༡
     གྲོགག་པོ་ལགས།བསླུ་བྲིད་ཐེངས་གཅིག་གི་རྗེས་སུ།ཁྱེད་འདི་ལྟར་བདག་ལ་གཡོལ།ངས་ཁྱེད་ལ་ལེ་བདའ་བྱེད་མི་སྲིད།ཅི་ཡིན་ངས་ཀྱང་མི་ཤེས།འུ་གཉིས་ཕ་མ་གཅིག་པས།ཁྱོད་ཆས་ཤུལ་དུ་ངའི་མཆི་མ་དྲག་ཏུ་བརྡོལ།ཁྱེད་ཀྱིས་ཐོས་སམ།ཁྱེད་ཆས་ཤུལ་དུ་ང་གཅིག་པུར་འཁྱམས་ཤིང་ལྡོམ།འུ་གཉིས་ཀྱི་རྩེད་ར་སྒོར་མོར་རྒྱུན་དུ་སྙན་ངག་གྱེར་ཏེ་རང་སེམས་ལ་དྲོད་ཁོལ་བསྐྱིལ།ཨ་མས་ང་ལ“གཅེས་ཕྲུག་ཡོད་ཚད་ཁོར་ཡུག་གི་བསླུ་བྲིད་རེད”ཟེར།
     ༢
     ནུ་བོ་ལགས།འུ་གཉིས་མཉམ་དུ་ཆས་རྒྱུའི་ཁ་དན་སུ་ཞིག་གིས་གང་ལ་ཁྱེར།གནས་དེ་ན་སེང་གེ་མང་བ་ཤེས་ནས་ཁྱེད་ཀྱིས་ངའི་སེམས་པ་བརྐུས་ནས་བྲོས།ཕྱི་མིག་དེ་ཡང་འཕྱ་སྨོན་མིན་པ་ངས་སྔོན་ནས་རྟོགས།རེ་བ་ཆུང་ཆུང་དེ།ལྷག་བསམ་དྲོན་མོ་དེ།ཁྱེད་ཆས་ཤུལ་དུ་དལ་གྱིས་འབར།ཅུང་མིན་ན་ང་ཡང་དེ་དང་མཉམ་དུ་འབར།“གཅེན་གཅུང”ཚོའི་ཧབ་དགོད་དང་འཕྱ་སྨོན་རེ་རེ་ངའི་འགྲོ་རོགས་ཡིན་པ་ཁྱེད་ཀྱིས་རྟོགས་ན།“ཕུ་བོ་ཁྱེད་འོ་བརྒྱལ་སོང་།ང་སླར་ཡང་འུ་གཉིས་ཀྱི་རྩེད་རར་ལོག་ཆོག”ཟེར་བ།ཁྱེད་ཀྱི་གཏམ་གླེང་ཨེ་ཡིན།
     ༣
     གཞོན་ནུ་ལགས།ཡར་དགྱེ་དང་།ནམ་མཁའ་ན་ཕུན་རོན་མང་།ངའི་ཁོར་ཡུག་ན་ཁྱོད་ཀྱི་གནས་མལ་མེད་པ་བདེན་མི་སྲིད།འུ་གཉིས་གཅེན་གཅུང་ཡིན་པས།ཁྱོད་ཀྱིས་རང་ཡུལ་ལ་ལས་དབང་གི་གོམ་པ་སྤོ་དུས།ངའི་ཟུངས་ཁྲག་ཐིགས་པ་གཅིགཨ་ཅེའི་མིག་ཆུ་དང་མཉམ་དུ་ས་ལ་ཐིམས།ད་དུང་།དམར་ལྷང་ལྷང་གི་གླུ་དབྱངས་ཤིག་ཁྱེད་དང་དུས་རབས་འདིའི་ཆེད་དུ་བླངས།ཁྱོད་རང་དལ་བུར་བགྲོད་དང་།ཁྱོད་ཀྱི་བགྲོད་ལམ་ན་གཅུང་མོའི་མིག་ཆུ་མང་།ཁྱོད་ཀྱི་བགྲོད་ལམ་ན་ཕུ་བོའི་སྙན་ངག་མང་།ཁྱོད་ཀྱིས་མཐོང་ངམ།སྤྲང་པོ་སྨྱུག་ཐོགས་པ་དེས།སུ་ཞིག་གི་སྐྱོན་འཚོལ་བར་རེམ་པ།དེ་ཡང་ཁྱོད་ལྟ་བུའི་ཕུ་ནུ་འགའི་ཆེད་དུ་ཡིན་པ་མ་བརྗེད་ཅིགདལ་བུར་བགྲོད་ཅིགདུས་རབས་འདིའི།མི་ཡུལ་འདིའི།སྡོམ་ཚིག་དྲང་མོ་སྟེ།ངའི་གཞོན་ནུ་ལགས།