ན་མོ་གུ་རུ་སྭ་ར་སྭཏྱ་ཡ།
མཛེས་སྡུག་རབ་དཀར་ཆུ་འཛིན་དཀར་པོ་མཁའ་ཡི་དབྱིངས་སུ་རྒྱུ་བ་བཞིན།།
    ལྷབ་ལྷབ་གཡོ་བའི་སྣ་ཚོགས་དར་གྱིས་མཛེས་པར་སྤུད་པའི་གོས་བཟང་ཅན།།
    ཤིན་ཏུ་སྒེག་པའི་ལང་ཚོ་རབ་རྒྱས་འཛུམ་དཀར་རྒོད་པའི་ཚེམས་ཕྲེང་གིས།།
    སྐྱེ་དགུའི་ཡིད་ཀྱི་རྨོངས་མུན་མཐའ་དག་ཅིག་ཅར་བསལ་མཛད་ཁྱེད་ལ་འདུད།།
    བརྒྱད་ཁྲི་བཞི་སྟོང་ཆོས་ཀྱི་སྒོ་མོ་ཀུན།།
    ཏམྦུ་ར་ཡི་རྒྱུད་ལས་ལེགས་དྲངས་ཏེ།།
    ལེགས་བཤད་མགྲིན་པའི་སྒྲ་དབྱངས་སྒྲོག་མཁས་པའི།།
    མི་བཟད་སྤོབས་པ་བདག་ལ་སྩོལ་ཅིག་ཀྱེ།།
    སྒྲིབ་གཉིས་དྲི་མ་རིང་དོར་ནས།།
    ངག་ལ་རང་དབང་བསྒྱུར་བའི་ཕྱིར།།
    ལྷག་པའི་ལྷ་མཆོག་སྒྲ་དབྱངས་མར།།
    སྙན་པའི་དབྱངས་ཀྱིས་བསྟོད་པར་བྱ།།
    འདི་ན་འཕགས་ཡུལ་ད󰭷?་རྗེས་འབྲངས་ཏེ།?།?
    དོན་རྒྱན་སོ་ལྔའི་སྡེབ་ལེགས་ཚིག་གི་ཕྲེང་།།
    བློ་གསར་དོན་གཉེར་བུང་བའི་རོལ་མཚོ་མཆོག།
    སྙན་ཚིག་པད་དཀར་ཆུན་པོ་འདིར་འཇུག་རིགས།།
    （རང་བཞིན་བརྗོད་པའི་རྒྱན།）
    མཚན་དཔེའི་རྒྱན་གྱིས་རབ་ཏུ་བརྒྱན་པའི་སྐུ།།
    ཡན་ལག་དྲུག་ཅུའི་དབྱངས་ལྡན་སྙན་པའི་གསུང་།།
    སྤྲོས་པ་མཐའ་དག་ཉེ་བར་ཞི་བའི་ཐུགས།།
    གསང་གསུམ་རྒྱན་གྱི་བདག་ཉིད་དབྱངས་ཅན་ལྷ།།
    （དཔེ་རྒྱན།）
    ཁྱེད་སྐུ་རབ་མཛེས་སྐྱེ་བོའི་ཡིད་དབང་ཀུན།།
    རང་དབང་མེད་པར་འགུགས་པའི་གསལ་འཚེར་ནི།།
    སྲིད་པའི་གནས་མཆོག་གངས་དཀར་ཏི་སེ་ལ།།
    རྟ་བདུན་བདག་པོའི་ཟེར་གྱིས་ཕོག་དང་མཚུངས།།
    （གཟུགས་ཅན་གྱི་རྒྱན།）
    རབ་དཀར་ཕྱག་གི་ཡལ་ག་རྒྱས་པའི་རྩེར།།
    རྣམ་པར་གཡོ་བའི་སོར་མོའི་ལྕུག་ཕྲན་གྱིས།།
    རིན་ཆེན་རྒྱུད་མངས་དཀྲོལ་བའི་འདབ་བརྒྱ་བཞད།།
    དབྱངས་ཅན་དཔག་བསམ་དབང་པོ་དེ་ལ་བསྔགས།།
     （གསལ་བྱེད་ཀྱི་རྒྱན།）
    མཛེས་པའི་སྐུ་ཡིས་ལུས་ཅན་འདྲེན་བྱེད་དང་།།
    སྙན་པའི་གསུང་གིས་སྐྱེ་བོའི་ཐོས་འཛིན་ལ།།
    བརྩེ་བའི་ཐུགས་ཀྱིས་ཡིད་ལ་རྟོག་པ་སོགས།།
    རྨད་བྱུང་གསང་བ་གསུམ་གྱི་དགའ་བདེ་སྦྱིན།།
    （བསྐོར་བའི་རྒྱན།）
    སྐུ་ཡི་མཛེས་པས་མིག་ལ་བདེ་བ་སྟེར།།
    རྒྱུད་མངས་དབྱངས་ཀྱིས་སྙན་ལ་བདེ་བ་སྟེར།།
    རྗེས་སུ་བཟུང་བས་ཡིད་ལ་བདེ་བ་སྟེར།།
    རྟོག་པ་གྲོལ་བས་དུས་ཀུན་བདེ་བ་སྟེར།།
    （འགོག་པའི་རྒྱན།）
    ཁྱེད་ཉིད་རྒྱུན་དུ་ཡིད་ལ་བཅངས་པ་ཡིས།།
    ཤིས་བྱའི་བློ་གྲོས་རྒྱས་པའི་གཏམ་ཏེ་རྫུན།།
    འོན་ཀྱང་སྙན་པའི་དབྱངས་ཀྱི་རྩལ་དེ་ཡིས།།
    སྐྱེ་བོ་འགའ་ཡིས་ཤེས་བྱ་རྟོགས་ཀྱང་སྲིད།།
    （དོན་གཞན་བཀོད་པའི་རྒྱན།）
    ཁྱོད་ཀྱི་མཛེས་སྐུ་ཆ་ཤས་རེ་རེས་ཀྱང་།།
    ཆགས་ལྡན་སྐྱེ་བོའི་ཡིད་ཀྱི་བརྟན་པ་འཕྲོག།
    ཆར་ལྡན་དུས་ཀྱི་དབྱར་སྐྱེས་རྔ་གསང་གིས།།
    གཙུག་ཕུད་ཅན་གྱི་སྒྱུ་རྩལ་ངོམ་ལ་ལྟོས།།
    （ལྡོག་པ་ཅན་གྱི་རྒྱན།）
    མཛེས་འཛུམ་ལང་ཚོ་དར་བའི་འཇོ་སྒེག་དང་།།
    རབ་རྒྱས་ནུ་འབུར་ཟུང་གི་དཔལ་མཐོང་ཚེ།།
    ཆགས་ལྡན་སྐྱེ་བོའི་དྲན་པ་ཉམས་པ་དང་།།
    ཆགས་བྲལ་ཡིད་ལ་སྟོང་པའི་རྣམ་པ་བཀྲ།།
    （སྲིད་པ་ཅན་གྱི་རྒྱན།）
    བྱེད་པོས་མ་བཀུག་སྨིན་མའི་རྩེ་མོ་འཁྱོག།
    བཀྲུས་པ་མིན་ཀྱང་སྒྲིབ་གཉིས་དྲི་མ་དག།
    དུང་གིས་མ་བྱུག་དཀར་ལ་འཚེར་བའི་མདོག།
    སྐྱེ་དགུའི་ཡིད་ལ་བདེ་སྟེར་ཚངས་སྲས་མ།།
    （བསྡུས་བརྗོད་ཀྱི་རྒྱན།）
    མི་གཙང་ལྗན་ལྗིན་ཁྲོད་ན་རྣམ་ཀུན་ཏུ།།
    འདྲེས་ཤིང་འགྲོགས་པའི་འབྱུང་ཁུངས་ཡིན་མོད་ཀྱང་།།
    འདམ་རྫབ་སྐྱོན་གྱིས་མ་གོས་པད་མོ་ཡིས།།
    སྐྱེ་བོ་ཀུན་ལ་དགའ་བདེའི་དཔལ་སྟེར་མཆོག།
    （ཕུལ་བྱུང་གི་རྒྱན།）
    ཁྱེད་ཀྱི་ཕྱག་སོར་རྩེ་མོའི་རྒྱུད་མངས་ལས།།
    བརྒྱད་ཁྲི་བཞི་སྟོང་ཆོས་ཀྱི་རང་སྒྲ་ཀུན།།
    ཅིག་ཅར་སྒྲོགས་པའི་སྙན་གྱི་དགའ་སྟོན་ཅན།།
    འདི་འདྲ་འཇིག་རྟེན་མེས་པོས་སྟེར་ནུས་མིན།།
    （རབ་བཏགས་ཀྱི་རྒྱན།）
    ཟག་མེད་བདེ་བ་སྟེར་བའི་ནུ་འབུར་ཟུང་།།
    ལྷབ་ལྷུབ་གཡོ་བའི་དར་དཀར་སྟོད་གཡོགས་ཀྱིས།།
    བསྒྲིབས་པ་མིན་ཚེ་ཚངས་སྤྱོད་ལྡན་པ་དག།
    དམ་བཅའ་ཉམས་པའི་རྒྱུ་རུ་འགྱུར་བར་དོགས།།
    （རྒྱུ་ཡི་རྒྱན།）
    ངག་གི་དཔལ་འཛིན་འཚོ་བྱུང་ལྷ་མོ་ཡི།།
    ཚད་མེད་སྙིང་རྗེ་བརྩེ་བ་ཆེན་པོ་ཡིས།།
    རྣམ་པར་དཔྱོད་པའི་བློ་གྲོས་རབ་རྒྱས་ཏེ།།
    འཆད་རྩོད་རྩོམ་པའི་དངོས་གྲུབ་བདག་ལ་ཐོབ།།
    （ཕྲ་མོའི་རྒྱན།）
    རླབས་ཀྱིས་གཡོ་བའི་ནོར་བུའི་འབྱུང་གནས་ནས།།
    རྒྱུ་སྐར་རྒྱལ་པོའི་འོད་དཀར་འཕྲོས་པའི་ཚེ།
    ཡིད་ལ་བསིལ་བའི་བདེ་བ་ཅི་ཡང་བྱིན།།
    （ཆའི་རྒྱན།）
    ཉིན་མཚན་དུས་དྲུག་སྐྱེ་བོ་ཀུན་ལ་བལྟ།།
    བརྗོད་བྱའི་དོན་མང་རྒྱུད་མངས་སྒྲ་ལས་དྲངས།།
    དལ་དུ་མེད་པའི་ལྷ་མོ་ཁྱེད་ནི་སྡུག།
    རང་དོན་བོར་ནས་གཞན་དོན་ཁོ་ནར་གཡེང་།།
    （རིམ་པ་ཅན་གྱི་རྒྱན།）
    སྐུ་ཡི་མཛེས་སྡུག་གསུང་གི་དབྱངས་སྙན་པོ།།
    ཐུགས་ཀྱི་བརྩེ་བའི་བདག་ཉིད་མ་ལུས་པ།།
    པད་དཀར་སྡོང་བུ་དྲི་ཟའི་གླིང་བུ་དང་།།
    སྤྱན་རས་གཟིགས་ཀྱི་ཐུགས་ལས་བརྐུས་པར་ངེས།།
    （དགའ་བའི་རྒྱན།）
    འདབ་བརྒྱད་པད་དཀར་ཟླ་བའི་གདན་གྱི་སྟེང་།།
    མཉེན་ལྕུག་འཁྲིལ་ལྡེམ་གར་གྱི་ཉམས་འགྱུར་ཅན།།
    རིན་ཆེན་སྣ་ཚོགས་རྒྱན་གྱིས་ལེགས་སྤུད་པའི།།
    ལྷ་ཁྱོད་མཐོང་ལས་དགའ་བ་གཞན་ཡོད་མིན།།
    （ཉམས་ལྡན་གྱི་རྒྱན།）
    དཀའ་བའི་གནད་ཀྱི་གསང་དོན་འགྲོལ་དཀའ་བའི།།
    སྙན་ཚིག་ངག་གི་དཔལ་གྱིས་རབ་དབུལ་ཚེ།།
    དབྱངས་ཅན་ཁྱོད་ཀྱི་གསང་གསུམ་མཐོང་བ་ན།།
    བདག་གི་བློ་གྲོས་ཟབ་གསལ་མྱུར་བར་གྱུར།།
    （གཟི་བརྗིད་ཅན་གྱི་རྒྱན།）
    ངག་དབང་དབྱངས་ཅན་ལྷ་མོ་ཁྱོད་ཉིད་ཀྱིས།།
    རྣམ་ཀུན་བརྩེ་བས་རྗེས་སུ་བཟུང་བའི་ཕྱིར།།
    ཆགས་ཐོགས་བྲལ་བའི་སྙན་ཚིག་གཞུང་བརྒྱ་ལ།།
    ངལ་བར་སྙམ་པའི་དོགས་པ་བདག་ལ་བྲལ།།
    （རྣམ་གྲངས་བརྗོད་པའི་རྒྱན།）
    མེས་པོས་རྗེས་སུ་བཟུང་བའི་སྐྱེས་བུ་ཁྱོད།།
    ཚངས་པའི་སྲས་མོ་འདི་ལ་མཆོད་པར་གྱིས།།
    བདག་ནི་དྲི་ཟའི་ཡུལ་གྱི་མཛེས་སྡུག་ལ།།
    བལྟ་ཕྱིར་རི་བོའི་སུལ་དུ་བསྐོར་བར་འགྲོ།།
    （ཀུན་ཕན་གྱི་རྒྱན།）
    ངག་གི་དཀའ་གནད་གྲོལ་བའི་སྙན་ཚིག་གིས།།
    གཞན་ཡིད་འཕྲོག་པའི་སྨྲ་ལྕེ་འཚོལ་བའི་ཚེ།།
    གློ་བུར་ཡིད་ཀྱི་གསང་བ་ལས་བྱུང་བའི།།
    རྒྱུད་མངས་སྒྲ་ལས་ཤེས་བྱའི་གསང་ཀུན་ཐོས།།
    （རྒྱ་ཆེ་བའི་རྒྱན།）
    ཆུ་སྐྱེས་པད་དཀར་ཟླ་གཞོན་གདན་ལ་བཞུགས།།
    རིན་ཆེན་སྣ་ཚོགས་གོས་བཟང་རྒྱན་དུ་བྱས།།
    ཇི་སྙེད་ཤེས་བྱའི་དོན་ཀུན་དབྱངས་སུ་ལེན།།
    སྣ་ཚོགས་ཐབས་ཀྱིས་འགྲོ་ཀུན་སྐྱོང་འདི་བརྗིད།།
    （བསྙོན་དོར་གྱི་རྒྱན།）
    ཁྱོད་ནི་སྐྱེ་དགུའི་སྙན་ལ་བདེ་སྟེར་བའི།།
    སྙན་ཚིག་མགྲིན་པར་འཁྱུད་པ་མི་བདེན་ཡང་།།
    བཟོ་རྩལ་མཁས་པའི་ཁྱད་ཆོས་ལས་ཐོན་པའི།།
    རྒྱུད་མངས་དཀྲོལ་ལ་ཅུང་ཟད་གོམས་པར་ངེས།།
    （སྦྱར་བའི་རྒྱན།）
    རབ་གསལ་ཟླ་བ་དཀར་པོའི་མདངས་འཛིན་ཅིང་།།
    སྙན་པ་ཕྱོགས་བཅུར་སྒྲོག་པའི་སྒྲ་དབྱངས་ཅན།།
    མཚོ་ལས་བྱུང་ཞིང་སྲིད་འདིའི་རྒྱན་གྱི་མཆོག།
    ཀུན་གྱི་སྙན་ལ་བདེ་བ་སྟེར་འདིར་བསྔགས།།
    （ཁྱད་པར་བརྗོད་པའི་རྒྱན།）
    འདྲིས་པ་མིན་ཡང་ཀུན་གྱི་ཡིད་དུ་འོང་།།
    བཀྲུས་པ་མིན་ཡང་དྲི་མས་རབ་ཏུ་དབེན།།
    མི་མོ་མིན་ཡང་མི་ཡི་མཆོད་པའི་གནས།།
    དཔུང་ཚོགས་མེད་ཀྱང་བདུད་ཀྱི་སྡེ་ཚོགས་བཅོམ།།
    （མཚུངས་སྦྱོར་གྱི་རྒྱན།）
    རི་བོ་ཏ་ལར་སྤྱན་རས་གཟིགས་དབང་དང་།།
    བྷོ་ཊའི་ཡུལ་གྱི་གངས་དཀར་ཏི་སེ་དང་།།
    དྲི་ཟའི་སྒེག་མོ་སྒྲ་དབྱངས་སྙན་མོའི་སྐུ།།
    མཛེས་འཛུམ་དཀར་པོའི་མདངས་འཛིན་གང་དེར་བསྟོད།།
    （འགལ་བའི་རྒྱན།）
    ལྷ་མོ་ཁྱོད་ཀྱི་ཞལ་སྒོ་ལས་བྱུང་བའི།།
    དྲུག་ཅུ་རྩ་བཞིའི་དབྱངས་ཀྱི་སྒྱུ་རྩལ་དེར།།
    ཐར་འདོད་སྟོང་ཉིད་ཆོས་ཀྱི་གླུ་དབྱངས་དང་།།འགའ་ཞིག་རིག་བྱེད་བཞི་ཡི་གཏམ་དུ་གོ།
    （སྐབས་མིན་བསྟོད་པའི་རྒྱན།）
    ཚངས་པའི་རིགས་ཀྱི་རྒྱུད་པ་འཛིན་པ་དང་།།
    སྐྱེ་བོ་ཀུན་གྱི་མ་རིག་རྨོངས་པ་བསལ།།
    ཉིན་མཚན་ཀུན་ཏུ་གཞན་དོན་སེམས་པ་ལས།།
    རང་དོན་ལྟོ་གོས་རྒྱུ་ནོར་འཛོམས་རྣམས་སྐྱིད།།
    （ཟོལ་བསྟོད་ཀྱི་རྒྱན།）
    ཁྱོད་ཀྱི་སོར་མོའི་རྩེ་ཡི་རྒྱུད་མངས་སྒྲས།།
    སྐྱེ་བོ་ཡོངས་ལ་སྙན་པའི་བདེ་སྟེར་བ།།
    ལེགས་པ་མིན་པས་སྲེད་ལྡན་གང་ཟག་རྣམས།།
    ཆགས་བྲལ་ལམ་དུ་འཁྲིད་པ་མ་ཡིན་ནམ།།
    （ངེས་བསྟན་གྱི་རྒྱན།）
    གཉེན་ལྕུག་གར་གྱིས་གཡོ་བའི་ཕྱག་ཟུང་གི།
    དྲུག་འགྱུར་སྙན་པའི་སྒྲ་ཡིས་འཇིག་རྟེན་ཀུན།།
    ཐོས་པར་སྒྲོགས་ལ་ལྷོད་མེད་བརྩོན་པ་དེས།།
    སྟོང་ཉིད་ཆོས་ཀྱི་རང་སྒྲ་སྒྲོག་པ་སྟོན།།
    （ལྷན་ཅིག་བརྗོད་པའི་རྒྱན།）
    དབྱངས་ཀྱི་རྒྱལ་མོ་ཁྱོད་ཀྱི་བཞིན་མདངས་དང་།།
    སྟོན་གྱི་ཉ་གང་ཟླ་བ་ལྷན་ཅིག་དཀར།།
    སོར་རྩེའི་རྒྱུད་མངས་སྙན་པོའི་སྒྲ་དབྱངས་དང་།།
    བདག་གི་མགྲིན་པའི་རྩ་མདུད་ལྷན་ཅིག་གྲོལ།།
    （ཡོངས་བརྗེས་ཀྱི་རྒྱན།）
    གསང་གསུམ་མི་བཟད་དབྱངས་ཀྱི་རྒྱལ་མོ་ལ།།
    རྣམ་གསུམ་དད་པའི་ངག་གིས་རབ་བསྟོད་པས།།
    ཇི་ལྟ་ཇི་སྙེད་རབ་འབྱམས་ཤེས་བྱ་ལ།།
    འཇུག་པའི་གསུང་གི་སྣང་བ་བདག་ལ་ཐོབ།།
    （ཤིས་བརྗོད་ཀྱི་རྒྱན།）
    ལྷ་མོ་ཁྱོད་ལ་དད་ཅིང་བསྟོད་པའི་མཐུས།།
    སྙན་ཚིག་མགྲིན་པའི་རྒྱན་གྱུར་མཛེས་པའི་མཆོག།
    སྨྲ་བའི་འབབ་སྟེགས་ཐོགས་མེད་གཡོ་ནུས་པའི།།
    དགེ་ལེགས་སྣང་བས་ཕྱོགས་ཀུན་ཁྱབ་གྱུར་ཅིག།
    （རབ་སྤེལ་གྱི་རྒྱན།）
    ཁྱོད་སྐུ་རབ་མཛེས་ཟླ་བའི་དཀྱིལ་འཁོར་བཞིན།།
    གསུང་དབྱངས་ཀ་ལ་པིངྒའི་ལེགས་བཤད་སྙན།
    ཐུགས་ཀྱི་མཁྱེན་པ་སྲིད་འདིར་མི་ཤོང་བའི།།
    མཁྱེན་པའི་གཏེར་མཛོད་ལྷ་མོ་མཆོག་ལ་བསྟོད།།
    （དགོངས་པ་ཅན་གྱི་རྒྱན།）
    འཕགས་པའི་ཡུལ་གྱི་ངག་རིག་སྨྲ་བའི་གཙུག་གི་རྒྱན་གཅིག་དབྱུག་པ་ཅན་ཞེས་སློབ་དཔོན་གང་གི་དགོངས་བཞེད་ཇི་བཞིན་རབ་མཛེས་པའི།།
    རྣམ་མང་རྒྱན་གྱིས་ཀུན་ནས་ཕྱུག་པའི་མེ་ལོང་མ་ཞེས་སྲིད་འདིར་གྲགས་སྙན་དོན་དང་ལྡན་པའི་སྤེལ་ལེགས་ཚིག་གིས་ཀུན་ནས་བརྒྱན།།
    ཚེ་རབས་ཀུན་ཏུ་ཤེས་བྱ་ཀུན་ལ་འཇུག་སྒོ་ཡངས་ཤིང་ཐོས་འཛིན་ཡུལ་ལ་བདེ་བ་སྟེར་ཕྱིར་ལྷག་པའི་ལྷ་མཆོག་དབྱངས་ཅན་མར།།
    བསྟོད་པར་བགྱིས་པས་ཇི་ལྟ་ཇི་སྙེད་རབ་འབྱམས་ཤེས་བྱའི་ངག་ལ་དབང་འབྱོར་དགེ་མཚན་འབུམ་གྱི་འཇིག་རྟེན་ཀུན་ཏུ་ཁྱབ་པར་སྨོན།།
    མཛེས་མཛེས་ཟླ་གཞོན་འབུམ་གྱིས་འཁྱུད་པའི་སྐུ།།
    སྙན་སྙན་དྲུག་ཅུའི་དབྱངས་ལྡན་རྒྱུད་མངས་སྒྲ།།
    གསལ་གསལ་ཇི་སྙེད་ཤེས་བྱའི་གནས་ལུགས་དོན།།
    འགྲིག་འགྲིག་གཏམ་གྱི་སྦྱོར་བས་མཚོན་པར་བྱས།།ངག་གི་འདབ་བརྒྱ་གྲོལ་བའི་སྙན་ཚིག་གི།
    སྒོ་བརྒྱ་འབྱེད་པའི་ལྡེ་མིག་འཚོལ་འདོད་རྣམས།།
    ངག་དབང་དབྱངས་ཀྱི་ལྷ་མོར་བསྟོད་བྱས་ན།།
    དཀའ་གནད་མདུད་པའི་ལྕགས་སྒྲོག་གྲོལ་བར་ངེས།།
    ཚེ་རབས་གཏན་གྱི་ལྷག་པའི་ལྷ་མཆོག་རྨད་བྱུང་དབྱངས་ཀྱི་བདག་ཉིད་དེར།།
    སྡེབ་ལེགས་ཚིག་གི་སྙན་འགྱུར་རོལ་མོ་ཚངས་པའི་དབྱངས་ཀྱིས་རབ་བསྟོད་པས།།
    སྲིད་གསུམ་འགྲོ་བའི་ངག་གི་དྲི་མ་ཅིག་ཅར་འདག་པའི་གངྒྰའི་རྒྱུན།།
    ལོངས་སུ་སྤྱོད་དེ་ཅི་དགར་སྨྲ་བའི་སྤོབས་པའི་རྒྱན་གྱིས་མཛེས་གྱུར་ཅིག།
    སྐྱེ་མེད་སྟོང་པའི་དབྱངས་ཀྱི་ང་རོ་ལས།།
    རྣམ་མང་དོན་གྱི་རང་ཞལ་འགོག་མེད་དུ།།
    སྟོན་པའི་མེ་ལོང་ལ་བསྟེན་ཆོས་ཉིད་ཀྱི།།
    གནས་ལུགས་དོན་གྱི་རང་ཞལ་མཇལ་བར་ཤོག།