སྤུན་གྲོགས་ཚོ། ངས་ཁྱེད་ཚོར་འདི་ལྟར་བཤད། མཁའ་དབྱིངས་སུ་སྤྲིན་པ་མེད་ཀྱང་ཆོག་མོད། འོན་ཀྱང་ཉི་མ་དང་ཟླ་བ་མེད་མི་རུང་། ཉི་མ་དང་ཟླ་བ་ནི་སྐད་དང་ཡི་གེ་རེད། ཁྱེད་ཚོ་ཉི་མ་དང་ཟླ་བའི་འོད་ལ་དུང་བ་ཇི་བཞིན་སྐད་དང་ཡི་གེ་རང་གི་གཅེས་ནོར་ལྟར་སེམས་སུ་སྒོམ་དགོས།
     སྤུན་གྲོགས་ཚོ། ངས་ཁྱེད་ཚོར་འདི་ལྟར་བཤད། རྩྭ་ཐང་དུ་རླུང་བུ་མེད་ཀྱང་ཆོག་མོད། འོན་ཀྱང་མེ་ཏོག་དང་ནོར་ལུག་མེད་མི་རུང་། མེ་ཏོག་དང་ནོར་ལུག་ནི་སྐད་དང་ཡི་གེ་རེད། ཁྱེད་ཚོ་མེ་ཏོག་དང་ནོར་ལུག་གི་བཀྲག་མདངས་དང་འབའ་སྒྲ་ལ་འཁྲེང་བ་ཇི་བཞིན་སྐད་དང་ཡི་གེ་རང་གི་མཛེས་སྡུག་ལྟར་ཉམས་སུ་མྱོང་དགོས།
     སྤུན་གྲོགས་ཚོ། ངས་ཁྱེད་ཚོར་འདི་ལྟར་བཤད། མཚོ་མོ་ལ་རླབས་ཕྲེང་མེད་ཀྱང་ཆོག་མོད། འོན་ཀྱང་ངང་ངུར་དང་གསེར་ཉ་མེད་མི་རུང་། ངང་རུང་དང་གསེར་ཉ་ནི་སྐད་དང་ཡི་གེ་རེད། ཁྱེད་ཚོ་ངང་ངུར་དང་གསེར་ཉའི་རྐྱལ་རྩལ་ལ་མོས་པ་ཇི་བཞིན་སྐད་དང་ཡི་གེ་རང་གི་བརྩོན་འགྲུས་ཀྱི་དཔུང་རོགས་སུ་བསུ་དགོས།
     སྤུན་གྲོགས་ཚོ། ངས་ཁྱེད་ཚོར་འདི་ལྟར་བཤད། འཚོ་བ་ལ་རྟེན་གཞི་མེད་ཀྱང་ཆོག་མོད། འོན་ཀྱང་དགོད་སྒྲ་དང་འཛུམ་མདངས་མེད་མི་རུང་། དགོད་སྒྲ་དང་འཛུམ་མདངས་ནི་སྐད་དང་ཡི་གེ་རེད། ཁྱེད་ཚོ་དགོད་སྒྲ་དང་འཛུམ་མདངས་ལ་སྤྲོ་བ་ཇི་བཞིན་སྐད་དང་ཡི་གེ་རང་གི་བདེ་སྐྱིད་དུ་བསམ་དགོས།
     སྤུན་གྲོགས་ཚོ། ངས་ཁྱེད་ཚོར་འདི་ལྟར་བཤད། མིའི་རིགས་ལ་རྒྱུ་ནོར་མེད་ཀྱང་ཆོག་མོད། འོན་ཀྱང་བླ་སྲོག་དང་རྣམ་ཤེས་མེད་མི་རུང་། བླ་སྲོག་དང་རྣམ་ཤེས་ནི་སྐད་དང་ཡི་གེ་རེད། ཁྱེད་ཚོ་བླ་སྲོག་དང་རྣམ་ཤེས་ཀྱིས་བསྐྱེད་པ་ཇི་བཞིན་སྐད་དང་ཡི་གེ་རང་གི་ཚེ་སྲོག་གི་གཟུང་ཐག་ལྟར་དམ་དུ་སྦྲེལ་དགོས།