རྨད་བྱུང་མཁྱེན་པའི་གཏེར་ཆེན་སྨྲ་བའི་སེང་།།
     དབྱེར་མེད་སྙིང་རྗེའི་རང་གཟུགས་བླ་མའི་ཞབས།།
     སྒོ་གསུམ་གུས་པ་ཆེན་པོས་ལེགས་བཏུད་དེ།།
     གཞན་ཕན་ངོ་མཚར་གཏམ་བཟང་འདི་ན་སྨྲ།།
     གང་ཞིག་འཛམ་གླིང་བོད་ཀྱི་ཞིང་ཁམས་མཆོག།
     འདི་ནས་སྐྱེས་ཏེ་སྨྲ་ཤེས་དོན་གོ་མཆོག།
     མི་ཡི་རྟེན་འདི་འགྲོ་དྲུག་ཀུན་ལས་མཆོག།
     བཀོལ་སྤྱོད་ཤེས་ན་ཡིད་བཞིན་ནོར་བུའི་མཆོག།
     མི་ལུས་ཐོབ་པའི་དོན་གོ་ཆེ་ཆུང་དེ།།
     མི་ལ་བསམ་པ་བཟང་པོ་ཡོད་མེད་ཁྱད།།
     གཞུང་བཟང་ཁྲེལ་ཡོད་ངོ་ཚ་ཤེས་པ་དེ།།
     གཞུང་སྒེར་ལུགས་གཉིས་ཀུན་གྱི་གཞི་མ་ཡིན།།
     བློ་ཕུགས་བསམ་ཤེས་རྒན་ལ་གཏོད་པ་ནི།།
     བློ་རབ་འཇིག་རྟེན་མཁས་པའི་གཞུང་ལམ་ཡིན།།
     ལས་དོན་བྱ་བཞག་གྲོས་ཀྱིས་སྒྲུབ་པ་ནི།།
     ལས་བྱེད་ཐབས་ཇུས་ཀུན་གྱི་གཙོ་བོ་ཡིན།།
     འཕྲལ་ཕུགས་ཀུན་ལ་ཕན་པའི་བསམ་པ་དེ།།
     འཕྲལ་ཡུན་འདུན་མའི་ཡང་རྩེ་འཁྲུལ་མེད་ཡིན།།
     སྨྲ་མཁས་རིག་པ་ཟབ་དང་མི་ཟབ་ཁྱད།།
     སྨྲ་བ་ཉུང་ཞིང་ཚིག་དོན་བསྡུས་པ་ལེགས།།
     མི་རྒྱུད་ཡ་རབས་མ་རབས་འབྱེད་དགོས་ན།།
     མི་དེའི་ཁྲེལ་གཞུང་ཅི་འདྲར་བརྟག་ན་ཤེས།།
     མི་ཡི་གྲལ་མགོར་སླེབས་དང་མི་སླེབས་ཁྱད།།
     མི་རིགས་མགོ་རྣ་ཡོད་མེད་དེ་ལ་རག།
     གཞན་གྱིས་བཟང་ངན་གླེང་གཞི་བཟོ་བ་དེ།།
     གཞན་གྱི་བསམ་སྦྱོར་བཟང་ངན་དག་ལས་བྱུང་།།
     ཡུལ་མིས་རྩིས་ཐང་ཆེ་ཆུང་ཁྱད་པར་ནི།།
     ཡུལ་ལ་ཕན་པ་སྒྲུབ་མིན་དེ་ལས་བྱུང་།།
     ཤེས་བྱ་མ་བསླབ་སུས་ཀྱང་མི་ཤེས་པས།།
     ཤེས་པར་འདོད་ན་སློབ་སྦྱོང་དག་ལ་རེམས།།
     མ་འབད་བྱ་བ་གང་ཡང་མི་འགྲུབ་པས།།
     མ་བསྐུལ་ན་ཡང་བརྩོན་འགྲུས་ཆེན་པོ་བསྐྱེད།།
     མ་བཤད་སུས་ཀྱང་གོ་བར་མི་འགྱུར་བས།།
     མ་ཡིས་བུ་བཞིན་ཤ་ཚའི་སྙིང་གཏམ་ཤོད།།
     ཁ་བཟང་བཤད་ན་གཉེན་དུ་མི་འགྱུར་བས།།
     ཁ་ཞེ་གཉིས་མེད་ཚིག་རྟིང་དོན་གྱིས་སྒྲུབས།།
     ཁ་ཤོམས་ཆེ་བས་ཕྱི་དགྲ་བཏུལ་མི་ནུས།།
     ཁ་ཁོག་ཐབས་ལ་མཁས་ན་བཏུལ་ནུས་ཟེར།།
     རྒྱུ་ལ་སེར་སྣ་ཆེ་བས་ནོར་མི་བསོག།
     རྒྱུ་ནོར་ཕར་གཏོང་ཚུར་ལེན་ཤེས་ན་བཟང་།།
     དོན་བྱ་ཨུ་ཚུགས་ཆེ་བས་སྒྲུབ་ནུས་མིན།།
     དོན་བཟང་ཐབས་ཀྱི་སྒོ་ནས་བསྒྲུབས་ན་འགྲུབ།།
     ངན་སེམས་ཁོང་ནས་སྤངས་པར་མི་ནུས་ཀྱང་།།
     ངན་གཏམ་ངག་ནས་ཐོན་ན་ཀུན་ལ་འགྲས།།
     མཛའ་བའི་དུས་སུ་ནང་གཏམ་བཤད་མ་མང་།།
     མཛའ་བ་ཉམས་ན་རང་མགོ་རྡུང་བའི་མཚོན།།
     དགྲ་ལའང་ངན་སྨྲ་ཚོད་འཛིན་བྱས་ན་ལེགས།།
     དགྲ་ཡང་གཉེན་དུ་གྱུར་བ་མང་པོ་མཐོང་།།
     མཁས་པ་ཡིན་ཀྱང་ཁེངས་སྐྱུང་བྱས་ན་ལེགས།།
     མཁས་རློམ་ང་རྒྱལ་ཆེ་ན་སྙན་གྲགས་ཉམས།།
     རང་ཉིད་གོ་ས་མཐོ་ན་དམན་ལ་བྱམས།།
     རང་ཆེ་དྲེགས་པས་གཞན་གྱི་དད་གུས་ལྡོག།
     འབྱོར་བ་ཆེ་ན་དབུལ་བོར་བྱམས་སྐྱོང་དགོས།།
     འབྱོར་བའི་མཐའ་མ་མི་རྟག་དབུལ་ན་འགྱོད།།
     གཡོག་ལ་བྱམས་ན་དཔོན་གྱི་ཡོན་ཏན་ཡིན།།
     གཡོག་འབངས་སྐྱིད་སྡུག་མི་ཤེས་དཔོན་གྱི་མཚང་།།
     བཙན་པོ་ཡིན་ཀྱང་རང་ཚོད་ཟིན་ན་ལེགས།།
     བཙན་ཐབས་བཀོད་ནས་རང་སྲོག་དོར་བ་ཡོད།།
     ཡོན་ཏན་མེད་པའི་གྲལ་མགོ་འཛིན་པ་ལས།།
     ཡོན་ཏན་ཅན་གྱི་གྲལ་མཇུག་བསྡད་ན་མཛེས།།
     ངན་པའི་དཔོན་ལ་རེ་ལྟོས་འཆའ་བ་ལས།།
     ངན་མེད་བཟང་པོའི་གཡོག་ལ་རེ་ན་ཕན།།
     རྒྱལ་ཁྲིམས་གསེར་གྱི་ཐིག་ཤིང་གཅོག་མི་རུང་།།
     རྒྱལ་ལ་འགལ་ན་ལུས་སྲོག་ཚངས་སྤྱོད་འཆོར།།
     ཡུལ་དཔོན་བཟང་པོ་བཀུར་ཞིང་ཐུགས་མི་དཀྲུགས།།
     ཡུལ་སྡེ་མགོ་འདྲེན་མེད་ན་སྡེ་འཁྱམས་འདྲ།།
     རང་སྡེའི་བཅའ་ཁྲིམས་གཏོར་བཤིག་བྱེད་མི་རུང་།།
     རང་ཉིད་ཟུར་དུ་བུད་ན་གྲོགས་མི་རྙེད།།
     རྫུན་དང་ཚིག་རྩུབ་གཏམ་ལ་འཛེམས་ཤེས་བྱ།།
     རྫུན་ཅན་མི་ལ་གཞན་གྱིས་བློ་མི་གཏད།།
     ཕན་ཐོགས་གང་ནས་བྱུང་བའི་དྲིན་མ་བརྗེད།།
     ཕན་ཚུན་མཐུན་པ་འཇིག་རྟེན་མཛེས་པའི་རྒྱན།།
     འབྱུང་བ་མེ་དང་ཆུ་ལ་ཕོད་མ་བཙོང་།།
     འབྱུང་འདུས་ཕུང་པོའི་རྟེན་བཟང་འདོར་ཉེན་ཡོད།།
     བློ་སྣ་མང་ན་བྱ་བ་འགྲུབ་མི་སྲིད།།
     བློ་རྩེ་གཅིག་གིས་དོན་ཆེན་གྲུབ་པ་མང་།།
     སྤྱོད་ངན་མི་ལ་མཛའ་བ་སྤང་ན་བཟང་།།
     སྤྱོད་ལོག་འགོ་བའི་ནད་བཞིན་ཀུན་གྱིས་བརྙས།།
     མ་རབས་བྱ་བ་མང་ན་ཀུན་གྱི་དགྲ།།
     མ་དང་ཕ་ཡང་ཐུགས་ཁྲེལ་འབྱུང་བས་འཛེམས།།
     འགྲོ་འདུག་མང་ན་རྐྱེན་ངན་འབྱུང་བའི་རྒྱུ།།
     འགྲོ་བ་གང་ལ་དོན་མེད་བྱ་བ་བཤོལ།།
     མི་ནུས་པ་ལ་དཀའ་བའི་ལས་མ་བཅོལ།།
     མི་ཕན་མ་ཟད་གནོད་པར་གྱུར་ན་ཉེས།།
     དོན་ཆུང་ལས་ལ་འབད་པ་ཆེར་མ་བྱེད།།
     དོན་ལས་དཀའ་ཚེགས་ཆེ་ན་ཆུད་ཟོས་ཡིན།།
     རྒྱུས་ཡོད་མིན་ན་ནང་གཏམ་བཤད་མི་འོས།།
     རྒྱུས་མེད་མི་ཡིས་བསླུས་པ་མང་པོ་མཐོང་།།
     རྩོད་གཞི་ཡོད་པའི་རྒྱུ་ནོར་ཡོད་མི་རུང་།།
     རྩོད་འཁྲུག་བྱུང་ན་འདུན་པའི་ནུས་པ་དཀའ།།
     མ་བརྟག་བྱ་བ་མྱུར་དུ་ཐག་མ་གཅོད།།
     མ་འོངས་པ་ན་ནོར་འཁྲུལ་བཅོས་ཐབས་དཀའ།།
     མ་འདྲིས་ཟས་གོས་གང་བྱུང་སྤྱོད་མི་རུང་།།
     མ་ཤེས་ནད་དང་རྐྱེན་ངན་བྱུང་བ་མང་།།
     ནད་ཡམས་ཆེ་སར་འགྲིམས་འགྲུལ་བྱེད་མ་མང་།།
     ནད་མེད་མི་ཡང་གློ་བུར་འདས་པ་མཐོང་།།
     ཞེ་སྡང་ཕྲག་དོག་ཅན་ལ་དབང་མ་གཏད།།
     ཞེ་ངན་སྙིང་ལ་ཉལ་བས་བཟང་མི་བྱེད།།
     རྩྭ་དང་ཆུ་ཡི་དོན་ལ་མི་མ་གསོད།།
     རྩྭ་མི་ཤིང་མི་ཟེར་ནས་ཤི་མི་རུང་།།
     དོན་ཆུང་ཕྱུགས་ཀྱི་ཁ་ཟས་ཙམ་བརྩད་ནས།།
     དོན་ཆེན་ལུས་སྲོག་གཏོང་བ་བླུན་པོའི་ལུགས།།
     དབང་ཡོད་སྙམ་ནས་ཕྱོགས་འཛིན་ཆེར་མ་བྱེད།།
     དབང་མེད་འབངས་ཀྱིས་ཁྲེལ་ན་རང་ཕུང་རྒྱུ།།
     ཕྱོགས་རིས་ཆེ་བ་ཆོས་པས་སྤང་བྱ་ཡིན།།
     ཕྱོགས་འཛིན་ངོ་བོ་འདོད་ཆགས་ཞེ་སྡང་རེད།།
     གྲུབ་མཐའི་ཕྱོགས་འཛིན་བསྟན་དོན་ཡིན་འདོད་ཀྱང་།།
     གྲུབ་པ་མིན་པ་ཉོན་མོངས་ཆེ་བས་གསལ།།
     མཁས་པ་ཡིན་ཟེར་ཆགས་སྡང་ཆེ་དྲགས་ན།།
     མཁས་མིན་བླུན་པོའི་ཁྱད་པར་གང་གིས་འབྱེད།།
     མཁས་གྲུབ་ཚད་ལྡན་ཡིན་ན་རང་རྒྱུད་ཐུལ།།
     མཁས་པ་ཉོན་མོངས་ཆེ་བ་ཆེས་མི་ལེགས།།
     གཞན་གྱིས་བཀུར་བསྟི་བྱེད་ཚེ་བྱམས་སྙིང་སྒོམས།།
     གཞན་ལ་མཐོང་ཆུང་བྱས་ན་མཐའ་མི་ལེགས།།
     གཞན་དོན་བྱེད་ནུས་སྐྱེས་བུ་ཡིན་མིན་ནི།།
     གཞན་ཕན་ཕྱོགས་མེད་ལྷག་བསམ་ཡོད་མེད་རག།
     བསམ་ངན་དམར་སེར་གོས་གྱིས་བཏུམ་མི་ནུས།།
     བསམ་ཡོད་རིགས་པས་དཔྱད་ན་ཤེས་པར་སླ།།
     གཞན་ལ་སྡང་བའི་བློ་ངན་ཤོམས་མི་རུང་།།
     གཞན་གྱིས་ཤེས་ཚེ་ཁྲེལ་རྒོད་འབྱུང་བའི་རྒྱུ།།
     རང་དོན་གཅིག་པུ་གྲུབ་འདོད་ཧམ་སེམས་དེས།།
     རང་གཞན་འདི་ཕྱིའི་འདུན་མ་བརླག་པར་བྱེད།།
     མི་མཆོག་རྒྱལ་བའི་བསྟན་དོན་ཡིན་ཁུལ་གྱིས།།
     མི་ཡི་སྙིང་ལ་ཕོག་པའི་གཏམ་མ་བཤད།།
     མི་ལ་མ་བརྟེན་ལུགས་གཉིས་སྒྲུབ་ཚུལ་མེད།།
     མི་རྣམས་མཐུན་ན་མི་འགྲུབ་ག་ལ་ཡོད།།
     ཚིག་ཙམ་མཛེས་པའི་བསྟན་བཅོས་དགོས་པ་བྲལ།།
     ཚིག་དོན་མཐུན་མིན་བལྟས་པ་ཙམ་གྱིས་ཤེས།།
     ཚིག་མང་སྨྲ་བའི་རྩོམ་པ་ལེགས་ན་ཡང་།།
     ཚིག་གི་སྟེང་ནས་རྩོམ་མཁན་ཀུན་སློང་ཤེས།།
     དོན་ལ་མཁས་ན་རང་རྒྱུད་ཞི་ཞིང་དུལ།།
     དོན་ལྡན་ཡིན་མིན་མཐོང་བ་ཙམ་གྱིས་གསལ།།
     དོན་བཟང་བསླབ་བྱ་བློ་ལྡན་ཀུན་གྱིས་གཉེར།།
     དོན་མེད་ཚིག་ལ་ཡིད་རྟོན་སུ་ཡིས་བྱ།།
     ངོ་མཚར་གཏམ་བཟང་དཔྱིད་ཀྱི་དབྱངས་སྙན་ཅན།།
     ལྷག་བསམ་དྲི་བཟང་འཐུལ་བའི་ནགས་ཚལ་ནས།།
     རིག་པ་འཕེལ་བའི་འཕུར་ལྡིང་གཡོ་བ་ཡིས།།
     བློ་ལྡན་གཞོན་ནུ་དགྱེས་པའི་དགའ་སྟོན་སྤེལ།།
     གངས་ཅན་ལྗོངས་ན་ལྔ་རིག་འཕེལ་བའི་གཏམ།།
     མུ་ཏིག་དོ་ཤལ་གསར་བའི་འཛུམ་དཀར་ཅན།།
     རྫོགས་ལྡན་འཇོ་སྒེག་ངོམ་པའི་རོལ་རྩེད་ཀྱིས།།
     ཕྱོགས་ཀྱི་བུ་མོ་མཛེས་པའི་རྒྱན་གྲུབ་རྨད།།
     བསམ་པ་དགེ་བའི་ཟླ་སྣང་དཀར་པོའི་འཛུམ།།
     བརྗོད་དོན་ལེགས་པའི་རྒྱུ་སྐར་ཚོམ་བུ་དང་།།
     ལྷན་ཅིག་རྒྱ་ཆེན་རིག་པའི་སྣང་བ་བཅས།།
     བློ་ལྡན་དྭངསས་པའི་མཚོ་ལ་ཅི་ཡང་ཤར།།
     ཅེས་པའོ།།