ངས་སྨྲ་བསམ་བརྗོད་འདོད་ཀྱི་འདོད་བློ་མཐའ་དག
རང་ཉིད་ཀྱིས་ཡུན་རིང་ཞིག་ཏུ་སེམས་ཀྱི་གོང་བུ་རུ་བཅུག་ནས།
གློ་སྙིང་མཆིན་གསུམ་གྱི་བར་གསེང་ཀུན་ཏུ་ཁྱད་དུས།
དུས་ཚོད་ངེས་མེད་སྲིད་པ་ནས་འདར་གྱིན་འདུག
ལང་ཚོ་དུས་ཚོད་དང་བསྡོངས་ནས་ཡལ་བཞིན་པས།
ངའི་བརྩེ་དུང་གི་ཞིང་ས་རུ།
ས་བོན་ལྟ་བུའི་ལས་འབྲས་གཅིག་དལ་གྱིས་ལྷུང་བྱུང་།
དེ་ནས།ངའི་བརྩེ་དུང་གི་གླེང་བ་བརྗོད་དུས།
ང་སྙིང་རེ་རྗེ།ཁྱོད་ཀྱི་རང་གཤིས་གྱོང་པོས།
སྲ་ཞིང་མཁྲེགས་པའི་སེམས་ཀྱི་གཤིན་ཐང་དུ།
བརྩེ་དུང་གི་བག་ཆགས་བསྒོ་མི་ཐུབ།
དེ་ནས།བརྩེ་དུང་གིས་མྱོས་པའི་ང་།
ཁྱོད་ཀྱིས་བརྩེ་དུང་གི་མནར་གཅོད་འོག་ནས།
ཨ་ཐང་བསྟུད་མར་ཆད་ཆོག་མོད།
ཡིན་ནའང་ང་ཁྱོད་ལ་དགའ་དྲགས་པའི་རྐྱེན་གྱིས།
ངའི་བརྩེ་དུང་གི་ཞིང་སར་བཏབ་པའི་ས་བོན་ལ།
ལྗང་མྱུག་འབུས་པའི་རེ་བ་དང་།
འབྲས་བུ་སྨིན་པའི་ཆེད་དུ།
དུས་ཚོད་ཀྱི་མིག་རྡེབ་ཙམ་ལའང་།
བློ་ཡུལ་ནས་བརྗེད་མ་མྱོང་།
ད་དུང་སྔར་ལས་ཀྱང་བརྩེ་དུང་ལ་ཤུགས་བསྣན་ནས།
འཕྲིན་པ་དང་འཕྲིན་པའི་སྟེང་ལ་སྙིང་གཏམ་བཀོད་ཅིང་།
ཁ་པར་དང་ཁ་པར་བར་གྱི་གློག་ལམ་བརྒྱུད་ནས།
ངས་ཁྱོད་ལ་ཐབས་ཟད་འུ་ཐུག་གི་བརྩེ་བ་བརྗོད་མཐར།
ཁྱོད་ཀྱིས་ད་གཟོད་ང་རང་ལ་
ཆ་རྐྱེན་ཞིག་དང་མཉམ་དུ་ཁས་བླངས་སོང་།
དུས་དེ་ནས་རུད་ལ་ཉེ་བའི་ངའི་སྙིང་ཆུང་དམར་པོ་དང་།
སྐམ་ལ་ཉེ་བའི་ས་བོན་རྡོག་ཅིག
ཡོད་ཚད་ལ་སྙིང་གསོན་པོ་ཞིག་ཆགས་ནས།
ཕན་ཚུན་སྐྱབས་ཡུལ་ཏུ་གྱུར་སོང་།
ངའི་གཅེས་སུ་འོས་པའི་དགའ་མ།
ང་ལ་ད་དུང་བརྗོད་འདོད་པའི་སྙིང་གཏམ་མང་པོ་ཞིག
འོན་ཀྱང་མཚམས་འདི་ནས་འགྱུར་མེད་ཀྱི་བརྗོད་དོན་གཅིག
ང་ཁྱོད་ལ་དགའོ།།