ཁ་ཆར་བུ་ཡུག་འཚུབ་ཚེ་སྙིང་སྡུག་མཛའ་མོར་སེམས་ཀྱི་རྨ་ཁ་ཞིག།
     སྐུད་མེད་ཁ་པར་ལམ་ན་སེམས་ཀྱི་ལྷ་མོའི་མིག་ཆུ་མཚོ་ལས་ཟབ།།
     གྱེས་བྲལ་སྡུག་སྲིན་ཁ་ན་ཆུང་འདྲིས་བྱམས་པར་ལན་ཆགས་ལྕི་མོ་ཞིག།
     ཁེར་རྐྱང་འཚོ་བའི་ཁྲོད་ནས་ལྷ་མོའི་དྲན་གདུང་སྙན་མོའི་གླུ་རུ་དྲངས།།
    
     བཅོ་ལྔའི་དུང་ཟླ་འཆར་དུས་ཡིད་མཐུན་བུ་མོར་སེམས་ཀྱི་སྐྱོ་གླུ་ཞིག།
     ལྷིང་འཇགས་མཚན་མོའི་ངོགས་སུ་ལྷ་མོའི་གསང་བ་སྐར་མའི་ཚོགས་ལ་བསྐུར།།
     གྲེ་སྙན་ཁུ་བྱུག་གྲག་དུས་མཛའ་མོ་ལ་ནི་ཡོད་འོང་ཕྱིར་དྲན་ཤིག།
     འདས་སོང་ལྷན་འཛོམས་སྐལ་བ་ལྷ་མོའི་དྲན་འཛིན་ཡོལ་བའི་ངོས་སུ་འཆར།།
    
     ལྷན་འཛོམས་སྐལ་བའི་གསེབ་ནས་སྙིང་སྡུག་བུ་མོར་སེམས་ཀྱི་གསང་བ་ཞིག།
     གྱེས་བྲལ་གདུང་བའི་བར་ན་ལྷ་མོའི་སེམས་པ་ངེས་མེད་རླུང་ལ་བསྐུར།།
     འདས་སོང་ལོ་ཟླའི་ཁྲོད་ནས་ཆུང་འདྲིས་རོགས་ལོར་ཕྱིར་དྲན་རི་མོ་ཞིག།
     མ་འོངས་འཚོ་བའི་གསེབ་ནས་ལྷ་མོའི་སྨོན་པ་དཀོན་མཆོག་གསུམ་ལ་མཆོད།།
    
     སློབ་རའི་གྲུ་ཟུར་རེ་ནས་ཡིད་མཐུན་བུ་མོ་འཛག་མེད་ཟུར་མིག་ཅིག།
     གྲུ་བཞི་དཔེ་ཆའི་བར་ནས་ལྷ་མོའི་སེམས་པ་ཆུང་འདྲིས་རོགས་ལ་ཤོར།།
     མཐོ་སྒང་གངས་རིའི་འདབས་ནས་ཨ་ཅེ་འབྲོག་མོར་འགྱུར་མེད་ཕུགས་བསམ་ཞིག།
     ནོར་ནག་སུག་རྗེས་ཤུལ་ནས་ལྷ་མོའི་བརྩོན་པ་ཆུ་བོའི་རྒྱུན་བཞིན་བསྐྱངས།།