ཅ་ཅོའི་འུར་ཟིང་སྒྲོག་རྒྱུར་གོམས་ལོབས་ལང་ཤོར་སྤྱོད་ངན་དོར་དང་ལྷན། །
ཆ་འཕྲིན་ལག་རྩལ་འཕེལ་མྱུར་དུས་ལ་དཔའ་གདེངས་དང་བཅས་འགྲན་རྒྱུག་གྱིས། །
ཇ་ཡུན་ཙམ་ཡང་འཕྲོ་བརླག་མ་གཏོང་མ་འོངས་མདུན་ལམ་རྙེད་སླད་དུ། །
ཉ་མོ་ཆུ་འདྲེས་ཤེས་ཡོན་མཐའ་དག་བློ་དང་རིག་པས་རྩལ་གྱིས་འདྲེན། །

ཏ་ལེན་སྣོད་ལ་རིན་ཆེན་ཤེས་བྱའི་འབྲས་བཟང་གཏམས་ལྟར་གཡང་དུ་ཆགས། །
ཐ་མ་རྒྱལ་ཁའི་དཔའ་དར་རིང་མོ་མཐོ་རུ་བསྒྲེངས་ཏེ་དགའ་འབོད་གཡོ། །
ད་གཟོད་སེམས་ཀྱི་ལྡེབས་ངོར་མཛེས་པའི་ཁ་དོག་སྣ་ལྔའི་འཇའ་ཚོན་རྟག །
ན་ཚོད་ཕྲ་བའི་གཞོན་ནུ་ཚོགས་ཀྱིས་མ་བརྗེད་མ་བསྐྱུར་སེམས་སུ་ཉར། །

པ་ཏྲའི་རིས་བསྣོལ་སྤྱི་ཚོགས་འཕེལ་འགྱུར་འཇིག་རྟེན་སྲིད་པའི་ཁམས་འདི་རུ། །
ཕ་མེས་ལས་སྤེལ་བཅུ་ཕྲག་རིག་གཞུང་གཏིང་དཔག་དཀའ་བའི་རྒྱ་མཚོའི་ཁྱོན། །
བ་ཚྭའི་དྲི་བྲལ་ལྷད་མེད་ཡོན་ཏན་རིན་ཆེན་ནོར་བུའི་གཏེར་མཛོད་ལ། །
མ་ཧད་མ་འཁུམ་བརྩོན་པའི་ལྕགས་དབྱུག་བརྡར་བའི་མཐའ་མ་རྣོ་ཁབ་དང་། །

ཙ་རིའི་གནས་ལ་ཞབས་པད་བསྒྱུར་བའི་ཞུམ་མེད་དཔའ་སྤོབས་གཟེངས་སུ་སྙོགས། །
ཚ་གྲང་ཁྱད་བསད་སློབ་དཔོན་ཐོན་མིའི་དཀའ་བ་འཇོམས་པའི་ནུས་མཐར་སློབས། །
ཛ་དྲག་བརྩོན་ལེན་རེ་ཞིག་མྱོང་ཡང་མཐའ་མ་གྲུབ་འབྲས་རྒྱ་ཆེར་ཐོབ། །
ཝ་ལེར་ཡིད་ཀྱི་གཏིང་ལ་ཟུངས་དང་ནད་འཇོམས་ཕན་པའི་སྨན་མཆོག་ཉིད། །

ཞྭ་མོ་ཟུར་གྱོ ན་སྐྲ་ཚོན་བསྒྱུར་མཁན་ཐ་ཤལ་སྤྱོད་ངན་ཁ་ཅིག་མིས། །
ཟ་མའི་བཟང་ངན་གྱོ ན་པའི་ཡག་བཙོག་རྒྱུན་པར་གླེང་གཞིའི་རྩེར་བཟུང་ན། །
འ་ཅག་གངས་ལྗོངས་མ་འོངས་འཕེལ་བར་ཀྱག་ཀྱོག་ལམ་ཕྲན་མང་ཆེ་བས། །
ཡ་ཆུང་སྡུག་གི་སྨུག་སྤྲིན་འཐིབས་ཤིང་མ་ཆུང་སྐྱོ་བའི་མཆི་མས་རྫི། །

ར་རིའི་དྲི་ངན་རིང་དུ་དོར་ཏེ་སྐྱོན་ངན་དག་ཐེར་བྱེད་པའི་བློ། །
ལ་ཤས་སེམས་སུ་དམ་པོར་བརྐོས་ནས་ཡ་རབས་སྤྱོད་བཟང་འདྲིས་ཤིང་མངའ། །
ཤ་ཚའི་སྙིང་ལ་རུས་པ་འཆག་པས་ཁྱེད་ཀྱི་འཕྲིན་ལས་རླབས་པོ་ཆེ། །
ས་སྟེང་འདི་ན་བ་དན་དགུང་དུ་ལྷབ་ལྷུབ་བསྐྱོད་དང་ཅི་འདྲའི་མཚུངས། །

ཧ་ཧ་སླ་མོའི་སྐུལ་ཅག་ཚ་བོ་ཕན་རེ་སེམས་ན་དང་དུ་ལོངས། །
ཨ་མའི་བུ་ཆུང་བློ་རྒོད་རིག་རྒོད་ཁ་ཡག་མ་ཡིན་དྲང་གཏམ་ཉིད། །ཀ་ཁའི་མགོ་རྔ་ཨེན་ཙམ་ཀློག་ཤེས་རང་རློམ་ཆུ་ཁའི་ལྦུ་ལྟར་འཕྱོ། །
ཁ་ཕོ་སྒྲོག་འདོད་དལ་མེད་མཆུ་འདབ་ངན་ཇུས་ཐབས་ཀྱི་སྣེ་ལ་འཇུ། །
ག་ལེར་བསམ་ན་གནོད་པའི་རྒྱུ་ལས་རང་གཞན་གཉིས་ཀ་ཕུང་དུ་དཀྲུག །
ང་དམོད་མ་ཤོད་མཐུན་པའི་གྲོགས་ལ་གཞེན་སྐུལ་བདུད་རྩིའི་ཡོན་ཆབ་འདེགས། །