－སྐད་ཆ་ཐེངས་གཉིས་པ།
     འབོད་ཐེངས་གཉིས་པས་ཡང་བསྐྱར་གླེང་དུས་ཁྱོད་ཀྱི་སྙིང་རྩ་འདར་གི།
     ན་ནིང་ད་ཙམ་ཁྱོད་ལ་བོས་པ་སྙིང་གི་དཀྱིལ་ནས་ཨེ་དྲན་ཀི།
     སེམས་གཏམ་མངར་མོ་ཁ་ནས་བཤད་པ་བྲང་གི་སྲུབས་ནས་ཨེ་འཕྲོད་ཀི།
     སྙིང་ཆུང་དམར་པོ་ཁོག་ནས་ལྡིང་བ་ཉམས་མྱོང་མིག་གིས་ཨེ་རིག་གི།
    
     དྲི་མེད་སེམས་ཀྱི་བརྩེ་བ་འདི་ལ་འགྱུར་བ་ཏོག་ཙམ་མ་ཐེབས་ཤིང་།།
     སླད་མེད་སྙིང་གི་རེ་བ་དེ་ལ་གཡོ་འགུལ་ཅུང་ཙམ་མ་སོང་གི།
     དེ་བས་ཡང་བསྐྱར་གླེང་དགོས་བྱུང་ཐལ་སྙིང་སྡུག་སྙིང་གི་པདྨ་མཚོ།།
     གནམ་གྱི་ཉི་ཟླ་དཔང་པོར་དྲོངས་ལ་ཟུངས་ཁྲག་དྲོན་མོས་དམ་བཅའ་འབྲི།།
    
     མེ་ཏོག་སེར་པོ་སྤང་ལ་འཁྲུངས་དུས་དྲན་རྒྱུ་ཁྱོད་ཀྱི་བཞིན་རས་ཡིན།།
     སྤྲིན་པ་དཀར་པོ་གངས་ལ་འཁྱུད་དུས་བསམ་རྒྱུ་ཁྱོད་ཀྱི་གཉུག་གཤིས་ཡིན།།
     ཉི་མ་སེར་པོ་ཚང་ལ་ཞུགས་དུས་རྨི་ལམ་ཁྱོད་ཀྱི་ཁོར་ཡུག་ཡིན།།
     ཟླ་བ་དཀར་པོ་ཁེར་རྐྱང་ཉུལ་དུས་མིག་ཆུ་ཁྱོད་ཀྱི་རྫོང་བ་ཡིན།།
    
     བསེར་བུ་རླུང་གིས་གོས་སྣེ་སྒུལ་ཚེ་ཁྱོད་ཀྱི་ཡོལ་བ་ཡིན་ན་བསམ།།
     གཤེར་བ་ཆུ་ཡིས་རློན་ཐིགས་ཕོག་ཚེ་ཁྱོད་ཀྱི་ཆར་གདུགས་ཡིན་ན་བསམ།།
     ཙག་ངར་འཁྱག་མོ་ཐོལ་གྱིས་ལྡང་ཚེ་ཁྱོད་ཀྱི་མལ་ཐུལ་ཡིན་ན་བསམ།།
     ཚ་གདུག་དྲོད་མོ་གདོང་ལ་འཕྱུར་ཚེ་ཁྱོད་ཀྱི་རླུང་གཡབ་ཡིན་ན་བསམ།།
    
     འཇིགས་པས་བརླགས་རབས་ཚོར་མ་ཐག་ཏུ་ཁྱོད་ཀྱི་ཁོར་ཡུག་ཨེ་འཚམ་སྙམ།།
     ཆོམ་པས་བཅོམ་རབས་གོ་མ་ཐག་ཏུ་ཁྱོད་ཀྱི་ལུས་ཕུང་ཨེ་བདེ་སྙམ།།
     གོ་ལ་ཧྲིལ་པོ་གས་ཆག་བྱུང་རུང་ཁྱོད་ལུས་བརྟན་པ་སྨོན་ལམ་ཡིན།།
     ས་སྒང་རིལ་བོ་ཞིག་རལ་གྱུར་རུང་ཁྱོད་སེམས་བདེ་བ་རེ་འདུན་ཡིན།།
    
     འདི་ལྟར་བཤད་པ་ཁ་ཙམ་མ་ཡིན་སྙིང་གི་བཅུད་ཀྱི་ཁ་དོག་ཡིན།།
     འདི་འདྲ་སྨྲས་པ་ཚིག་ཙམ་མ་ཡིན་ནང་ཁྲོལ་དྲོན་མོའི་རླངས་པ་ཡིན།།
     བརྩེ་བའི་རྙི་ཐག་རྐྱོང་ཙམ་བྱོས་དང་ཡུན་རིང་བསྒོམས་པའི་ཡིད་འོང་མ།།
     དུང་བའི་མིག་ཟུང་འཁོར་ཙམ་བྱོས་དང་སྙིང་ནས་དྲན་པའི་སྙིང་ཉེ་མ།།
    
     སེམས་ཀྱི་རི་མོ་འདི་ནས་བྲིས་ཡོད་མིག་ཟུང་ཅེར་དང་རིག་རྒྱུ་ཡོད།།
     སྙིང་གི་འཕར་སྒྲ་བྲང་ནས་རྒྱག་ཡོད་རྣ་གཤོག་གློན་དང་གོ་རྒྱུ་ཡོད།།
     ལག་པ་འཇམ་པོ་འདི་གར་རྐྱོངས་དང་རུམ་གྱི་དེ་ཉིད་རེག་རྒྱུ་ཡོད།།
     གོམ་པ་ལྷོད་པོ་འདི་གར་སྤོས་དང་ལམ་གྱི་བར་ཐག་འཇལ་རྒྱུ་ཡོད།།
    
     ཁྱོད་ཀྱི་འཇིག་རྟེན་དག་ཞིང་ཡིན་ན་ཚོགས་གསོག་སྒྲིབ་སྦྱོང་གཉེར་རྒྱུ་ཡིན།།
     ཁྱོད་ཀྱི་ཁོར་ཡུག་དམྱལ་ཁམས་ཡིན་ན་རྐུ་འཕྲོག་ལས་ལ་ཞུགས་རྒྱུ་ཡིན།།
     ཁྱོད་དང་མ་འཕྲད་འཆི་དགོས་བྱུང་ན་ཤི་མིག་གསོན་ལ་ཅེར་རྒྱུ་ཡིན།།
     ཁྱོད་དང་བསྐལ་བའི་གྲུ་ག་འདི་ནས་མི་ཚེ་མི་གཏོང་གནམ་གྱི་ལྷ།།
    
     སྙིང་གི་འཛེར་མ་ཁོག་ཏུ་སྦྲུམ་ནས་ལོ་ཟླ་དུ་མ་འགོར་སོང་ཟིན།།
     དྲན་པའི་ས་བོན་ཤ་ལ་བཏབ་ནས་ཉིན་ཞག་གྲངས་མེད་འདས་སོང་ཟིན།།
     ན་ཟུག་ཅིག་དང་འབྲས་བུ་གཉིས་པོ་ད་ནི་སྨིན་རན་མིག་ཡངས་མ།།
     ངག་དབྱངས་ཤིག་དང་སེམས་རིས་གཉིས་པོ་ད་ནི་སྟོན་རན་མཚོ་ཡི་མིང་།།
    
     དར་མདོའི་མགུར་གླུ་རྣ་བར་ལྷུང་དུས་ཁྱོད་གདོང་ལྷག་ཏུ་དྲན་ཡོང་གི།
     གདན་ཐོག་རི་བོ་མིག་ལ་ཐོགས་དུས་ཁྱོད་ལུས་ཤིན་ཏུ་འཆར་ཡོང་གི།
     གངས་དཀར་རི་བོ་གཡས་སུ་བཞག་ནས་ཁྱོད་ལ་གསོལ་བ་འདེབས་བཞིན་ཡོད།།
     བཞག་བྲ་ལྷ་རྩེ་གཡོན་དུ་བླངས་ནས་ཁྱོད་ལ་སྐྱབས་འཇུག་ཞུ་བཞིན་ཡོད།།
    
     བརྒྱ་ལ་ཁྱོད་དང་འཕྲད་རྒྱུ་མེད་ན་ང་ཡི་མགོ་བོ་དུས་སེ་གཅད།།
     ཅིས་ཀྱང་ཁྱོད་དང་ཐུག་རྒྱུ་མེད་ན་ང་ཡི་དོན་སྙིང་ཧྲིལ་གྱིས་འདོན།།
     ཐག་རིང་དབུས་ཀྱི་ཇོ་ཤྭཀ་མདུན་ནས་སྐྱེ་བ་ཕྱི་མའི་ཕྱི་མ་རུ།།
     ལྷས་ར་ཅིག་གི་ཁྱིམ་ཚང་ཞིག་ནས་སྨོན་ལམ་གསོན་པོ་ད་ནས་འདེབས།།
    
     མིག་ཆུ་བསགས་པ་མང་སོང་མི་ཟེར་རྒྱ་མཚོར་འགྲན་ན་ཐིགས་ཙམ་རེད།།
     སྐྱོ་བ་མྱོང་ནོ་ལྗིད་སོང་མི་ཟེར་རི་བོར་འགན་ན་ཏིལ་ཙམ་རེད།།
     དྲན་པ་སྐྱ་མོ་སྤྲིན་ལ་ཐིམ་དུས་ནམ་མཁའི་དབྱིངས་སུ་ཁྱབ་འགྲོ་གི།
     དུང་བ་མངར་མོ་ཆུ་ལ་འདྲེས་དུས་ཕྱོགས་བཅུ་ཀུན་ལ་བཞུད་འགྲོ་གི།
    
     ཐོད་པའི་གཉེར་རས་མ་ཞིག་བར་དུ་ཁྱོད་ལ་རེ་ཐག་མི་ཆད་པས།།
     མྱི་སེམས་གུད་ཀྱི་བརྩེ་བ་འདི་ལ་རང་ཡང་མཚར་སྣང་སྐྱེས་ཀིན་ཡོད།།
     མདོར་ན་བྲང་གི་སྔུན་རྒྱབ་ཀུན་ན་ཁྱོད་ལ་འཁྲེང་བའི་དྲི་མ་བཙན།།
     ཡིད་ཆེས་མེད་པའི་རྣམ་འགྱུར་མ་གནང་སྙིང་གཅེས་སྙིང་གི་པད་མ་མཚོ།།
    
     སེན་མོ་གོག་པོ་མ་འཐོར་བར་དུ་ཁྱོད་ལ་འཐམ་པ་མི་ལྷོད་པས།།
     གྲོགས་དང་ན་ཟླས་ཧབ་དགོད་བྱས་རུང་མི་གཏོང་སེམས་ཀྱི་ཐག་ཆོད་རེད།།
     མདོར་ན་ལུས་ཀྱི་ཕྱི་ནང་ཀུན་ན་ཁྱོད་ལ་ཞེན་པའི་གྲིབ་མ་འཐུག།
     སེམས་ཀྱི་གཏད་སོ་འགྱུར་གྱི་མ་འདུག་དུང་ཡུལ་དྭངས་མོ་པད་མ་མཚོ།།
    
     མགོ་ཡི་སྤུ་ནག་མ་ཤུད་བར་དུ་ཁྱོད་ལ་གུས་པ་མི་འདོར་བས།།
     སྙིང་དང་མཆིན་པའི་བར་གསེང་འདི་ནས་ཅི་ཞིག་ཁྱོད་ལ་སུ་ཡིས་བྱིན།།
     བསྡུས་ན་ཁོག་པ་སྟོད་སྨད་ཀུན་ན་ཁྱོད་ལ་དགའ་བའི་ཚོར་བ་ལྕི།།
     བྲང་གི་ཤ་ལྗེན་ཐད་ཁར་གློན་དང་གཅེས་ལོ་སྙིང་གི་པད་མ་མཚོ།།
    
     སེམས་གཏམ་རི་མོ་བྲག་ལ་བརྐོས་ན་ཆར་དང་ཆུ་ཡིས་འཇིགས་དོགས་ཀྱིས།།
     ཁོག་པའི་ནང་ཤེད་དམར་ས་ཞིག་ནས་ལོ་ཟླ་ཡུན་རིང་བསྙལ་བ་རྣམས།།
     གློ་བུར་དྲན་པའི་རྐྱེན་སྣ་དྲངས་ནས་ཕྱོགས་ཙམ་ཡིག་རིས་ཕབ་པ་དག།
     སྙིང་གི་བུམ་པར་བསྟུད་མར་སིམ་པའི་རེ་སྨོན་ཆེའོ་མཚོ་ཡི་མིང་།།
    
     ཡིག་རིས་བྱས་པའི་དྲན་གདུང་ཚོར་བ་ཁྲག་གི་ཟབ་སར་འཁྱིལ་ཡོད་ལ།།
     སྙིང་གཏམ་སྨྲས་པའི་ཤུལ་རྗེས་རློན་པ་ཀླད་པའི་མཐུག་སར་ཐིམ་ཡོད་པས།།
     ཚོར་བ་སྣ་མང་ཁུར་པོར་བརྩེགས་པའི་ཁེར་རྐྱང་བདག་གི་སེམས་ནང་ན།།
     གཅིག་ཏུ་དྲན་པ་ཁྱོད་ཉིད་རེད་དོ་གཤིས་བཟང་སྙིང་གི་ཚི་ལུ་མ།།