ཆོས་དང་འཇིག་རྟེན་གཉིས་མེད་སེང་གེའི་ལུས།།
ཆོས་མེད་སྤྱོད་པའི་སྤྲང་པོ་ང་འདྲ་ལ།།
སངས་རྒྱས་འཕྲིན་ལས་ཉི་མའི་འོད་ཟེར་དང་།།
སྔོན་སྨོན་བཟང་བོའི་ཆུ་ལུད་འཛོམས་པ་ལས།།
དགེ་བའི་ས་བོན་སྟོབས་ཤུགས་སྨིན་པ་ཁྱོད།།
མངའ་ཐང་རྒྱས་པའི་དཔོན་གྱི་རིགས་སུ་འཁྲུངས།།
དེས་ན་ཁམས་གསུམ་འགྲོ་བའི་བདེ་སྐྱིད་ཀུན།།
འབྱུང་བའི་སྒོ་མོ་སངས་རྒྱས་བསྟན་པ་ལ།།
སྒོ་གསུམ་འབད་པས་སྲི་ཞུ་སྒྲུང་པ་འདི།།
ལས་སུ་བྱ་བ་ཀུན་གྱི་ཐོག་མ་ལགས།།
གང་དུ་མཁས་དང་གྲུབ་པ་བཞུགས་གྱུར་པ།།
དེ་ན་ལུང་དང་རྟོགས་པའི་བསྟན་པ་གནས།
ཇི་སྲིད་བཤད་དང་སྒྲུང་པའི་སྲོལ་གནས་པ།
དེ་སྲིད་བར་དུ་དམ་པའི་སྐྱེས་བུ་འབྱུང་།
དེས་ན་དྲི་མེད་བསྟན་པའི་པད་དཀར་ཚལ།
བདེ་སྐྱིད་དབྱར་གྱི་དཔལ་དུ་གནས་པ་འདི།
བློ་གསལ་ངང་མོའི་ཁྱུ་ཡིས་རབ་བརྟེན་པའི།།
འཆད་ཉན་འོ་མའི་ཆུ་མཚོ་ཉིད་ལ་རག།
སྡེ་སྣོད་འཆད་ཉན་བྱེད་པའི་མཁས་པ་དང་།
དེ་དོན་ཉམས་སུ་ལེན་པའི་སྒོམ་ཆེན་གྱིས།
བཀྲ་ཤིས་ལྷ་ཡི་སྒང་རྒྱུན་ཀུན་ཁྱབ་པའི།
དགེ་འདུན་སྡེ་གཉིས་སྤེལ་བའི་མཛད་སྒོ་སྐྱོངས།
མངའ་རིས་འབངས་ཀྱི་རི་བོ་མཐོན་པོའི་རྩེར།
དཔལ་དང་འབྱོར་བའི་གངས་ཀྱི་ཅོད་པན་ལ།
རྟག་ཏུ་གནས་པའི་མི་རྗེ་གདོང་ལྔ་པ།
ཡངས་པའི་སྤྱན་གྱིས་ཕྱོགས་བཅུར་གཟིགས་པར་འཚལ།
གཞན་ཕན་སྙིང་རྗེའི་སྣུམ་དང་བྲལ་བ་ཡི།
རིག་འཕྲུལ་ཐབས་ཤེས་གློག་གི་སྒྲོན་མ་ཡིན།
དྲང་པོའི་མི་ལ་འཁྱོག་པོའི་ལམ་སྟོན་པའི།
སྐྲ་སེར་སྤྲེ་འུའི་རིགས་ལ་ཐུགས་ཐོན་འཚལ།
ཐོས་བསམ་སྒོམ་པའི་ཞིང་ས་གཤིན་པོ་ལ།
རང་རིག་རྟོགས་པའི་སྙེ་མ་རབ་འཁྲུངས་པའི།
དམ་པའི་སྐྱེས་བུ་གང་དུ་བཞུགས་ཀྱང་རུང་།
ཟོལ་མེད་གཙུག་གི་རྒྱན་དུ་འཛིན་པའི་འོས།
སྐྱ་སེར་གང་ཡང་མིན་པའི་ཆ་ལུགས་ལ།
ཕྱི་ནང་གང་ཡང་མིན་པའི་ཆོས་ལུགས་ཅན།
རྒྱ་བོད་བསྐོར་བའི་ཨ་མདོ་ང་འདྲའི་རིགས།
སྐབས་འགར་དགྱེས་པའི་སྤྱན་གྱིས་བསྐྱངས་པར་འཚལ།
རྩོམ་ཡིག་འདི་ནི་མཁས་དབང་དགེ་འདུན་ཆོས་འཕེལ་གྱིས་འབྲུག་ཡུལ་གྱི་བཀྲ་ཤིས་སྒང་བྱ་བའི་རྫོང་དཔོན་འཕྲིན་ལམ་འོད་ཟེར་གྱིས་བསྐུལ་ངོར་བྲིས་པ་ཞིག་རེད།ལོ་ཤས་སྔོན་ཧོར་གཏེར་སྟོན་ཆོས་སྒར་གྱི་གྲྭ་བ་དཀོན་མཆོག་བསྟན་འཛིན་གྱིས་འབྲས་ལྗོངས་སྒང་ཏོག་མཆོད་རྟེན་དགོན་སོགས་སུ་གནས་འཇལ་དང་སློབ་གཉེར་བྱེད་རིང་འབྲུག་པ་བ་ཞིག་གིས་མ་ཕྱི་ཉར་ཚགས་བྱས་ཡོད་པ་གཡར་པོ་བྱུང་བ་ལྟར་ལྷད་བཅོས་ཅི་ཡང་མེད་པར་ངོ་བཤུས་པ་འདི་དེང་ཕྱིན་མཁས་དབང་འདི་བའི་གསུང་རྩོམ་ཕྱོགས་སྒྲིག་རེ་བྱུང་ན་ཁ་ཇེ་ཚང་དུ་གཏོང་བ་དང་།ཕྱི་རབས་པ་རྣམས་ཀྱིས་ཁོང་གི་རྩོམ་རྩལ་ལ་སློབ་སྦྱོང་ངམ་ལོ་རྒྱུས་ལ་ཞིབ་འཇུག་བྱེད་པ་སོགས་གང་ཅིར་ཕན་ངེས་སྙམ་ནས་དུས་དེབ་ཏུ་དགོད་པར་ཕུལ་ལགས་ཞེས་འདོན་སྤྲོད་པ་རྩེ་སྐལ་བཟང་ལྷུན་གྲུབ་ཀྱིས།