནང་བརྫངས་ཏེ།
     ཆོན་ཐག་གིས་ལུང་མ་བསྟན་གྱི་མི་ཚེའི་བགྲོད་ལམ་བསྣར།
     ཕུག་དར་གྱིས་མི་འདར་པའི་དད་སེམས་དགུང་དུ་བསྒྲེངས།
     ཁ་ཚབ་ནས་འོ་དྲི་དང་འདྲེས་པའི་རྫི་གླུ་མངར་པོ་མཁའ་རུ་ལྡིང་།
     སྦྲ་མཐའ་ནས་ཞོ་དྲི་དང་འདྲེས་པའི་གནའ་སྒྲུང་སྐྱུར་པོ་ཐང་མ་བརྡལ།
     སྦྲ་ནགཚེ་སྲོག
     ལས་དབང་གི་གཏམ་རྒྱུད།
     བཀྲལ་མི་ནུས་པའི་བརྡ་ཡིག་ཅིག
     འགྲེལ་མི་ནུས་པའི་ཚིག་རྐང་ཞིག
     ཤོད་མི་ཤེས་པའི་གཏམ་དཔེ་ཞིག
     གསང་རྒྱའི་གཤོག་ཟུང་གིས་ངུ་ཤུབ་དང་ཧབ་ཆ་ཐོགས་ཏེ་ཉི་ཟེར་ལ་གཟས་ཚེ།
     ངས་ཁྱོད་ཀྱི་འཛུམ་ཞལ་ལ་ལྟ་མ་འདོད།
     ངག་བཅད་རླུང་སྒྲ་ལ་ཉན་མ་འདོད།
     ཆོན་སྣེ་ནས་དབྱངས་རྟ་གྱོང་པོའི་སྤུ་ཉག་ཕྱུང་བཞིན་རླབས་འཕྲེང་སྐྱོམ་པའི་གཙང་ཆུ་སྔོན་པོར་གྲུ་ཤན་བསྐྱོན་པ་མཐོང་དུས།
     གངས་རྩེར་བརྙེགས་པའི་རིག་པའི་དཔའ་བོའི་འཁུན་སྒྲ་རེས།
     འཐོམ་སྦྲིད་དུ་གྱུར་པའི་ངའི་སེམས་པ་རྙིད་པོ་འདིར།
     རྣོ་ངར་རལ་གྲིའི་རྩེ་མོ་བསྣུན་དུས།
     ད་གཟོད་ཟུག་རྔུའི་ཚོར་བ་མྱངས།
     དེ་དུས་ཁྱོད་སྐྱེས་པའི་སྐབས་དཔྱད་མ་ཕོག
     འཆི་བའི་དུས་ཡང་ཆ་མ་མཆིས།
     འདིར་བརྒྱན་ཆས་སྤྲས་པའི་སྙན་ངག་གི་འཕྱོར་གོས་ཡོད་ཚད་འབྲད་དོ།
     དྲན་པ་སྒྲེ་པོ་གཅིག་གིས་ཡིད་ཀྱི་རྡོ་རིང་ལ་བླ་སྲོག་བསྟུམ་པས་འཕོ་བ་འདེབས།
     གལ་སྲིད་ཕ་མེས་ཡང་མེས་ཀྱིས་དུར་ས་ནས་རེ་ཆགས་མིག་ཟུང་ཅེར་ན།
     བདག་གིས་ཤོག་ལྷེ་ཐེད་པོས་མཆོད་མེ་ཞིག་སྒྲོན་དེ།
     མཚེར་ས་གསར་པའི་བསམ་གཞིགས་སུ་འོད་སྣང་འཚེར་བའི་བསྔོ་སྨོན་བགྱི་འདོད།