མྱི་ཁའི་སེན་ཐག་གང་ལ་འདེབས་ན་འདེབས་སུ་ཆུག།
     ཕྲག་དོག་རྡོག་ཐོས་སུ་ལ་བརྫུས་ན་བརྫུས་སུ་ཆུག།
     སྨན་ཆུང་ཁྱོད་དང་ལྷན་འཛོམས་སྐལ་བ་ལྡན་སོང་ན།།
     གཅར་རྡུང་སྐོར་གསུམ་མྱོས་ཀྱང་འགྱོད་པའི་ཀུན་སློང་མེད།།
    
     རྒྱུ་དང་ནོམ་པའི་རིན་ཆེན་མེད་ན་མེད་དུ་ཆུག།
     ཐོབ་དང་གོ་སའི་ཁྲི་དང་བྲལ་ན་བྲལ་ཏུ་ཆུག།
     འགྱུར་མེད་བརྩེ་དུང་མདུད་པ་དགུ་སྒྲིལ་སྦྲེལ་ཐུབ་ན།།
     ཚེ་གཅིག་སྤྲང་པོར་ལུས་ཀྱང་འགྱོད་པའི་བློ་ནི་མེད།།
    
     སྒྲོལ་མས་སྒོར་མོའི་སྲབ་མཐུག་གླེང་ན་གླེང་དུ་ཆུག།
     ལྷ་མོས་སྒོ་ཕྱུགས་མང་རབ་བཤད་ན་བཤད་དུ་ཆུག།
     སེམས་ཀྱི་སྨན་ཆུང་བུ་མོས་ཟུར་མིག་འཕངས་བྱུང་ན།།
     རིན་ཆེན་གསེར་ནག་ཡིན་ཡང་འདོད་པའི་སྙིང་པོ་ཅི།།
    
     མཛེས་པའི་དྲུག་འགྱུར་ལང་ཚོ་རྒུད་ན་རྒུད་དུ་ཆུག།
     སྙན་པའི་ཁུ་བྱུག་གྲེ་འགྱུར་ཉམས་ན་ཉམས་སུ་ཆུག།
     དུང་བའི་དྭངས་གཙང་སེམས་པ་ནམ་ཡང་སྒྱུར་མེད་ན།།
     སྐྱེས་ནས་རྒ་བ་འཇིག་རྟེན་མི་ཡི་ཆོས་ཉིད་ཙམ།།
    
     ཉིན་མཚན་ངལ་དུབ་བར་ནས་གདུང་ན་གདུང་དུ་ཆུག།
     དུས་བཞིར་ལུས་པོ་རྡུལ་གྱིས་བཟུང་ན་བཟུང་དུ་ཆུག།
     བུ་མོའི་བརྩེ་བ་མི་འགྱུར་རྡོ་རྗེའི་བྲག་ཡིན་ན།།
     སྐྲ་ལོ་ཁ་བའི་ཟེགས་མ་བབས་ཀྱང་འགྱོད་པ་ཅི།།
    
     འཇིག་རྟེན་མི་ཆེན་དཔོན་ཆེན་དགོད་ན་དགོད་དུ་ཆུག།
     ན་མཉམ་ཁ་ཡ་ན་ཟླས་འཕྱ་ན་འཕྱ་རུ་ཆུག།
     དུང་བའི་མིག་ཞགས་ང་མིན་གཞན་ལ་འཕངས་མེད་ན།།
     ཆུང་འདྲིས་རོགས་ལོའི་བརྩེ་བའི་མེ་ཏོག་རྙིད་མི་སྲིད།།
    
     དགེ་རྒན་དམ་པའི་ཐུགས་དང་འགལ་ན་འགལ་ཏུ་ཆུག།
     དྲིན་ཆེན་ཕ་མའི་བཀའ་དང་རྒོལ་ན་རྒོལ་ཏུ་ཆུག།
     ཉི་མ་ཟླ་བའི་འཕེལ་འགྲིབ་ནུབ་རིར་ཉམས་མིན་ན།།
     ཆུང་འདྲིས་ཁྱོད་དང་འགྲོགས་འདོད་འབྱུང་བཞིའི་མེ་ལས་ཚ།།
    
     ཚིག་དང་ཚིག་ལས་དགའ་བ་བཤད་ན་བཤད་དུ་ཆུག།
     སེམས་དང་སེམས་ནས་བརྩེ་བ་གླེང་ན་གླེང་དུ་ཆུག།
     ལོ་དང་ཟླ་བའི་ཁྲོད་ཀྱི་ངང་སྒུག་མང་ན་ཡང་།།
     ཁྱོད་དང་ང་ཡི་འདོད་པ་གོར་མོ་རྡོ་ཡི་གཤིས།།
    
     མི་འདོད་ནད་ཀྱིས་དྲག་ཏུ་གཙེས་ན་གཙེས་སུ་ཆུག།
     མི་རྟག་གཤིན་རྗེས་ལག་བརྡ་གཏོང་ན་གཏོང་དུ་ཆུག།
     ཕྱི་མའི་དག་ཞིང་སྦྲ་ནག་གྲུ་བཞིའི་ཁ་ཚུབ་འོག།
     མཉམ་དུ་བདེ་སྐྱིད་འཚོ་བའི་དཔལ་ལ་རོལ་ལགས་ཉིད།།