བཟང་བསྟོད།
སྐུ་ལུས་ས་བརྟོལ་ལྗོན་པའི་་ཡལ་འདབ་ལས།།
འཕྲིན་ལས་རྟ་བདུན་དབང་པོ་འོད་ཆིམ་ཆིམ།།
ཁྲི་སྡེ་ཆུ་གཏེར་དབང་པོའི་ཁྱོན་ཡངས་ནས།།
བསྟོད་ཚོགས་སྒྲ་བརྒྱའི་དཔལ་ཡོན་ལྡིར་རི་རི།།
ངན་སྨད།
ཤེས་མེད་འདོད་རྔམས་ཅན་གྱི་འཁོར་བ་པས།།
ནོར་འཛིན་སྒེག་མོའི་ཁོག་བཏོན་རྨ་ཤུལ་བཏོད།།
གང་དེ་གདུག་རྩུབ་མནར་གཅོད་མ་བཟོད་པས།།
སྤྲུགས་ཤིང་གསིག་པས་མྱ་ངམ་ཐང་དུ་སྒྱུར།།
དྲན་གསོ།
ལྷུན་བརྗིད་ཀེ་ལ་ཤ་ཡི་ཕྲག་པ་ན།།
དཀར་མཛེས་བསིལ་སྦྱིན་རྒྱལ་པོ་གསལ་ལྷམ་མེར།།
རབ་འབྱམས་སྟོང་གསུམ་ཁམས་ཀྱི་ནང་སྙིང་ལ།།
དྲིན་ཆེན་ཨ་མའི་འཛུམ་མདངས་བྱམས་ཤར་རེ།།
 
འཇིགས་མེད་སྟོབས་དང་ལྡན་པའི་མེས་རྒྱལ་གྱིས།།
དབུལ་ཕོངས་གང་དུ་ལྡན་པའི་ས་ཕྱོགས་ལ།།
ཐུགས་བརྩེ་ཟབ་མོས་གང་ལ་གང་འཚམ་གྱིས།།
རྒྱུ་འབྱོར་སྲིད་དབང་གནང་འདི་ཨེ་མ་ཧོ།།
 
སྙིང་རྗེ་མེད་པའི་དྲག་ཆར་ཤྭ་འོད་ཀྱིས།།
ཉམ་ཐག་འཁོར་བ་པ་རྣམས་སྡུག་ལ་སྦྱར།།
གོས་སེར་སྐར་ལྔའི་དར་དམར་དཔུང་ཚོགས་ལས།།
བསྐྱབ་དང་རེ་ས་གཞན་ཞིག་གང་དུ་མཆིས།།
ཡི་རངས།
ཁྲག་ཁྲིག་སྐྱེ་བོ་འདུས་པའི་ཀློང་ཡངས་ནས།།
ཚོགས་གཉིས་བསགས་སྦྱང་སྐྱེས་བུས་སྣུམ་འབར་རེ།།
དྲི་ངན་ཞེ་ཁ་ལོག་བའི་འདམ་རྫབ་ཁྲོད།།
པད་སྡོང་ཡིད་དབང་འཕྲོག་པས་མཚར་རྒོད་རེ།།
སྨོན་པ།
དགེ་དང་མི་དགེའི་བླང་དོར་གནས་ལ་མཁས་ཤིང་ཡོན་ཏན་ཁུར་པོས་རབ་ཏུ་ལྕི།།
ལེགས་པའི་གོམས་གཤིས་རྒྱུད་ལ་བྱང་དུ་ཆུབ་ཅིང་བརྩེ་བ་ཆེན་པོས་གཞན་ཕན་སེམས།།
དཔལ་ཡོན་གཉིས་ལྡན་ལམ་དུ་དད་བརྩོན་བསྐྱེད་ཅིང་ཕྱིར་མི་ལྡོག་པའི་གོམ་སྟབས་བརྟན།།
བཟང་ཆ་ལེགས་དགུ་མ་ལུས་ལྷན་གཅིག་འཛོམས་པའི་ངན་སྤོང་བུ་ཁྱོད་རྒྱལ་གྱུར་ཅིག།