སྤུ་སྡུག་འདབ་ཆགས་རང་རང་གནས་སུ་འཕུར། །
ཉིན་བྱེད་དབང་པོ་ཆུ་ལྷའི་ཕང་བར་ནུབ། །
མུན་པའི་དཔུང་ཤེད་དལ་གྱིས་མངོན་པའི་ཚེ།  །
ད་དུང་རེ་བའི་མིག་ཟུང་ལྷོད་མ་གྱུར། །
 
དཀར་གསལ་ཟླ་བའི་འོད་དང་ཉེར་འགྲོགས་པའི། །
གནག་སྣུམ་ལམ་བུ་རིང་མོར་ཧད་ཀྱིས་ཅེར། །
གཡོ་དང་རྫུན་ཚིག་མེད་པའི་ཡིད་ཆེས་ཀྱིས། །
གྲང་ལྷགས་རྣོན་པོའི་སོ་ལ་ཁུ་ཚུར་བྱིན། །
 
རྒྱུ་སྐར་བྱེ་བའི་གདོང་འབག་སྔར་ལས་ལྕི། །
ཟླ་བ་ལྷ་མོ་ངལ་བའི་སྟབས་ཀྱིས་རྒྱུ། །
ལྷགས་རླུང་ལྡང་བའི་ང་རོ་རྣ་བར་གཟན། །
ད་དུང་ཐག་རིང་སྐུ་མགྲོན་བསླེབ་མ་བྱུང་། །
 
སློག་ཧྲུལ་གོང་ཁ་བསྣོལ་བའི་ཟུར་ཞིག་ཏུ། །
མེ་སྟག་ཕྲ་མོ་རྒྱུ་འདྲའི་འོད་ཅིག་མཐོང་། །
གསལ་བའི་མིག་གི་ཧད་ཀྱིས་བལྟས་པ་ན། །
ཚུར་ཚུར་འོང་བའི་རྣམ་པ་བློ་ལ་གསལ། །
 
ཕྱོགས་ཀྱི་ཁོར་ཡུག་མ་ལུས་འོད་ཀྱིས་བཀང་། །
དུང་སྒྲ་རྩུབ་མོའི་ངར་སྐད་སྙིང་ལ་གནོད། །
ལག་པ་ཐོད་ལ་གེར་ནས་བལྟས་པའི་ཚེ། །
མགྲོན་པོ་གཅིག་ཀྱང་འབབ་པ་ངས་མ་མཐོང་། །
 
འུ་ཐུག་སེམས་པ་ལག་པས་སྐྱོར་བཞིན་དུ། །
རེ་སྒུག་ཟབ་མོའི་འདྲེན་བྱེད་ས་ལ་ལྷུང་། །
སྐུ་མགྲོན་ད་དུང་སླེབས་པ་མ་གྱུར་ན། །
ནམ་གུང་ཆུ་ཚོད་བཅུ་གཉིས་འདས་ལ་ཉེ། །
 
སྐུ་མགྲོན་སྐུ་མགྲོན་ད་ལྟ་མྱུར་དུ་ཕེབས། །
དོ་ནུབ་མཚན་མོའི་དུས་ལས་ཡོལ་གྱུར་ན། །
རླབས་ཆེན་བྱ་བའི་མགོ་འདྲེན་སུ་ཡིས་བྱེད། །
མི་ཁའི་ངོ་ཚ་འདི་དག་སུ་ཡིས་འཁུར། །
 
ཨ་ཨ་སྐུ་མགྲོན་ལམ་འདིའི་སྣེ་ཞིག་ན། །
ཁྱོད་ཀྱི་རླངས་འཁོར་ཡོད་མེད་ངས་མི་ཤེས། །
འོན་ཏེ་བདག་སེམས་དམར་པོའི་ཟུར་ཞིག་ན། །
ཁྱོད་རང་ཕེབས་པའི་སྣང་བ་ལྷམ་མེར་བཀྲ། །
 
ལག་པའི་སོར་རྩེ་འཁྱགས་ནས་སྙིང་ལ་ཟུག །
སྙིང་གི་ན་ཟུག་རིང་མོ་ཕྱི་ལ་ཤོར། །
ཕྱི་ཡི་ལྷགས་རླུང་སྟོབས་ལ་ངར་ཤུགས་བསྐྱེད། །
ད་ལྟ་རང་ཤག་སྙེག་དགོས་བཙན་གྱིས་བྱིན། །
 
སྒོ་ཡི་ཟྭ་ཆེན་ལག་པས་འབྱེད་འདོད་ཀྱང་། །
ལྕུག་ལྕུག་འདར་བའི་ཚུལ་ལས་འགོངས་མ་ནུས།།
སྒོ་ལ་ལྟག་རྒྱབ་བསྔས་ནས་ངལ་གསོས་མོད། །
ད་དུང་སེམས་པ་དམར་པོ་ཕྱི་ལ་ཤོར། །
 
མུན་པའི་ཀློང་དུ་ཅི་ཡང་མཐོང་དཀའ་བས། །
གློག་སྒྲོན་སྐུད་པའི་སྣེ་མོ་ལག་པས་བཙལ། །
གློག་ཞུན་འོད་ཀྱི་མུ་ཏིག་འཚེར་ན་ཡང་། །
རབ་རིབ་མིག་ལ་དངོས་རྣམས་གསལ་མ་གྱུར། །
 
འཇམ་པའི་མལ་དུ་བདེ་བར་མནལ་གྱུར་ཀྱང་། །
ཅོར་ཅོར་རྣ་ཡི་དབང་ཤེས་ཕྱི་ལ་གཏད། །
ཁྱོད་ཀྱི་རྡོག་སྒྲ་སྙན་མོར་བསྒུགས་བསྒུགས་ནས། །
དངོས་དང་རྨི་ལམ་དབྱེ་བའི་ཁྱད་མ་ཤེས། །
 
དུས་དེར་སྐུ་མགྲོན་འཛུམ་པའི་རྒྱ་གྲོལ་ཏེ། །
ནོར་བུའི་སྐྱེས་བཟང་ཐོགས་ནས་ཚུར་འོང་བས། །
ང་རང་དགའ་སྟེ་ངག་ལས་སྐད་མ་ཐོན། །
འཕྲུལ་སྣང་རྨི་ལམ་ཡིན་པ་སུ་ཡིས་རྟོགས། །
 
སྐྱ་རེངས་སྒེག་མོ་འཛུམ་པའི་ཟུར་མིག་གིས། །
རྟ་ལྗང་བདག་པོ་ཤར་རིའི་རྩེ་ལ་དྲངས། །
འཛམ་གླིང་འཛིན་མར་སྣང་བའི་དཔལ་གྱིས་ཕྱུག །
འོན་ཀྱང་སྐུ་མགྲོན་རིང་ནས་སླེབས་མ་བྱུང་། །
 
ད་ནི་རེ་བའི་ཁོ་ཐག་རྨང་ནས་ཆད། །
རྫུན་ཚིག་འཕྱོན་མའི་འདོམས་ཀྱི་གསང་གནས་རྙེད། །
དོན་མེད་སྟོང་བསླུས་བྱས་པའི་གྲྭ་རྒན་ང་། །
ཆར་རླུང་ཤེད་ཀྱིས་གཙེས་པའི་དར་ལྕོག་ཅིང་། །
 
ད་ལྟ་རེ་བའི་རྨི་ལམ་སུ་ལ་ཞུ། །
ད་ལྟ་སེམས་ཀྱི་རྨ་ཁ་གང་གིས་གསོ། །
དོན་མེད་ས་ལས་བླངས་པའི་མནར་སྡུག་འདི། །
སྔོན་བསགས་ལས་ཀྱི་རྣམ་སྨིན་ཡིན་ནམ་ཅི། །
 
མི་ལོ་ཉེར་བཞིའི་ཡུན་ལ་བཟང་ངན་གྱི། །
གྲོགས་དང་ཕན་ཚུན་འགྲོགས་འདྲིས་མང་ན་ཡང་། །
 ལེགས་ཉེས་སྤང་བླང་འབྱེད་པའི་སྟོབས་མ་མཆིས། །
མཆོག་གསུམ་ལྷ་ཡིས་བདེན་པའི་བྱིན་རླབས་སྩོལ། །
 
བྱིས་པའི་ངག་ཚིག་ལྷ་ཡི་ལུང་བསྟན་དུ། །
འཛིན་པའི་གླེན་རྒན་འདི་ཚོ་སྙིང་རེ་རྗེ། །
ལེགས་ཉེས་རྣམ་དཔྱོད་རྩལ་གྱིས་མ་ཟིན་ནས། །
ཡོད་ཚད་གཞན་གྱི་ཟེར་སྒྲོས་ཉིད་དང་བསྟུན། །
 
དེ་རིང་ཕམ་ཁའི་རྒྱ་ལས་མ་ཐར་ཡང་། །
སང་ཉིན་རྒྱལ་ཁ་མེད་པ་ག་ལ་ཡིན། །
ལོ་ཞིག་ཡུན་གྱིས་བསྲིངས་པའི་ཕ་རོལ་དུ།།
འཕྲུལ་སྣང་བདེན་པར་སྒྲུབ་པའི་དམ་ཚིག་ཡོད།།
རྩོམ་སྒྲིག་པ་ཨོ་རྒྱན་དོན་གྲུབ།