སྐྱེས་བུ་དད་བརྩོན་ཅན་གྱི་ལས་བྱས།
ལས་ལ་བརྩོན་ཞིང་དཔའ་ངར་ཆེ་བསྐྱེད་ཅིང་།།
ཁྱོན་ཡོངས་བལྟ་རྟོག་སྒོ་གསུམ་བྱ་སྤྱོད་དག།
ཆོས་སྲིད་མི་འགལ་རྒྱུ་འབྲས་ཚུལ་བཞིན་བསྲུང་།།
འཕྲལ་ཕུགསབདེ་ཞིང་ལ་རྒྱའི་རྒྱལ་མཚན་སྒྲིང་།།
 
རིགས་གསལ་བློ་ལྡན་ཅན་གྱི་སྐྱེས་བུ་དེས།།
ཉིན་མཚན་དུས་དྲུག་རང་བྱས་ཞིབ་བཤེར་བགྱི།།
འཕྱུགས་ཙམ་བྱུང་ཡང་ཟླ་བ་སྤྲིན་བྲལ་བཞིན།།
མཛད་སྤྱོད་དྭངས་གཙང་ཡོ་བ་དྲང་བསྲང་ནུས།།
 
ཡན་གནས་དམ་པ་གངས་སྟོད་གདོང་ལྔ་བཞིན།།
མཐུ་སྟོབས་རྣམ་རྒྱལ་འཁོར་ངན་དཔའ་བཀོང་ཞིང་།།
རང་ཚུགས་བཟུང་ཞིང་ཀྲོང་ངེར་གངས་རྩེར་འགྱིང་།།
ནང་ནས་མ་རུལ་ཕྱི་དགྲས་ཉེན་ཅིའི་ཐེབས།།
 
སྐྱེ་བོ་ཁོག་ཆུང་ངན་གཡོ་ཅན་གྱི་ལས་བྱས།
དེང་འདིའི་ང་རྒྱལ་ཁེངས་རློམས་སྐྱེ་བོའི་ཚོགས།།
རྒྱུ་འབྱོར་ཡན་ས་ཏོག་ཙམ་ཐོབ་པ་དང་།།
གཞན་ལ་ཁྱད་གསོད་ཟུར་ཟའི་མདའ་འཁྱམས་འཕེན།།
གྲགས་པ་ཉམས་སུ་བགྱི་འདི་དགོད་རེ་བྲོ།།
 
སྐྱེས་བུ་ན་ཆུང་ལ་གདམས་པ།
ན་ཕྲ་སོ་སྒོ་མཛེས་པའི་གཞོན་ནུ་ཚོ།།
མྱོང་བ་ཉུང་ཕྱིན་འཁྲུལ་ནོར་ཡོང་སྲིད་ཀྱིས།།
རྒྱུན་པར་རང་ལས་བརྟག་ཞོར་བྱས་པས་ན།།
ན་རྒས་དུས་སུ་ཐམས་ཅད་མཁྱེན་དང་ཉེ།།
 
སྤྱི་ཚོགས་ཀྱི་རང་མདངས་།
གྱ་གྱུ་ཅན་གྱི་སྤྱི་ཚོགས་བགྲོད་ལམ་ལས།།
ཉབ་ཉོབ་ཅན་གྱི་བྱ་དངོས་ལྷག་པར་མང་།།
ཕྲ་ཞིབ་ཅན་གྱི་བློ་ཡིས་མ་དཔྱད་ན།།
འཚབ་འཚུབ་ཅན་གྱིས་ཧོབ་ལས་བྱ་མི་རིགས།།
 
བགད་བགད་ངོ་ཡིས་སྙན་སྙན་གཏམ་བཤད་ཅིང་།།
མཛེས་མཛེས་ལུས་ཀྱིས་དགའ་དགའ་ཉམས་སྟོན་ན།།
རིང་རིང་ལོ་རྒྱུས་ཞིབ་ཞིབ་བློས་དཔྱད་ཅིང་།།
འཚམ་འཚམ་རྣམ་པས་ཏག་ཏག་ངོ་ལན་འཇལ།།