རེས་མོས་འཁོར་ལོའི་འགྲོས་ཀྱི་བར་ན་དུས་ཀྱི་གོམ་སྒྲ་ཐག་ཐག་ཐག།
ཚན་རིག་རླབས་ཀྱི་ཕྲེང་བའི་བར་ན་ཡ་མཚན་བྱ་དངོས་སིལ་སིལ་སིལ།།
འགྲན་རྩོད་གློག་ཞགས་ཀྱ་ཀྱུའི་ཁྲོད་ན་གཅིག་ལས་གཅིག་ལྷག་མྱུར་མྱུར་མྱུར།།
སྐྱིད་སྡུག་མདངས་ཀྱི་འགྱུར་བག་གསེབ་ན་མི་ཚེའི་ཆུ་རྒྱུན་ལྷུང་ལྷུང་ལྷུང་།།
 
དུས་རབས་གསར་པའི་གཟི་འོད་འོག་ཏུ་སྐྱེ་རྒུའི་ལང་ཚོ་འོད་ལམ་ལམ།།
ཕུགས་བསམ་རྒོད་པོའི་གཤོག་འགྱུར་འོག་ན་མ་འོངས་མདུན་ལམ་འོད་ཀྲིག་ཀྲིག།
བརྩོན་པའི་གཡོར་གྲུའི་རམ་འདེགས་ཀློང་ན་གཡུར་ཟའི་འབྲས་བཟང་ལྗིད་ཏིག་ཏིག།
འཛུམ་མདངས་པད་མོའི་འདབ་བརྒྱའི་ཚལ་ན་རྐང་དྲུག་བུང་བ་ལྡེམ་མྱུར་མྱུར།།
 
འགྲན་རྩོད་རྒྱལ་ཁའི་ཚ་རྔམ་ཀློང་ན་སྒྱིད་ལུག་ཞྭ་མོ་མཐོ་ཡེར་ཡེར།།
འཕེལ་མྱུར་སྤྱི་ཚོགས་ཐང་ཆེན་དཀྱིལ་ན་འགྲོས་དལ་གོམ་ཁ་འདའ་ར་ར།།
ཤེས་བྱའི་མཛོད་ཀྱི་སྒོ་གླེགས་མདུན་དུ་ཤེས་མེད་བུ་རྣམས་འཇིགས་སྔངས་སྔངས།།
རེ་ཐག་ཆད་པའི་རླུང་ཁའི་དངོ་ན་ཉམ་ཐག་བཞིན་མདངས་སྐྱོ་ལྷང་ལྷང་།།
 
སྐལ་བཟང་རྫོགས་ལྡན་གསར་པའི་དུས་འདིར་མ་གཡེང་སྤོབས་པའི་ལྕགས་མཚོན་སྣོམས།།
འདུར་རྒྱུག་འཕུར་མཆོང་བྲེལ་མྱུར་ངོགས་ནས་ཕ་མཐར་བརྒལ་བའི་གསེར་ལྷམ་གྱོན།།
ལ་རྒྱའི་གླུ་སྐད་གཟེངས་མཐོར་གྱེར་ནས་མདུན་སྐྱོད་གོམ་སྟབས་མཉམ་དུ་སྒྱུར།།
ནམ་ཞིག་ལྷུན་པོའི་དབུ་རྩེར་འགྲེང་ནས་རེ་བའི་ཉི་ཟེར་གདོང་གིས་སུས།།