གངས་ཅན་ཀུན་བཟོད་སྒེག་མོའི་བཞད་སྒྲ།

ཉན་ཤུལ་མཁྱེན་རབ་འོད་གསལ་གྱིས་བརྩམས།        2011-07-07

རང་བྱུང་གངས་རིས་བསྐོར་བའི་བསིལ་ལྡན་ལྗོངས།རི་མཐོ་ས་གཙང་མཚོ་དང་མཚེའུ་དང་།ཡན་ལག་བརྒྱད་ལྡན་ཆུ་ཀླུང་གྲངས་ལས་འདས།འབྲུ་རིགས་སྣ་ལྔའི་ཞིང་ས་གཤིན་པོ་དང་།ཕ་མཐའ་བྲལ་བའི་རྩྭ་ཐང་པདྨས་བརྒྱན།གཅེས་སུ་འོས་པའི་རི་སྐྱེས་སྲོག་ཆགས་དང་།མཁའ་ལ་འཕྱོ་བའི་འདབ་ཆགས་གྲངས་ཚད་ནི།འཛམ་བུའི་གླིང་གི་དང་པོ་ཡིན་པར་གྲགས།ལྷག་པར་ངོ་མཚར་ཆེ་བ་ནི།རི་སྐྱེས་སྲོག་ཆགས་འདབ་ཆགས་རྣམས།མི་དང་འདྲིས་ཤིང་སྒོ་ཕྱུགས་བཞིན།འཇིགས་མེད་བག་ཕེབས་བདེ་བར་རྒྱུ།མཚོ་དང་ཆུ་ལ་གནས་པ་ཡི།ཉ་ལ་སོགས་པའི་གྲངས་ཚད་ནི།དེང་དུས་རྩིས་ཀྱིས་བརྩི་ཐབས་བྲལ།དེའང་ལྕགས་ཀྱུ་དྲ་བ་སོགས།མི་དགོས་ལག་པས་འཇུས་ཀྱང་ཐུབ།དེ་ལྟར་རི་དྭགས་འདབ་ཆགས་རྣམས།བོད་ཡུལ་མཛེས་པའི་རྒྱན་དུ་ཆེ།དེ་བཞིན་བོད་ཀྱི་མཐའ་དབུས་ཀུན།མ་བཅོས་གདོད་མའི་ནགས་ཚལ་གྱི།ཚང་ཚིང་དྲ་བས་ས་ཀུན་ཁྱབ།སྡོང་པོའི་ལོ་ཚད་རིང་བ་ནི།འཛམ་གླིང་ཡོངས་ལ་དཀོན་པར་གྲགས།དུས་བཞིར་སྔོ་བའི་ཐང་ཤིང་དང་།བོད་ཀྱི་ཙན་དན་ཤུག་པ་ནི།ས་མཐོའི་ཤིང་གི་རྒྱལ་པོར་འབོད།དེ་བཞིན་སྟག་མ་དང་།ལ་ཁྲ་འཁྲིལ་པ་དུང་མ་ཤིང་།ལྕང་མ་གླང་མ་སྦྱར་པ་ཤིང་།བེ་ཤིང་ཚེགས་ཤིང་དུག་ཤིང་དང་།རིན་ཆེན་ཤིང་རྫབ་སྨྱུག་མ་དང་།འབྲས་ལྡན་ཤིང་སྣ་གྲངས་ལས་འདས།ཐམས་ཅད་བརྗོད་ཀྱིས་ག་ལ་ལོང་།དོན་དུ་བོད་ཡུལ་ནགས་ཚལ་རྣམས།འཛད་མི་ཤེས་པའི་ནོར་བུ་ཡིན།གཞལ་དུ་དཀའ་བའི་རིན་ཐང་ལྡན།དེ་བཞིན་གངས་རི་རྫ་རི་དང་།གཡའ་རི་སྤང་རི་ཀླུང་ཐང་དུ།བཞི་བརྒྱ་རྩ་བཞིའི་ནད་རིགས་ཀུན།འཇོམས་པའི་སྨན་རིགས་བགྲང་ལས་འདས།དེ་ཡང་རུ་རྟ་ཤིང་ཚ་དང་།བ་སྤྲུ་ཤུ་དག་ཏང་ཀུན་དང་།སེ་འབྲུ་རྒྱལ་བའི་སྤྱན་ཅན་དང་།སྤང་རྒྱན་ཨུག་ཆོས་གུར་གུམ་དང་།ཨ་ཕྱག་གཟེར་འཇོམས་སྲོ་ལོ་དང་།བོང་བ་ཐང་ཕྲོམ་དཀར་པོ་དང་།དབྱར་རྩྭ་དགུན་འབུ་བེ་སྨུག་དང་།ཤྭ་བའི་ག་དོར་གླ་རྩི་དང་།དོན་གྱི་མཁྲིས་པ་གྷི་ཝ་སོགས།གངས་ཅན་ཡུལ་གྱི་སྨན་སྣ་ཀུན།བརྗོད་ལ་གཡུ་ཐོག་ལྗགས་ཀྱང་རྡུགས།བོད་སྨན་དེ་ཚོའི་རིན་ཐང་ལ།རྣམ་ཐོས་སྲས་ཀྱང་ཁ་སྐྱེངས་འགྱུར།དེ་བཞིན་འཛམ་གླིང་ཡང་སྟེང་གི།ས་ཡི་འོག་གི་དཀྱིལ་འཁོར་དུ།རྡུལ་དང་མཉམ་པའི་གཏེར་མཛོད་ནི།གསེར་དངུལ་ཟངས་དང་ར་གན་འཁར།གཤའ་ཚེ་ཞ་ཉེ་དང་བཅས་པའི།ལྕགས་རིགས་བརྒྱད་ཀྱིས་གཙོ་བྱས་པའི།མངོར་གྱུར་མངོན་གྱུར་མ་ཡིན་པའི།གཏེར་གྱིས་ས་འོག་ལྟེམ་གྱིས་གང་།འདོད་ལྡན་འགྲམ་ཆུ་ལྡང་བའི་གནས།རིན་བྲལ་གཏེར་གྱི་གསོག་ཚད་ནི།སྐབས་གསུམ་དབང་པོས་ཀྱང་མི་རྟོགས།མདོར་ན་རང་རེའི་ཕ་ཡུལ་གངས་ལྗོངས་ཀྱི།ས་ཡི་སྟེང་འོག་མ་ལུས་ནོར་གྱིས་གཏམས།མེས་པོས་བསྐྲུན་པའི་འཛད་མེད་ནོར་བུ་དེ།ཤེ་སན་བོད་མིའི་སྲོག་གི་སྙིང་པོ་ཡིན།བོད་ཡུལ་བོད་མི་སྐྱོབ་པའི་མ་མ་སྟེ།མཚོ་དང་ཆུ་བོ་མ་ཡི་ཟུངས་ཁྲག་ཡིན།ལྗོན་པའི་རིགས་རྣམས་མ་ཡི་རུས་པ་སྟེ།རི་སྐྱེས་སྲོག་ཆགས་མ་ཡི་རྒྱན་དུ་མཛེས།ས་འོག་གཏེར་ཁ་མ་ཡི་ནང་ཁྲོལ་སྟེ།ཨེ་མ་བོད་མིའི་མ་མ་མཛེས་པ་ལ།དྲིན་ལན་གཞལ་དུ་མེད་པ་མ་མའི་ཆེད།བོད་མི་རེ་རེའི་ལུས་ཀྱི་ཟུངས་ཁྲག་གི།ཐིགས་པ་རེ་རེས་མ་ལ་མཆོད་ན་ཡང་།དེས་ཀྱང་དྲིན་ལན་འཁོར་ཐབས་ག་ལ་ཡོད།མ་ཡི་བཀའ་དྲིན་བུ་ཚས་མ་ཤེས་ན།འབྲེལ་མེད་གཞན་གྱིས་ཤེས་པ་ག་ལ་སྲིད།ད་དུང་གངས་ཅན་ཡུལ་གྱི་ཁྱད་ཆོས་ནི།དྲི་བྲལ་གཡུ་ལྟར་སྔོ་བའི་ནམ་མཁའ་དང་།ཁ་དོག་དུང་ལྟར་དཀར་བའི་སྤྲིན་པ་དང་།གསེར་མདོག་ལྡན་པའི་དྲོ་སྐྱིད་ཉི་འོད་བཅས།ལུས་དང་གྲིབ་མ་བཞིན་ཏུ་འགྲོགས་པས་ཆོག དྭངས་བསིལ་ཡན་ལག་བརྒྱད་ལྡན་ཆུ་བོ་ལས།རྙོག་ཅིང་བཙོག་པའི་ཆུ་ཡི་མིང་མི་གྲག ནམ་མཁའ་དྭངས་ཤིང་མཁའ་དབུགས་རབ་གཙང་བས།ཀུན་བཟོད་སྒེག་མོའི་བཞིན་རས་ལྷག་པར་མཛེས།གངས་རིས་བར་མེད་བསྐོར་བའི་ཁོར་ཡུག་ཏུ།མི་གཙང་དུག་ལྡན་དུ་བ་རླངས་པ་རྡུལ།སྣོད་བཅུད་ཉམས་པར་བྱེད་པའི་རྫས་དང་བྲལ།གསར་བྱུང་ངོས་མི་ཟིན་པའི་ནད་ཀྱིས་དབེན།དེ་ལྟའི་དགེ་མཚན་འབུམ་གྱིས་རབ་ཕྱུག་པའི།གངས་རིའི་ར་བས་བསྐོར་བའི་ཡུལ་ལྗོངས་ཀྱི།ཕུགས་རེ་ལྡན་པའི་བོད་གཞོན་ཕོ་མོ་རྣམས།ད་ནས་སྤྱི་དོན་སྒྲུབ་པའི་དུས་ལ་བབས།བོད་ཡུལ་ཕུན་ཚོགས་བོད་མིས་མ་སྤྱད་པར།བོད་འབངས་དབུལ་ཞིང་ཕོངས་པ་ཤ་རེ་ཚ།མ་ཡི་ནུ་ཞོ་བུ་ཡིས་མ་བཏུངས་པར།ལྟོགས་སྐོམ་སྡུག་བསྔལ་མྱོང་བ་ཉོན་རེ་མོངས།ཕ་མཐའ་བྲལ་བའི་བོད་ཡུལ་མཐའ་དབུས་ཀུན།རིན་ཐང་བྲལ་བའི་ནོར་གྱིས་གང་ན་ཡང་།ནོར་བུའི་ནོར་ཉམས་མ་ཆོད་ནོར་བདག་རྣམས།གཞན་བརྟེན་ཁོ་ནའི་འཚོ་བར་ཅིའི་ཕྱིར་དགའ།རང་མགོ་སྐོར་བྱེད་རང་སྣང་སྐྱིད་པའི་གཏམ།མི་ལོ་བརྒྱ་སྟོང་རིང་ལ་བཤད་བཤད་ནས།འབྲས་བུ་བོད་ཀྱི་རྒྱ་ཆེའི་མི་དམངས་ཀྱི།འཚོ་བ་རྗེས་སུ་ལུས་པ་མ་མཐོང་ངམ།འགྲོ་ལ་གཅིག་ཏུ་སྨན་པ་དམ་པའི་ཆོས།ཐོག་མཐའ་བར་གསུམ་དགེ་བའོ་མའི་མཚོར།ཆོས་བརྒྱད་ཆགས་སྡང་ཁྲག་གིས་མ་སྦགས་པར།ཚུལ་བཞིན་ཉམས་སུ་ལེན་ལ་སུ་མི་དད།མྱོང་བ་མངོན་གྱུར་མངོན་སུམ་ཚད་མ་ཡིས།འཛམ་གླིང་ཧྲིལ་པོའི་གནས་ཚུལ་ལེགས་རྟོགས་པའི།སྙིང་སྟོབས་དགུ་འགྱུར་བོད་ཀྱི་གཞོན་ནུ་རྣམས།མདུན་དུ་བསྐྱོད་ལ་སུ་ཡིས་འགོག་པར་ནུས།དེ་སྐད་རང་ཡུལ་བོད་ལ་དགའ་བའི་གཏམ།རང་གི་བློ་ལ་གང་ཤར་བྲིས་པ་འདིས།ཕུགས་རེ་ལྡན་པའི་བོད་ཀྱི་གཞོན་ནུ་རྣམས།མདུན་དུ་བསྐྱོད་ལ་སྨན་པའི་རྒྱུར་གྱུར་ཅིག། སརྦ་མདྒ་ལ།
(རྩོམ་སྒྲིག་པ་བདེ་ཆེན་དབང་མོ།)
  • ལེ་ཚན་སྔོན་མ།:རེ་སྒུག
  • ལེ་ཚན་རྗེས་མ།:རེ་འབོད།