འདི་ན་ཇ་ཁང་ཆང་ཁང་བརྩེགས་རིམ་ན། །
སེམས་ཅན་དོན་བྱེད་སྐྱབས་ཀྱི་མགོན་གྱུར་བའི། །
སེར་མོ་བ་ནི་གཟུགས་བརྙན་གང་མང་མཇལ། །
བཏང་སྙོམས་མ་བཞག་ཟུག་རྔུའི་གཏམ་སྤྲོས་ན། །
ཨ་ཁུ་ཐུགས་དབང་ལྷོད་དེ་གསན་པར་མཛོད། །

ལ་ལའི་ཐུགས་ལ་དཀོན་མཆོག་གདོན་ཞུགས་ནས། །
གཙང་གནས་བསྐྱུར་ཅིང་སྒོམ་སྒྲུབ་བར་བཅད་དེ། །
སེམས་ཅན་དོན་མིན་དོན་གཞན་གཙུག་ཆེན་གྱིས། །
འདུ་འཛི་ཆེ་བའི་རྒྱ་གྲོང་བཞི་མདོར་བཞུགས། །
སྙིང་གི་ཨ་ཁུ་སྐུ་ངལ་ཆེ་ལགས་སམ། །

ལ་ལའི་སྙིང་ལ་སྲིན་པོ་དངོས་ཞུགས་ནས། །
སེམས་ཅན་ཞབས་རྡུལ་ཟོལ་གྱིས་སྤྱི་བོར་བསྐུར། །
ཡར་འགྲོ་རྣམས་ལ་སྒྲོལ་མ་ཞ་བོ་གསུང་། །
མར་རྒྱུག་ཚོ་ལ་གུ་རུའི་སྔགས་ཆད་ཅིག །
སྙིང་གི་ཨ་ཁུ་ཆོས་སྦྱིན་འགྲུབ་ལགས་སམ། །

ཅུང་ཙམ་ཐོབ་ཚེ་སྒྲོལ་མ་དྲག་གིས་གསུངས། །
མ་བྱིན་མ་བཀུར་བ་ལ་སྤྱོ་བས་སྡང་། །
ཞི་ཁྲོ་ལྷན་རྒྱས་ཐང་ག་གསར་པ་ཞིག །
ཚོང་རའི་གཞུང་ན་དཀྱིལ་མོ་ཀྲུང་དུ་བཞུགས། །
སྙིང་གི་ཨ་ཁུའི་བཟོད་པ་གསོལ་ལགས་སམ། །

བླ་མའི་བཀའ་དང་ཆོས་ཀྱི་དམ་ཚིག་རྣམས། །
འཁོར་བའི་ཆུ་ལ་བསྐུར་ཅིང་ཆོས་གོས་གསུམ། །
རྒྱ་ཡུལ་གྲོང་ན་གར་གྱི་ཕྱག་ལེན་ཡིན། །
གང་ཟག་ཕལ་བའི་དོ་ཟླ་མིན་ཟེར་ན། །
སྙིང་གི་ཨ་ཁུའི་ཚུལ་ཁྲིམས་འདི་ཡིན་ནམ། །

བསླབ་གསུམ་ཐོས་པ་མི་འདོད་གྲོང་ཆོས་དང་། །
གླུ་གར་སྙན་པར་དགའ་བས་རྗེས་འཛིན་ཅིང་། །
ཡོད་ན་ལྷ་ཆོས་རྫས་ཀྱི་ཁེ་ལས་བརྩོན། །
མེད་ན་བསོད་སྙོམས་རེམ་པའི་ཐབས་བཟང་ཅན། །
སྙིང་གི་ཨ་ཁུ་བརྩོན་འགྲུས་ཆེ་བ་ལགས། །

ཉིན་མོར་ཟས་ཀྱང་མི་འདོད་སྒོར་མོ་དྲན། །
མཚན་མོར་ཆོས་ཀྱང་མི་སྙམ་སྒོར་མོ་འདོད། །
ཉིན་མཚན་ཁོར་མོར་སྒོར་མོ་བསམ་བསམ་ནས། །
ཡ་ཁོག་སྟོད་ལ་སྙིང་རླུང་འཚུབ་སེ་འཚུབ། །
སྙིང་གི་ཨ་ཁུ་བསམ་གཏན་འགྲུབ་ལགས་སམ། །

ཡན་ལག་ཤེས་རབ་དོན་དུ་ཐུབ་དབང་དགྱེས། །
ཉིང་ལག་སྒོར་མོར་བཅོལ་བའི་ཨ་ཁུ་སྐྱིད། །
ཆ་ཅན་ཆ་ཤས་གྲངས་ལ་དཔོག་དཀའ་ཡང་། །
སྒོར་མོའི་རྩིས་ལ་འཕྱུགས་མེད་རིག་སྒྲེན་པའི། །
སྙིང་གི་ཨ་ཁུ་ཤེས་རབ་འཕེལ་ལགས་སམ། །

སྔོན་བྱོན་མེས་པོས་དཀའ་བ་འབུམ་འགྱུར་གྱིས། །
དགའ་ལྡན་ཁྲི་ལ་མངའ་བདག་སུ་ཡིན་འགྲན། །
དེང་སང་འབྱོར་ལྡན་ཨ་ལགས་མདོ་སྔགས་ལ། །
ཐོས་བསམ་བྲལ་ཞིང་སེམས་ཅན་དོན་མི་དགོངས། །
དགའ་ལྡན་ཁྲི་པ་རིན་གྱིས་བསླུ་ལགས་སམ། །

བསམ་ཞིང་བསམ་ཞིང་འདོད་པ་ཨ་ཁུ་ཡིན། །
དགེ་བའི་གྲོགས་མཆོག་ཁྱེད་ལས་བདག་ལ་མེད། །
ཐར་བའི་ལམ་སྟོན་ཁྱེད་ལས་སྲིད་ན་དབེན། །
ཆོས་ལུགས་པ་དང་ཆོས་པ་རྣམ་དག་ཅིག །
མཛད་ན་བདག་སོགས་འགྲོ་བའི་མགོན་གྱུར་ཅིགཚེ་འདིའི་ཕན་པ་ཐོས་པ་ཡིན་ཞེས་སྐུལ་མཛད་ཅིང་། །
ཕྱི་མའི་བདེ་བའང་སེམས་བཟང་འཆིང་བར་བཀའ་སྩོལ་བའི། །
ཆོས་གོས་མེད་ཀྱང་སྒོ་གསུམ་ཆོས་ལ་བཅོལ་བ་ཡི། །
ཕ་མའི་དྲིན་ལྟར་བྱམས་པའི་ཐུགས་ལས་མི་འདོར་བའི། །
མ་ཧཱ་བཙན་ལྷའི་དམ་པ་གཙུག་གི་རྒྱན་དུ་འཆིང་། །